SALMOS 89
89
Dios tsi' yʌq'ue David xuc'ul bʌ i t'an
1C Yum, mi caj j c'ʌyibeñet i yutslel a pusic'al ti pejtelel ora.
Mi caj cʌq'ueñob i cʌñet calobilob ti jujunlajm, come xuc'ul a pusic'al c'ʌlʌl ti pejtelel ora.
2Tsac sube lac Yum: Xuc'ul i yutslel a pusic'al ti pejtelel ora.
Lajal i xuc'tilel a pusic'al bajche' panchan mach bʌ yujilic yʌjñel.
3Lac Yum tsi' yʌlʌ: Tsa cʌq'ue xuc'ul bʌ c t'an jini yajcʌbil bʌ c cha'an.
Tsac wersa sube c winic David
4Cha'an mi caj c wa'chocon i p'olbal cha'an mi' yajñel ti pejtelel ora,
Cha'an mi' chʌn cha'len i ye'tel ti pejtelel ora, che'en lac Yum.
5C Yum, ya' ti panchan mi' p'isob ti wenta uts'at bʌ a melbal.
Mi' sujbel ti ñuc i xuc'tilel a pusic'al ya' ba' tempʌbilob ch'ujul bʌ ángelob.
6¿Am ba juntiquil ti panchan lajal bʌ bajche' lac Yum?
¿Am ba ángel ñuc bʌ bajche' lac Yum?
7Jini ángelob año' bʌ i ye'tel mi' bʌc'ñañob Dios.
Wen ñuc Dios ya' ti' tojlel pejtel año' bʌ ti' joytilel.
8C Yum Dios, i Yumet bʌ Panchan yic'ot Pañimil,
¿Am ba yambʌ lajal bʌ i p'ʌtʌlel?
Baqui jach mi' q'ueletob mi' ña'tañob xuc'ulet.
9Mi' yumañet jini colem ñajb wʌlʌcña bʌ mi' majlel.
Che' wen wʌlʌcña mi' letsel ja', jatet ma' ñʌch'chocon.
10Jatet tsa' t'uchta egiptojob, tsa' jisayob. Mach chʌn cʌñʌlobix.
Tsa' pam pucu a contrajob. Wen p'ʌtʌlet.
11A cha'añʌch jini panchan, a cha'añʌch pañimil.
Tsa'ix a mele jini pañimil yic'ot pejtel i bʌl.
12Tsa'ix a mele jini pañimil c'ʌlʌl ti norte c'ʌlʌl ti sur.
Jini wits tac Tabor yic'ot Hermón mi' tsictesañob i ñuclel a c'aba'.
13Cabʌlʌch i p'ʌtʌlel a c'ʌb, cabʌlʌch a melbal. Ma'anic i p'isol a p'ʌtʌlel.
14Toj ma' cha'len meloñel ti a yumʌntel come tojet.
Uts'at pejtelel chuqui ma' mel. Mi' tsictiyel a wutslel yic'ot a sujmlel.
15Tijicñayob mu' bʌ i yubiñob i t'an trompeta,
Come mi' yajñelob ti a sʌclel.
16Tijicña mi' yubiñob ti jujump'ejl q'uin mu' bʌ i cʌñob a c'aba'.
Mi' ñuc'añob i pusic'al cha'an tojet.
17I ñuclelʌch i p'ʌtʌlel mu' bʌ a wʌq'ueñob.
Cha'an ti a wutslel mi caj c p'ʌtan lojon.
18Come lac mʌctʌjibʌch lac Yum.
Jiñʌch lac Rey, jini Ch'ujul bʌ ti Israel.
19Tsa'ix a pejca jini x'alt'an a cha'an ti espíritu. Tsa' sube:
Tsa'ix c yajca loq'uel ti' tojlel i pi'ʌlob juntiquil wen p'ʌtʌl bʌ cha'an mi' cha'len yumʌl.
20Tsa'ix c yajca c winic David.
Tsa'ix c boño ti ch'ujul bʌ aceite.
21Mi caj j coltan c winic tic p'ʌtʌlel.
Mi caj c p'ʌtesan tij c'ʌb.
22Mach mʌjlic i cha'an i contra.
Jini jontol bʌ ma'anic mi caj i t'uchtan c winic.
23Mi caj c t'uchtʌbeñob i contrajob ti' tojel i wut.
Mi caj c jats'ob mu' bʌ i ts'a'leñob.
24Mi caj c pʌsben i xuc'tilel c pusic'al yic'ot cutslel.
Mi caj i yʌq'uentel i yumʌntel tij c'aba'.
25Mi caj cʌq'uen jini lum ya' ti colem ñajb,
C'ʌlʌl ti jini colem ja' Eufrates.
26Mi caj i pejcañon: Jatet c Tatet,
C Dioset, c Xajlelet ba' ch'oyol j coltʌntel, che'en.
27Mi caj cotsan c winic ti ascuñʌl bʌ calobil.
Ti' tojlel jini ñuc bʌ reyob ti pañimil ma'anic ñuc bʌ bajche' jini.
28Mi caj c pʌsben cutslel ti pejtelel ora come c'ux mi cubin.
Mach jilic ti pejtelel ora jini xuc'ul bʌ c t'an tsa' bʌ cʌq'ue.
29Mach jilic i p'olbal ti pejtelel ora.
Che' bajche' xuc'ul jini panchan che'ʌch ja'el i buchlib ti' yumʌntel ti pejtelel ora.
30Mi tsi' cʌyʌyob j cʌntesa i yalobilob,
Mi mach yomobic i tsajcan majlel jini toj bʌ c t'an,
31Mi caj c ju'sʌbeñob i pusic'al.
Mi ts'a' mi' yubiñob i tic'ol,
Mi ma'anic mi' jac'beñob c mandar,
32Che' jini mi caj c ju'sʌbeñob i pusic'al ti asiyal.
Mi caj c jats'ob cha'an i mul.
33Pero ma'anic mi caj j cʌy j c'uxbin c winicob.
Xuc'ul mi caj c chʌn mel pejtel tsa' bʌ cʌlʌ.
34Ma'anic mi caj c ñusan xuc'ul bʌ c t'an.
Ma'anic mi caj c yʌñe' jini tsa' bʌ cʌlʌ.
35Junyajl jach tsa cʌc'ʌ c t'an. Mach c lotic tsa' bʌ c sube David.
36Mi caj i yajñel i p'olbal ti pejtelel ora,
Che'ʌch i ñuclel i yumʌntel che' bajche' jini q'uin am bʌ tic tojel.
37Mi caj i yajñel ti pejtelel ora che' bajche' jini uw.
Xuc'ul mi caj i yajñel che' bajche' jini panchan, che'en lac Yum.
38Pero wʌle c Yum, tsa'ix a cʌyʌ jini yajcʌbil bʌ a cha'an.
Tsa'ix a ts'a'le, tsa'ix a mich'le.
39Tsa'ix a ñusa jini xuc'ul bʌ a t'an tsa' bʌ a wʌq'ue a winic.
Tsa'ix a chilbe i ye'tel rey.
40Tsa'ix a jembe pejtel i ts'ajquil tac i tejclum.
Tsa'ix a jisʌbe jini ts'ajquibil bʌ otot tac i cha'an.
41Pejtel mu' bʌ i ñumelob majlel ti bij mi' xujch'ibeñob i chubʌ'an.
I cʌñʌyo' bʌ mi' tse'tañob.
42Tsa'ix a wʌq'ueyob i p'ʌtʌlel i contrajob cha'an mi' mʌjlel i cha'añob.
Tsa'ix a wʌq'ueyob i tijicñʌyel i pusic'al i contrajob.
43Tsa'ix a puch'be i yej i yespada a winic.
Ma'anic tsa' p'ʌtesa che' ti' yorajlel guerra.
44Tsa'ix a jisʌbe i ñuclel.
Tsa'ix a chocbe i buchlib i yumʌntel ti lum.
45Tsa'ix a ñox'esa a winic che' ch'iton to.
Tsa'ix a wʌc'ʌ ti quisin.
46C Yum, ¿jayp'ejl to q'uin? ¿Mu' ba caj a chʌn muc a bʌ ti pejtelel ora?
¿Mu' ba caj ti chʌn lejmel a mich'ajel che' bajche' c'ajc?
47Ña'tan mach jalijelonic ti pañimil.
¿Chuqui i ye'tel tsa' mele winicob x'ixicob che' mi' laj jilelob?
48¿Am ba p'ʌtʌl bʌ winic mu' bʌ mejlel ti chʌn ajñel ti pañimil?
¿Am ba mach bʌ yujilic chʌmel?
¿Mejl ba i coltan i bʌ cha'an ma'anic mi' chʌmel?
49C Yum, la' tsictiyic a wutslel tsa' bʌ a pʌsʌ wajali.
La' ts'ʌctiyic a t'an tsa' bʌ a wʌq'ue David ti ch'ujul bʌ a c'aba'.
50C Yum, ña'tan a winicob woli bʌ i ts'a'lentelob.
Q'uele bajche' mij cuch cʌ'lentel ti' tojlel pejtelel winicob x'ixicob.
51Come a contrajob woli' yʌ'leñon, jini yajcʌbil bʌ a cha'an.
52La' ch'ujutesʌntic lac Yum ti pejtelel ora. Amén.
Currently Selected:
SALMOS 89: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.