SALMOS 83
83
I contrajob Dios
1Dios, mach yomic ma' to'ol q'uelon lojon.
Mach yomic ñʌch'ʌlet. Mach a tic' a bʌ.
2Come cabʌl woliyob ti t'an a contrajob.
Jini mu' bʌ i ts'a'leñet mi' chañ'esañob i bʌ.
3Mi' temob i t'an ti' contra jini winicob x'ixicob a cha'an.
Mi' tem ña'tañob i contrajin jini cʌntʌbilo' bʌ a cha'an.
4Mi' yʌlob: Conla, la' lac laj jisañob
Cha'an mach chʌn ña'tibilix i lumal Israel, che'ob.
5Come tsi' temeyob i t'an. Jump'ejlob i pusic'al.
Tsi' temeyob i t'an cha'an mi' contrajiñet, c Yum.
6Jini ch'oyolo' bʌ ti Edom yic'ot jini ismaelob,
Yic'ot año' bʌ ti Moab, yic'ot jini agareñob,
7Yic'ot año' bʌ ti Gebal, yic'ot ti Amón, yic'ot ti Amalec,
Yic'ot filisteojob, yic'ot jini chumulo' bʌ ti Tiro
8Tsi' laj much'quiyob i bʌ yic'ot Asiria ja'el.
Tsi' coltayob ti guerra i p'olbalob Lot.
9Laj aq'ueñob wocol che' bajche' tsa' wʌq'ueyob wocol jini año' bʌ ti Madián,
Che' bajche' tsa' wʌq'ueyob wocol Sísara yic'ot Jabín ya' ti pa' i c'aba' Cisón.
10Tsa' jisayob ya' ti Endor.
Tsa' sujtiyob ti abono cha'an lum.
11La' jisʌnticob che' bajche' Oreb yic'ot Zeeb.
La' jisʌnticob che' bajche' Zeba yic'ot Zalmuna.
12Come tsi' lon alʌyob: La' lac chilben i lumal Dios,
Ba' chumulob i cha'año' bʌ, che'ob.
13C Dios, meleyob che' bajche' ts'ubejn mu' bʌ i wejlan sutujt ic',
Che' bajche' i yopol te' mu' bʌ i letsan ic',
14Che' bajche' c'ajc mu' bʌ i pul majlel mate'el,
Che' bajche' tojcʌlel mu' bʌ i pul majlel wits.
15Choco tilel p'ʌtʌl bʌ ic' cha'an ma' wajñesañob.
Bʌc'tesañob ti p'ʌtʌl bʌ ic' a cha'an.
16La' i wen ubiñob quisin
Cha'an mi' sajcañetob c Yum.
17La' i yubiñob quisin. La' i yubiñob bʌq'uen ti pejtelel ora.
La' ts'a'lenticob, la' jilicob.
18La' i ñopob a c'aba' come jatet jach c Yumet lojon.
C'ax ñuquet ti pejtelel pañimil.
Currently Selected:
SALMOS 83: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.