SALMOS 74
74
P'ulchocobil jini Ch'ujul bʌ Ajñibʌl
1Dios, ¿chucoch tsa' junyajlel cʌyʌyon lojon?
¿Chucoch wola' mich'len jini tiñʌme' tac am bʌ ti a jamil?
2Mach mi' ñajʌyel a cha'an a cha'año' bʌ tsa' bʌ a yajca ti wajali, jini mʌmbilo' bʌ a cha'an.
Ña'tan Jerusalén ba' tsa' chumleyet.
3Yom ma' tilel a q'uel ili jejmen bʌ tejclum.
Laj contrajob tsi' jisayob jini ch'ujul bʌ a wajñib.
4Tsi' wajleyob jini Ch'ujul bʌ Ajñibʌl a cha'an.
Tsi' wa'chocoyob i dioste' tac.
5Lajal tsi' meleyob bajche' sec' te'el ti mate'el.
6Ti jacha tsi' lu' jisayob pejtelel jini i t'ojol jax bʌ te' am bʌ i ts'ijbal.
7Tsi' tsuc'uyob c'ajc cha'an mi' pulel jini Ch'ujul bʌ Ajñibʌl a cha'an. Tsi' p'ulchocoyob jubel ti lum.
Tsi' bib'esayob ch'ujul bʌ a wajñib.
8Tsi' yʌlʌyob: Mi caj lac laj jisan chuqui tac mi' yʌc' ti ña'tʌntel Dios, che'ob.
Tsi' puluyob pejtelel i yotot tac Dios ti lac lumal.
9Ma'anix chuqui tsa' cʌle cha'an mi' tsictesan mi a cha'añon lojon. Ma'añobix x'alt'añob.
Ma'anic majqui yujil baqui ora mi caj i lajmel iliyi.
10Dios, ¿jayp'ejl to q'uin mi caj i chʌn cha'len a'leya jini laj contra?
¿Mu' ba caj i chʌn ts'a'libeñet a c'aba'?
11¿Chucoch lotol jach a p'ʌtʌlel?
Pʌsʌ a p'ʌtʌlel. Jisañob.
12Dios, c reyetʌch c'ʌlʌl ti wajali.
C'ʌlʌl wʌle woliyet ti coltaya ti' tojlel winicob x'ixicob.
13Jatet tsa' t'oxo majlel jini colem ñajb.
Jatet tsa' top'beyob i jol ajin ya' ti colem ja'.
14Jatet tsa' jisʌbe i p'ʌtʌlel jini leviatán i yejtal Egipto.
Tsa' bic'tesʌbe i bʌc'tal leviatán. Tsa' wʌq'ue i c'ux colem chʌy.
15Tsa' mele i loq'uib ja', tsa' jambeyon lojon cuxul bʌ ja'.
Tsa' tiquesa colem ja' mach bʌ yujilic tiquin.
16A cha'añʌch q'uiñil yic'ot ac'ʌlel.
Ya' jach ti' yajñib tsa' wʌc'ʌ jini q'uin yic'ot jini uw.
17Jatet tsa' t'oxbeyon lojon lum che' bajche' a wom.
A melbalʌch i yorajlel ticwal yic'ot i yorajlel tsʌñal.
18C Yum, ña'tan bajche' woli' yʌ'leñet laj contra.
Jini tontojo' bʌ woli' ts'a'leñob a c'aba'.
19Che'ʌch añon lojon bajche' x'ujcuts c'uxbibil bʌ a cha'an.
Mach a wʌc'on lojon ba' mi' c'uxon lojon bʌte'el.
Mach ñajʌyic ti a pusic'al ti pejtelel ora jini p'ump'uño' bʌ a cha'an.
20Chʌn ña'tan jini xuc'ul bʌ a t'an,
Come cabʌl mi' p'ojlel jontolil ba' maxto ochemic a t'an.
21Mach a cha' ac'ob ti quisin jini tic'lʌbilo' bʌ.
La' i subob i ñuclel a c'aba' jini p'ump'uño' bʌ yic'ot jini tic'lʌbilo' bʌ.
22Dios, wa'i', subu a bʌ.
Ubin bajche' woli' yʌ'leñetob jini tontojo' bʌ c'ʌlʌl mi' sʌc'an c'ʌlʌl mi' yic'an.
23Mach a ñusʌbeñob i p'ajoñel a contrajob.
Woli' cha'leñob c'am bʌ t'an.
Currently Selected:
SALMOS 74: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.