SALMOS 62

Dios cojach bʌ la caj coltaya

1Ñʌch'ʌlon mi cʌq'uen c bʌ Dios. Jini jach Dios mic jac'ben.

Tilem ti Dios j coltʌntel.

2Cojach Dios xuc'ulʌch bajche' xajlel. Jiñʌch caj Coltaya.

Jiñʌch chan bʌ ts'ajc yilal ba' mi cochel. Ma'anic majqui mi mejlel i tic'lañon ya'i.

3¿Jayp'ejl to q'uin mi caj la' contrajiñon?

Mi la' lon teñon ti la' pejtelel che' bajche' ñʌcʌl jax bʌ bojte' yic'ot c'unix bʌ corral.

4Mi' temob i t'an cha'an mi' chilbeñon c ñuclel.

Mi' mulañob lot. Mi' cha'leñob uts bʌ t'an yilal,

Pero mi' cha'leñob p'ajoñel ti' pusic'al.

5Ti' ñʌch'tilel c pusic'al mi cʌq'uen c bʌ Dios,

Come tilem ti Dios chuqui wolic pijtan.

6Cojach ti Dios mic taj c xuc'tʌlel yic'ot j c'oc'lel. Jiñʌch c Xajlel, caj Coltaya.

Ma'anic majqui mi mejlel i tic'lañon ya' ti' tojlel.

7Cʌyʌlon ti Dios cha'an mic taj j coltʌntel yic'ot c ñuclel.

Lajalʌch Dios bajche' ch'entun ba' mic puts'el cha'an mij coltan c bʌ.

8Winicob x'ixicob, ñopola Dios ti pejtelel ora.

C'ajtibenla Dios ti wocol t'an pejtel chuqui wola' ña'tan ti a pusic'al, come jiñʌch lac puts'ib.

9Lajalob bajche' ic' jini winicob.

Xlotiyajob pejtelel winicob.

Che' añob ti balanza mi' ch'ujyelob. Ñumen sejbob bajche' ic'.

10Mach la' tic'lan la' pi'ʌlob cha'an mi la' chilbeñob i chubʌ'an.

Mach mi la' xujch'iben i chubʌ'an la' pi'ʌlob.

Che' mi' p'ojlel la' chubʌ'an mach mi la' lon ac' ti la' pusic'al.

11Tsi' cha'le t'an Dios.

Cha'yajl tsa cubi iliyi:

I bajñel an i p'ʌtʌlel Dios.

12Jatet jach an i yutslel a pusic'al, c Yum,

Come ma' wʌq'ueñob i chobejtʌbal winicob x'ixicob che' bajche' an i ye'tel ti jujuntiquil.

Currently Selected:

SALMOS 62: ctuBI

Highlight

Copy

Popular Bible Verses from
SALMOS 62