SALMOS 145
145
Mach lu' cʌmbilic i ñuclel Dios yic'ot i yutslel
1Mi caj c sub a ñuclel, Dios. C Reyet.
Mi caj c ch'ujutesan a c'aba' ti pejtelel ora.
2Ti jujump'ejl q'uin mi caj c ch'ujutesañet.
Mi caj c sub i ñuclel a c'aba' ti pejtelel ora.
3Wen ñuc lac Yum. La' sujbic i ñuclel.
Ma'anic i p'isol i ñuclel.
4Winicob x'ixicob mi caj i subeñob i yalobilob wen ñuc a melbal.
Mi caj i subeñob bajche' tsa' pʌsbeyob i yejtal tac a p'ʌtʌlel.
5Mi caj c chʌn ña'tan i t'ojol jax ba' buchulet ti ñuc bʌ a we'tel.
Uts'atax a melbal.
6Ti pejtelel pañimil mi caj i subob cabʌl jax a p'ʌtʌlel, bʌbʌq'uen a melbal.
Joñon ja'el mi caj c sub wen ñuquet.
7Winicob x'ixicob mi caj i subob uts'atax a pusic'al.
C'am mi caj i c'ʌyiñet cha'an tojet.
8Uts lac Yum, wen yujil p'untaya.
Jal mi' mich'an. C'ux mi' yubiñonla.
9Lac Yum mi' pʌsbeñob i yutslel i pusic'al pejtel winicob x'ixicob.
Mi' p'untañob come laj i melbalʌch.
10C Yum, pejtelel a melbal mi caj i tsictesan a ñuclel.
Pejtel jini ch'ujulo' bʌ a cha'an mi caj i ch'ujutesañet.
11Mi caj i subob wen ñuc a yumʌntel,
Cabʌl a p'ʌtʌlel.
12Mi caj i subeñob i yalobilob jini ñuc bʌ a melbal,
Yic'ot i t'ojlʌwel a yumʌntel ya' ba' buchulet ti ñuc bʌ a we'tel.
13Mach jilic a yumʌntel. An ti pejtelel ora.
An a yumʌntel ti wajali yic'ot ti pejtelel ora.
14C Yum, ma' wʌq'ueñob i p'ʌtʌlel pejtel mu' bʌ i yajlelob.
Ma' tijicñesʌbeñob i pusic'al jini ch'ijiyemo' bʌ.
15Ti pejtelelob mi' pijtañet.
Ma' wʌq'ueñob i bʌl i ñʌc' che' ti' yorajlel.
16Mach chʌquetic. Mi' ñaj'añob pejtel jini cuxulo' bʌ.
17Toj lac Yum ti pejtelel chuqui tac mi' mel.
Tsiquil i yutslel ti pejtelel i melbal.
18Lʌc'ʌl an lac Yum ti' tojlel pejtel mu' bʌ i pejcañob ti pejtelel i pusic'al.
19Mi' yʌq'ueñob chuqui yomob jini mu' bʌ i c'uxbiñob Dios.
Mi' yubibeñob i t'an che' mi' pejcañob. Mi' coltañob.
20Lac Yum mi' cʌntan pejtel mu' bʌ i c'uxbiñob.
Mi caj i jisan pejtel jini jontolo' bʌ.
21Joñon mi caj c sub i ñuclel lac Yum.
La' i ch'ujutesañob Dios pejtel winicob x'ixicob.
Ch'ujul i c'aba' wʌle yic'ot ti pejtelel ora.
Currently Selected:
SALMOS 145: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.