SALMOS 139
139
Ma'anic i p'isol i ña'tibal Dios
1C Yum, tsa' wen q'ueleyon. Cʌmbiloñʌch a cha'an.
2Awujil che' mic buchtʌl yic'ot che' mic wa'tʌl.
Ma' lu' cʌmbeñon c pusic'al che' ñajt añon.
3Ma' q'uelon che' mic majlel ti bij yic'ot che' mij c'aj co tic wʌyib.
Cʌñʌl a cha'an pejtel c melbal.
4Che' max to loquemic c t'an ti quej, a wujilix chuqui mi caj c sub.
5Joyolon a cha'an. Ma' tic'on, ma' coltañon.
Cʌntʌbilon ti a p'ʌtʌlel.
6Ma'anic i p'isol j coltʌntel. Mach mejlic c laj cʌn.
Wen ñuc, mach mejlic c ch'ʌmben isujm.
7¿Mejl ba c majlel ba' mach i tajayonic a wEspíritu?
¿Mejl ba c puts'tañet?
8Mi com letsel majlel ti panchan, ya' añet.
Mi com wʌyel ti' yajñib chʌmeno' bʌ, ya' añet ja'el.
9Mi com wejlel majlel ti ñajtʌl ba' mi' pasel q'uin
Cha'an mic chumtʌl ya' ti junwejl ñajb
10Mi caj a toj'esañon majlel ya'i.
Mi caj a chucon ti p'ʌtʌl bʌ a c'ʌb.
11Mi tsac lon alʌ: Tsa'ix ochiyon ti ic'yoch'an bʌ pañimil,
Mach i q'ueleyonic ti ac'ʌlel, cho'on, c lotʌch, come ma' q'uelon ti ac'ʌlel.
12Jini ic'yoch'an bʌ pañimil ma'anic mi' mʌctʌbeñet a wut.
Lajal ma' q'uel ac'ʌlel che' bajche' q'uiñil.
Lajal mi' c'otel a wut ti ic'yoch'an bʌ che' bajche' ti q'uiñil.
13Pejtel chuqui tac an tic malil a melbalʌch.
Tsa' meleyon che' añon to ti' ñʌc' c ña'.
14Mic sub a ñuclel come bʌc'ñʌbilet. Uts'atax tsa' meleyon.
Uts'atax a melbal. Cʌñʌlʌch c cha'an iliyi.
15Mach mʌcbilic c bʌquel ti a wut, che' cʌntʌbilon i cha'an c ña'.
Cha'an ti cabʌl a ña'tʌbal tsa' techeyon ti colel ti mucul jach.
16Tsa' wʌn ña'ta bajche' an quejtal che' maxto añonic.
Ts'ijbubilix ti a jun jayp'ejl to tsic mi caj cajñel ti pañimil.
17Wen uts'atax bajche' ma' ña'tañon, c Dios.
Mach tsicbilic jayyajl ma' ña'tañon ti jujump'ejl q'uin.
18Mi tsac ñopo c tsic ñumen on ti tsic bajche' jini ji'.
Che' mic ch'ojyel ti wʌyel, añon a wic'ot.
19Muq'uic a tsʌñsan jini jontolo' bʌ,
Mux i puts'elob tic tojlel jini yujilo' bʌ tsʌnsa.
20Jini mu' bʌ i contrajiñet ti maña jax bʌ t'an,
Mi' lon chañ'esan i bʌ.
21¿Mach ba yomic mic ts'a'len jini mu' bʌ i ts'a'leñet c Yum?
¿Mach ba ch'ijiyemic c pusic'al che' mi' ñusañet?
22Mic ts'a'len ti pejtelel c pusic'al.
J contrajobʌch jini a contrajob.
23Tsajiñon, Dios. Q'uelbeñon c pusic'al. Cʌmbeñon c pensar.
24Q'uele mi an c sajtemal.
Pʌyʌyon majlel ti' bijlel j cuxtʌlel mach bʌ anic mi' jilel.
Currently Selected:
SALMOS 139: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.