SALMOS 118
118
Wocolix i yʌlʌ lac Yum mu' bʌ i coltañonla
1Aq'uenla wocolix i yʌlʌ lac Yum, come uts'at lac Yum.
Ti pejtelel ora an i yutslel i pusic'al.
2La' i yʌlob jini israelob:
Ti pejtelel ora an i yutslel i pusic'al.
3La' i yʌlob i yalobilob Aarón:
Ti pejtel ora an i yutslel i pusic'al.
4La' i yʌlob jini mu' bʌ i ch'ujutesañob lac Yum:
Ti pejtelel ora an i yutslel i pusic'al.
5Che' bʌ tsa cubi wocol tsac pejca lac Yum.
Tsi' jac'beyon, tsi' yʌc'ʌyon ti colel.
6Lac Yum an quic'ot.
Ma'anic mi caj c bʌc'ñan chuqui mi' tumbeñoñob winicob.
7Lac Yum mi' yajñel quic'ot. Mi' yʌq'ueñon c p'ʌtʌlel.
Mi caj j q'uel i jilibal jini mu' bʌ i ts'a'leñon.
8Yom mi lac xuc'chocon lac pusic'al yic'ot lac Yum.
Mach yomic mi la cʌc' lac pusic'al yic'ot winicob.
9Yom mi lac xuc'chocon lac pusic'al ti' wenta lac Yum.
Mach yomic mi la cʌc' lac pusic'al ti' wenta yumʌlob.
10Jini sajtemo' bʌ ti jujumpejt tejclum tsi' joyoyoñob.
Tsac t'uchtayob ti' c'aba' lac Yum.
11Tsi' joyoyoñob. Isujm, joyolon i cha'añob,
Pero tsac t'uchtayob ti' c'aba' lac Yum.
12Jomjomñayob tic t'ejl che' bajche' i chʌñil chab.
Colel i pulon che' bajche' ch'ix woli bʌ ti lejmel tic joytilel.
Ti' c'aba' c Yum tsac bajbeyob jubel.
13Wen ñet'elon, colel c yajlel,
Pero lac Yum tsi' loc'sayon.
14Lac Yum c p'ʌtʌlelʌch. Jiñʌch mu' bʌ j c'ʌyin.
Jiñʌch xcoltaya c cha'an.
15Ubinla jini tijicña bʌ t'an ti' chumlib jini tojo' bʌ
Come tsa' mʌjliyob i cha'an ti' p'ʌtʌlel lac Yum.
16Wen ñuc i p'ʌtʌlel lac Yum.
Cha'an ti' p'ʌtʌlel lac Yum mi' mʌjlel lac cha'an.
17Ma'anic mi caj c chʌmel. Mi caj j cuxtiyel.
Mi caj c sub i melbal lac Yum.
18Lac Yum tsi' wen ju'sʌbeyon c pusic'al ti wocol,
Pero ma'anic tsi' yʌc'ʌyon ti chʌmel.
19Jambeñon i puertajlel Templo ya' ba' mi' yochelob jini tojo' bʌ,
Cha'an mi cochel cʌq'uen wocolix i yʌlʌ lac Yum.
20Jiñʌch i puertajlel lac Yum ba' mi' cajelob ti ochel jini tojo' bʌ.
21Mic subeñet wocolix a wʌlʌ come tsa' jac'beyon.
Tsa' ochiyet ti caj coltaya.
22Jini xajlel ts'a'lebil bʌ i cha'an xmel ototob
Tsa'ix otsʌnti ti' xujc otot.
23Jiñʌch i melbal lac Yum. Uts'atax mi laj q'uel.
24Ili tsic i melbalʌch lac Yum.
La' la cubin tijicña. Yom tijicña mi laj q'uel.
25C Yum, awocolic, coltañon lojon.
Awocolic c Yum, la' loq'uic ti uts'at chuqui mic mel lojon.
26Tijicña jini mu' bʌ i tilel ti' c'aba' lac Yum.
Wʌ' ti a wotot, c Yum, mi cʌq'ueñet lojon i yutslel c t'an.
27Jiñʌch Dios lac Yum. Tsi' yʌc'ʌ i sʌclel pañimil ti lac pusic'al.
Cʌchʌla jini tsʌnsʌbil bʌ i majtan ti ch'ajan wʌ' ti' xulub pulʌntib.
28Jatet c Dioset, mi caj c subeñet wocolix a wʌlʌ.
C Dios, mi caj c pʌs a ñuclel.
29Subenla wocolix i yʌlʌ lac Yum, come uts'at lac Yum.
Ti pejtelel ora an i yutslel i pusic'al.
Currently Selected:
SALMOS 118: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.