SALMOS 115
115
Dios yic'ot dioste' tac
1Tsictesan i ñuclel a c'aba', c Yum,
Mach cha'anic mij q'uejlel lojon ti ñuc, pero cha'an ma' q'uejlel ti ñuc.
Cha'an cabʌl a c'uxbiya, wen xuc'ulet.
2¿Chucoch mi' lon alob jini sajtemo' bʌ:
¿Bacan tsiquil i Dios? che'ob?
3Ya'ʌch an lac Dios ti panchan.
Mi' mel chuqui jach yom i pusic'al.
4I diostac sajtemo' bʌ, i melbalob jach winicob.
Mi' melob ti sʌsʌc taq'uin yic'ot c'ʌnc'ʌn taq'uin.
5An i yej, pero mach yujilic t'an.
Canal i wut, pero ma'anic chuqui mi' q'uel.
6An i chiquin, pero ma'anic mi' yubin t'an.
An i ñi', pero ma'anic chuqui mi' sic'.
7An i c'ʌb, pero ma'anic mi' ñijcan.
An i yoc, pero mach yujilic xʌmbal.
Ma'anic mi' loq'uel t'an ti' bic'.
8Pejtel mu' bʌ i melob dioste', mu' bʌ i ñopob, junlajalob yic'ot.
9Jatetla, israelob, ñopola lac Yum.
Jiñʌch la' p'ʌtʌlel, jiñʌch la' mʌctʌjib.
10Jatetla i yalobilet bʌ la Aarón, ñopola lac Yum.
Jiñʌch la' waj coltaya, la' mʌctʌjibʌch.
11Jatetla mu' bʌ la' bʌc'ñan lac Yum, ñopola lac Yum.
Lac p'ʌtʌlelʌch, lac mʌctʌjibʌch.
12Woli' ña'tañonla lac Yum. Mi caj i yʌq'ueñonla i yutslel i t'an.
Mi caj i yʌq'ueñob i yutslel i t'an israelob
Yic'ot i yalobilob Aarón.
13Lac Yum mi caj i yʌq'ueñob i yutslel i t'an jini mu' bʌ i c'uxbiñob,
Jini ch'o'ch'oco' bʌ yic'ot jini ñuco' bʌ.
14La' i p'ojlesañetla yic'ot la' walobilob.
15Lac Yum tsa' bʌ i mele panchan yic'ot pañimil woli' yʌq'ueñetla i yutslel i t'an.
16Lac Yum i yumʌch panchan.
Pero tsi' yotsa pañimil ti' wenta winicob x'ixicob.
17Jini chʌmeño' bʌ ma'anix mi' subob i ñuclel lac Yum wʌ' ti pañimil, come ñʌch'ʌlob ti mucoñibʌl.
18Pero joñonla mi mejlel lac sub ti ñuc lac Yum wʌle yic'ot ti pejtelel ora.
¡Aleluya!
Currently Selected:
SALMOS 115: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.