SALMOS 107
107
LIBRO V
Dios mi' loc'san ti wocol
1Subenla wocolix i yʌlʌ lac Yum, come uts'at lac Yum,
Come mach jilic i yutslel ti pejtelel ora.
2La' i yʌlob jini mʌmbilo' bʌ i cha'an lac Yum, tsa' bʌ loq'uiyob ti' c'ʌb i contra.
3Tsi' tempayob tilel
Loq'uemo' bʌ ba' mi' pasel q'uin, yic'ot ba' mi' bʌjlel q'uin, yic'ot ti norte, yic'ot ti sur.
4Tsi' pam cha'leyob ñumel xʌmbal ti jochol bʌ lum.
Ma'anic tsi' tajayob ba' mi' cha'leñob chumtʌl.
5Cabʌl tsi' yubiyob wi'ñal yic'ot tiquin ti'.
P'ump'uñob tsi' yubiyob.
6Che' woliyob ti wocol tsi' pejcayob lac Yum ti wocol t'an.
Jini tsi' pʌyʌyob loq'uel ti wocol.
7Tsi' pʌyʌyob majlel ti toj bʌ bij
Cha'an mi' tajob tejclum ba' uts'at mi' chumtʌlob.
8La' lac suben wocolix i yʌlʌ lac Yum cha'an i yutslel,
Cha'an ñuc bʌ i melbal mu' bʌ i pʌsbeñonla.
9Come mi' yʌq'uen ja' jini am bʌ i tiquin ti'.
Mi' yʌq'uen chuqui uts'at jini am bʌ i wi'ñal cha'an mi' tijicñesʌben i ch'ujlel.
10Lamital tsa' ajniyob ti ic'yoch'an bʌ pañimil ba' wen ch'ijiyem.
Cʌchbilob ti cadena tac woliyob ti wocol
11Come tsi' ñusʌbeyob i mandar Dios.
Tsi' ts'a'lebeyob i t'an jini C'ax Nuc Bʌ.
12Jini cha'an tsi' ju'sʌbeyob i pusic'al ti e'tel.
Tsa' yajliyob. Ma'anic majqui tsi' coltayob.
13Tsa' caji' pejcañob lac Yum ti wocol t'an che' woliyob ti wocol.
Tsi' coltayob loq'uel ti wocol.
14Tsi' pʌyʌyob loq'uel ti ic'yoch'an bʌ pañimil ba' bʌbʌq'uen mi' chʌmelob.
Tsi' bic'ti ts'ocbeyob i cadena.
15La' lac suben wocolix i yʌlʌ lac Yum cha'an i yutslel,
Cha'an ñuc bʌ i melbal mu' bʌ i pʌsbeñonla.
16Come tsi' jeme jini puerta tac melbil bʌ ti chʌchʌc taq'uin,
Yic'ot jini bara tac melbil bʌ ti fierro.
17Jini tontojo' bʌ mi' tajob wocol cha'an i jontolil.
Tsa' aq'uentiyob wocol cha'an i mul.
18Tsi' ts'a'leyob i bʌl i nʌc', colel i chʌmelob.
19Che' woli' yubiñob wocol tsi' pejcayob lac Yum ti wocol t'an.
Tsi' pʌyʌyob loq'uel ti' wocol.
20Lac Yum tsi' choco majlel i t'an cha'an mi' lajmesañob. Tsi' coltayob.
21La' lac suben wocolix i yʌlʌ lac Yum cha'an i yutslel,
Cha'an ñuc i melbal mu' bʌ i pʌsbeñonla.
22La' la cʌq'uen Dios wocolix i yʌlʌ yic'ot tsʌnsʌbil bʌ i majtan.
La' lac sub i melbal ti' tijicñʌyel lac pusic'al.
23Winicob mi' cha'leñob xʌmbal ti barco tac ya' ti colem ñajb
Cha'an mi' cha'leñob mʌñoñel choñoñel ti ñajtʌl.
24Jini winicob mi' q'uelbeñob i melbal lac Yum,
Jini ñuc tac bʌ i melbal ti tam bʌ ñajb.
25Mi' tejchel p'ʌtʌl bʌ ic' cha'an ti' mandar lac Yum.
Mi' wec'ulan jini ja' c'ʌlʌl ti tocal.
26Wen chan mi' cha' jubel.
Tsiltsilñayob ti bʌq'uen cha'an wocol.
27Ticlaw mechlawob tsi' meleyob i bʌ che' bajche' xyʌc'ajel.
Tsa' toj sajtiyob i pusic'al.
28Che' woli' yubiñob wocol tsi' pejcayob lac Yum ti wocol t'an.
Tsi' pʌyʌyob loq'uel ti wocol.
29Tsi' ñʌch'tesa jini p'ʌtʌl bʌ ic', tsa' lajmi.
Tsi' tiq'ui jini wʌlwʌlña bʌ ja', tsa' ñʌjch'i.
30Tijicñayobix jini p'ump'uño' bʌ come ñʌch'ʌlix.
Lac Yum tsi' pʌyʌyob majlel ba' yomob c'otel.
31La' lac suben wocolix i yʌlʌ lac Yum cha'an i yutslel,
Cha'an jini ñuc bʌ i melbal mu' bʌ i pʌsbeñonla.
32La' lac ñuq'uesan Dios ti' tojlel jini tempʌbilo' bʌ come ñuc lac Yum.
La' lac sub i ñuclel ti' tojlel jini año' bʌ i ye'tel.
33Dios mi' tiquesan jini colem ja'.
Mi' sutq'uin ti tiquin lum ya' ba' tsa' ajni cuxul bʌ ja'.
34Mi' sutq'uin ti pujch'em bʌ lum jini wen bʌ lum,
Cha'an i jontolil jini ya' bʌ chumulob.
35Mi' sutq'uin jini tiquin lum ti wen bʌ lum.
Mi' yʌc' ti loq'uel cuxul bʌ ja' ti tiquin lum.
36Ya'i mi' yotsañob ti chumtʌl jini woli bʌ i yubiñob wi'ñal.
Mi' wa'chocoñob tejclum ba' mi' chumtʌlob.
37Mi' pʌc'ob cholel yic'ot ts'usubil.
Mi' tajob on bʌ i cuch i cholob.
38Mi' p'ojlelob cha'an ti' yutslel i t'an lac Yum.
Ma'anic mi' to'ol chʌmel i wacax.
39Pero an i tajol mi' jilelob yic'ot wocol
Che' mi' ju'sʌbentelob i pusic'al ti wocol yic'ot i ch'ijiyemlel.
40Dios mi' ts'a'len yumʌlob.
Mi' yʌc'ob ti xʌmbal ñumel ti jochol lum ba' ma'anic bij.
41Pero mi' loc'san ti wocol jini p'ump'uño' bʌ. Mi' melob ti ñuc.
Mi' p'ojlesʌbeñob i yalobilob.
42Jini tojo' bʌ winicob mi' caj i lu' ña'tañob iliyi.
Mi' caj i ñuc'añob i pusic'al.
Pejtelel mu' bʌ i cha'leñob jontolil mi caj i yubiñob quisin.
43Jini am bʌ i ña'tʌbal la' i ña'tan iliyi.
Che' jini mux i ch'ʌmben isujm cabʌlʌchix i yutslel lac Yum.
Currently Selected:
SALMOS 107: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.