SALMOS 102
102
I yoración jini tic'lʌbil bʌ
1C Yum, ubibeñon coración. La' c'otic c t'an ba' añet.
2Mach ma' mʌybeñon a wut come woli cubin wocol.
Ñich'tʌbeñon c t'an.
Che' mic pejcañet yom ma' bʌc' jac'beñon.
3Tomocña mi' sʌc jilel j q'uiñilel che' bajche' buts'.
Woli' jilel c bʌc'tal che' bajche' xutunte' woli bʌ ti pulel.
4C'unix pañimil. Tsa'ix wen tiqui c pusic'al che' bajche' tiquin bʌ jam.
Mach chʌn comix waj cha'an ch'ijiyem c pusic'al.
5Ma'anix c bʌc'tal, to'ol c bʌquel jax yic'ot c pʌchʌlel, cha'an cabʌl tsic pusic'al.
6Añon tic bajñelil che' bajche' te'lemut mu' bʌ i yajñel ti jochol bʌ lum.
Lajalon bajche' xcuj t'uchul bʌ ti' jol joch otot.
7Mach mejlicon ti wʌyel.
Lajalon bajche' xpuruwoc t'uchul bʌ ti' jol otot ti' bajñelil.
8Ti jujump'ejl q'uin mi' wajleñoñob jini j contrajob.
Mi' p'ajoñob jini mu' bʌ i mich'leñoñob.
9Wolij c'ux i tʌñil c'ajc yubil, i wenta c waj.
Xʌbʌl wolic jap yic'ot i ya'lel c wut.
10Come wen mich'et.
Tsa' techeyon, tsa' cha' chocoyon jubel.
11Ora jach mi' ñumel j q'uiñilel.
Mi' tam'an axñal tic pusic'al yilal che' bajche' ti och'ajel q'uin.
12C Yum buchulet ti a yumʌntel ti pejtelel ora.
Mi caj i chʌn sujbel a ñuclel ti pejtelel ora.
13Mi caj a ch'ojyel a p'untan Sion, jini ch'ujul bʌ tejclum.
Come i yorajlelix ma' pʌsben a wutslel.
Isujm tsa'ix juli i yorajlel wʌn ña'tʌbil bʌ a cha'an.
14A winicob mi' c'uxbiñob i xajlelal Sion.
Ch'ijiyemob i pusic'al cha'an i ts'ubeñal jini jejmen tac bʌ otot.
15Che' ma' p'untan Sion mi caj i bʌc'ñañob i c'aba' lac Yum jini mach bʌ i cha'añobic Dios.
Pejtel jini yumʌlob ti pañimil mi caj i bʌc'ñañetob cha'an a ñuclel.
16Lac Yum mi caj i cha' mel Sion.
Mi caj i pʌs i bʌ yic'ot i ñuclel.
17Mi' jac'beñob i yoración jini p'ump'uño' bʌ,
Ma'anic mi' ñusʌbeñob i t'an.
18La' ochic ti jun iliyi cha'an mi' q'uelob la calobilob.
Jini maxto bʌ anic tsi' yilayob pañimil mi caj i subob i ñuclel lac Yum.
19Lac Yum am bʌ ti ch'ujul bʌ i yajñib ti panchan tsi' q'uele winicob x'ixicob ti pañimil.
20Tsa'ix i yubibeyob i yajcʌn jini ñup'ulo' bʌ.
Tsa'ix i ña'ta i yʌc'ob ti libre jini woli bʌ i chʌmelob.
21Winicob x'ixicob mi caj i tsictesañob i ñuclel lac Yum ya' ti Sion.
Mi caj i subob i ñuclel lac Yum ya' ti Jerusalén
22Che' tempʌbilob tilel jini loq'uemo' bʌ ti cabʌl tejclum tac
Cha'an mi' ch'ujutesañob lac Yum.
23Lac Yum tsi' jisa c p'ʌtʌlel ti ojlil bij yubil.
Tsa'ix i com'esʌbeyon j q'uiñilel.
24Tsac sube: C Dios, mach a pʌyon majlel che' maxto ñoxonic.
Cuxulet ti pejtelel ora. Junlajalet ti' tojlel calobilob lojon yic'ot i yalobilob ti lajm ti lajm.
25Ti oñiyi tsa' wa'choco jini pañimil,
Jini panchan i melbalʌch a c'ʌb.
26Mi caj i jilel pero chʌn cuxulet.
Mi' caj ti tsuculiyel che' bajche' bujcʌl.
Mi caj i q'uextiyel che' bajche' mi laj q'uextan lac bujc.
Mi' caj ti yʌjñel.
27Mach che'iquet, mach a wujilic ñox'an.
Mach jiliquet ti pejtelel ora.
28Xuc'ul mi' cajelob ti chumtʌl i yalobilob a winicob.
Mi caj a coltañob.
Currently Selected:
SALMOS 102: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.