PROVERBIOS 2
2
Taja a ña'tʌbal
1Calobil, ch'ujbibeñon c t'an. Jac'ʌ c mandar ti a pusic'al 2cha'an ma' taj a ña'tʌbal. Cha'len wersa cha'an ma' ch'ʌmben isujm. 3C'ajtin ti wocol t'an a ña'tʌbal. Mi ti pejtelel a pusic'al a wom a ch'ʌmben isujm, 4c'uxbin a cʌntesʌntel che' bajche' plata. Cha'len wersa a taj che' bajche' chubʌ'añʌl letsem bʌ i tojol. 5Che' jini mux caj a ch'ʌmben isujm bajche' yom ma' bʌc'ñan lac Yum. Mux caj a cʌn Dios.
6Come lac Yum mi' yʌq'ueñonla wen bʌ lac ña'tʌbal yic'ot laj cʌntesʌntel. Mi' yʌq'ueñonla laj cʌmben i sujmlel i t'an. 7Lac Yum mi' chajpʌbeñob i wenlel jini tojo' bʌ. Mi' cʌntañob cha'an uts'at i melbalob. 8Mi' p'is ti' wenta bajche' mi' yujtel meloñel cha'an mi' coltan jini toj bʌ. Mi' chʌcʌ q'uel i cha'año' bʌ mu' bʌ i melob chuqui wen. 9Che' jini mux caj a cʌn jini toj bʌ i pusic'al yic'ot toj bʌ i t'an yic'ot toj bʌ i melbal. Mux caj a mel pejtel chuqui tac wen. 10Che' jini mi' caj ti p'ojlel wen bʌ a ña'tʌbal ti a pusic'al. Tijicña mi caj a wubin a cʌntesʌntel. 11Che' jini mi caj a cʌntʌntel cha'an wen bʌ a pusic'al, cha'an tsa' ch'ʌmbe isujm, 12ame a ñopben i melbal jontolo' bʌ, ame a jac'beñob i t'an jini xlotiyajob. 13Mi' cʌyob toj bʌ i melbal cha'an mi' ñopbeñob i melbal jini año' bʌ ti ic'ch'ipan bʌ pañimil. 14Mi' lon tajob i tijicñʌyel i pusic'al ti' melol mulil. Mi' tajob i ñuclel i pusic'al ti quisintic jax bʌ i melbal. 15C'ochometel i bijlel, cabʌl i sajtemal.
16Mux a cʌntʌntel ame a jac'ben jini x'ixic am bʌ i maña, mu' bʌ i pejcañet ti uts bʌ t'an. 17Jini x'ixic mi' cʌy i ñoxi'al tsa' bʌ i pʌyʌ che' bʌ xch'oc to. Mi' ñajʌyel ti' pusic'al chuqui tsi' yʌlʌ ti' tojlel Dios che' bʌ tsi' cha'le ñujpuñijel yic'ot i ñoxi'al. 18Jini mu' bʌ i jijlel ti' yotot mi' sajtel. Jini mu' bʌ i yochel i pi'len mi' chʌmel. 19Ma'anix mi' chʌn ña'tañob pañimil jini mu' bʌ i pi'leñob. Ma'anix mi' xʌñob i bijlel laj cuxtʌlel.
20Jini cha'an wersa yom ma' xʌn majlel jini wen bʌ bij. Yom ma' mel bajche' mi' melob jini tojo' bʌ. 21Come jini tojo' bʌ mi caj i chʌn ajñelob ti' lumal. Jini mach bʌ añobic i mul xuc'ul mi' cajelob ti chumtʌl. 22Mach che'ic jini xmulilob. Mi caj i chojquelob loq'uel ti' lumal. Mi caj i jilelob xñusa t'añob.
Currently Selected:
PROVERBIOS 2: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.