PROVERBIOS 1
1
Cabʌl i c'ʌjñibal ili t'an
1Jiñʌch i subal Salomón i yalobil David, i rey jini israelob: 2Cha'an mi' yʌq'ueñonla wen bʌ lac ña'tʌbal yic'ot laj cʌntesʌntel, cha'an mi lac ch'ʌmben isujm toj bʌ t'an, 3cha'an mi lac ñop bajche' yom mi lac mel, cha'an mi' toj'an lac pusic'al yic'ot lac t'an yic'ot lac melbal. 4La' i yubiñob jini maxto bʌ cʌntesʌbilobic cha'an mi' julelob i pusic'al. La' i p'isob ti' wenta jini ch'iton winicob cha'an mi' cʌntañob i bʌ. 5Ubinla jini t'an pejteletla anix bʌ la' pusic'al. Che' jini mux i yutsi p'ojlel la' ña'tʌbal. Jini weño' bʌ i ña'tʌbal mi caj i yotsañob ti' pusic'al i cʌntesʌntel 6cha'an mi' ch'ʌmbeñob isujm ili t'an yic'ot lajiya tac, i subal jini año' bʌ i pusic'al yic'ot i sujmlel mucul tac bʌ ti pañimil. 7Jiñʌch i cajibal lac ña'tʌbal che' mi lac bʌc'ñan lac Yum. Jini tontojo' bʌ ts'a' mi' yubiñob i cʌntesʌntel yic'ot i tic'ol.
Mach a ñop jontolil
8Calobil, ch'ujbiben i cʌntesa a tat. Mach a cʌy a jac'ben i mandar a ña'. 9Come a t'ojlʌwib yilal mi tsa' jac'beyob, come jiñʌch i ch'ʌjlil a jol yic'ot a wuj yilal.
10Calobil, mi yomob i pʌyet ti mulil xmulilob, mach ma' jac'beñob. 11Cʌntan a bʌ che' mi subeñetob: Conla. La' lac chijtan jini mu' bʌ caj lac tsʌnsan. 12La' lac bʌc' tsʌnsan ti mucul jach. Mi caj i lon ña'tañob i pi'ʌlob yilol jach tsa' chʌmiyob che' c'oc'ob to. 13Mux lac chilbeñob pejtel letsem tac bʌ i tojol. Mux lac but' la cotot ti lac xujch'. 14Conla. Yom ajniquet quic'ot lojon. Lac tem cha'an jach chuqui mi lac taj, che'ob.
15Calobil, mach ma' pi'leñob majlel. Mach ma' ñop a mel che' bajche' mi' melob. 16P'ip'atax i pusic'al ti jontolil. Ora jach yomob tsʌnsa. 17Lolom jach mi la cʌc' yac ba' mi' q'uejlel. Mach chujquic te'lemut mi tsi' q'uele. 18Pero jini mu' bʌ i ñopob tsʌnsa mi' yʌc'ob i bʌ ti tsʌnsʌntel. Mi' yʌc' i bʌ ti chujquel jini mu' bʌ i ña'tan i chuc i pi'ʌlob. 19Junlajal mi' jilelob pejtel yujilo' bʌ xujch'. Cha'an ti' caj i xujch'ob mi' chʌmelob.
20Jini mach bʌ anic i p'isol i ña'tʌbal mi' cha'len t'an ti calle tac. Mi' yubibentel i t'an ti bij. 21Mi' cha'len t'an ti choñoñibʌl yic'ot ti melobʌjʌl. Ya' ti' ti' tejclum mi' yubintel i t'an: 22Jatetla maxto bʌ anic la' pusic'al, ¿jayp'ejl to q'uin chʌn alʌlet to la? Jatetla mu' bʌ la' cha'len wajleya, ¿jayp'ejl to q'uin chʌn tijicñayetla ti wajleya? Jatetla tontojet bʌ la, ¿jayp'ejl to q'uin mi caj la' ts'a'len la' cʌntesʌntel? 23Sutq'uin la' bʌ cha'an mi la' ñop c t'an cha'an mi la' jac' la' tic'ol. La' wilan, mi caj cʌq'ueñetla quEspíritu. Mi caj cʌq'ueñetla la' cʌn c t'an. 24Anix ora wolic chʌn pʌyetla tilel pero tsa' la' ñusʌbeyon c t'an. Tsac pejcayetla ti wocol t'an pero ma'anic majch tsi' p'isi ti' wenta. 25Tsa' la' ñusa pejtel j cʌntesʌbal. Ma'anic tsa' la' jac'ʌ la' tic'ol che' bʌ tsac tiq'uiyetla. 26Jini cha'an joñon ja'el mi caj c cha'len tse'ñal che' ti' yorajlel la' wocol. Mi caj c wajleñetla che' woliyetla ti bʌq'uen. Che' bajche' mi' bʌc' tejchel p'ʌtʌl bʌ ic', che' ja'el mi caj i tajetla wocol. 27Che' bajche' sutujt ic', mi caj i tilel la' jisʌntel. Mi caj i tejchel la' ch'ijiyemlel yic'ot cabʌl la' wocol. 28Ti jim bʌ ora mi caj i pejcañoñob, pero ma'anic mi caj c jac'beñob. Mi caj i wersa sʌclañoñob. Mach i tajayoñobic.
29Come tsi' ts'a'leyob j cʌntesʌbal. Ma'anic tsi' yʌc'ʌyob ti' pusic'al cha'an mi' bʌc'ñañob i Yum. 30Ma'anic tsi' jac'ʌyob c t'an. Tsi' ñusayob i tic'ol che' bʌ tsac tiq'uiyob. 31Jini cha'an mux i yʌq'uentelob i chobejtʌbal cha'an i melbalob. Mux i junyajlel cʌytʌlob yic'ot i jontolil. 32Come i sajtemal jini tontojo' bʌ mi caj i tsʌnsañob. Jini lon xuc'ulo' bʌ i pusic'al cha'an i chubʌ'an mi caj i jilelob. 33Pero jini mu' bʌ i ch'ujbibeñon c t'an ma'anic chuqui mi caj i bʌc'ñan. Mach talic i wocol. Mach yujilic bʌq'uen. Che'ʌch mi' cha'len t'an jini am bʌ i ña'tʌbal mach bʌ anic i p'isol.
Currently Selected:
PROVERBIOS 1: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.