PROVERBIOS 13
13
1Jini ch'iton am bʌ i pusic'al mi' yubiben i cʌntesa i tat. Jini sts'a'leya ma'anic mi' jac' i tic'ol. 2Jini mu' bʌ i cha'len cʌntesa ti uts'at tijicñayʌch cha'an i chobejtʌbal i ye'tel. Jini mu' bʌ i cha'len jontolil tijicña cha'an i jontolil. 3Jini mu' bʌ i cʌntan i yej mi' cʌntan i cuxtʌlel. Jini mu' bʌ ti putun t'an mi caj i yubin wocol. 4Jini ts'ubo' bʌ ma'anic mi' tajob chuqui yom i pusic'al. Jini bʌxo' bʌ on mi' tajob chuqui tac yomob. 5Jini tojo' bʌ mi' ts'a'leñob lot, pero jini jontolo' bʌ quisintic jax chuqui tac mi' melob. 6Cʌntʌbilob jini tojo' bʌ ti toj bʌ i bijlel, pero mi caj i jilelob jini i xmulilob cha'an i jontolil. 7An mu' bʌ i ña'tañob ochel ti rico, pero ma'anic chuqui mi' tajob. An mu' bʌ i yochelob ti pobre pero wen ricojobʌch. 8Jini rico mi' yʌc' i bʌ ti colel cha'an cabʌl i chubʌ'an, pero ma'anic majch mi' tic'lan jini pobre. 9An i c'ʌc'al jini tojo' bʌ ti pejtelel ora, pero mi' caj ti yajpel i c'ʌc'al jini sajtemo' bʌ. 10Isujm mi' tech leto jini mu' bʌ i chañ'esan i bʌ, pero jini weño' bʌ i pusic'al mi' yubiñob i toj'esʌntel. 11I xujch' xjontolil mi' cha' sajtel, pero mi' yoñ'an i chobejtʌbal jini bʌxo' bʌ ti e'tel. 12Che' jal mi' tilel lac pijtaya wocol jax mi lac pijtan. Che' mi' tilel chuqui la com lajalʌch bajche' cuxul bʌ te' mu' bʌ i yʌq'ueñonla laj cuxtʌlel. 13Jini mu' bʌ i ts'a'len i cʌntesʌntel anix ti' wenta. Mux i toj. Pero jini mu' bʌ i jac' jini mandar mi caj i yʌq'uentel i majtan. 14I cʌntesʌbal jini wen bʌ i ña'tʌbal lajalʌch bajche' i loq'uib ja' ba' mi lac taj laj cuxtʌlel, cha'an mi lac chijlel loq'uel ti wocol. 15Mi lac taj laj c'uxbintel che' mi lac pʌs i yutslel lac pusic'al. Mach i t'ojolic bajche' mi' melob xñusa t'añob. 16Pejtel cʌntesʌbilo' bʌ mi' wʌn ña'tañob bajche' yom mi' melob. Jini tonto bʌ i pusic'al mu jach i pʌs i bʌ ti tonto. 17Jini mach bʌ xuc'ulic mu' bʌ i ch'ʌm majlel t'an mi' tech wocol, pero an i c'uxbintel jini xuc'ul bʌ mu' bʌ i ch'ʌm majlel t'an. Tijicña i yum tsa' bʌ i choco majlel yic'ot jini mu' bʌ i ñopben i t'an. 18Mux i yubin quisin, mux i sʌt i chubʌ'an jini mach bʌ yomic i cʌntesʌntel, pero mux i c'uxbintel jini mu' bʌ i jac' i tic'ol. 19Tsaj yubil chuqui tac la com che' bʌ tsa'ix lac taja, pero tontojob jini mach bʌ yomobic i cʌy i bijlel xmulilob. 20Jini mu' bʌ i pi'leñob majlel jini weño' bʌ i pusic'al muc'ʌch i tajob i ña'tʌbal. Jini mu' bʌ i pi'leñob majlel jini mach bʌ weñobic i pusic'al mi' yutsi p'ojlel i mul. 21Mux i tajob wocol jini xmulilob, pero mux i yʌq'uentelob tijicña bʌ jini tojo' bʌ. 22Jini wen bʌ i pusic'al mi' cʌybeñob i chubʌ'an i yalobilob yic'ot i buts, pero mux i lojtel i chubʌ'an jini xmulilob cha'an jini tojo' bʌ. 23Tsa'ic i top'o lum jini pobre, tsa' mejli i taj cabʌl i bʌl i ñʌc'. Ma'anic i bʌl i ñʌc' come ma'anic tsi' p'isi ti' wenta. 24Jini mach bʌ anic mi' c'ʌn asiyal, ts'a' mi' q'uel i yalobil. Pero jini mu' bʌ i c'uxbin i yalobil mi' seb cajel i yʌq'uen i tsico' pusic'al. 25Jasʌl mi' c'uxob i bʌl i ñʌc' jini tojo' bʌ, pero mux i yubiñob wi'ñal jini sajtemo' bʌ.
Currently Selected:
PROVERBIOS 13: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.