PROVERBIOS 12
12
1Jini mu' bʌ i mulan i toj'esʌntel mi' mulan i cʌntesʌntel, pero ma'anic i ña'tʌbal yilal jini mu' bʌ i ts'a'len i tic'ol. 2Jini wen bʌ i pusic'al mi' tajben i yutslel i pusic'al lac Yum. Mux i chojquel ti lac Yum jini mu' bʌ i ña'tan i mel jontolil. 3Ma'anic majch mi' mejlel ti wen chumtʌl cha'an i jontolil, pero xuc'ulob jini tojo' bʌ che' bajche' cuxul bʌ te' chucul bʌ i wi'. 4Jini wen bʌ x'ixic mi' yʌc' ti c'uxbintel i ñoxi'al i wenta corona, pero jini mu' bʌ i yʌc' ti quisin i ñoxi'al i wenta i p'ajomal. 5Jini tojo' bʌ mi' ña'tañob i mel chuqui toj. Jini sajtemo' bʌ mu jach i temob i t'an ti lot. 6Jini xjontolilob mi' temob i t'an cha'an mi' tsʌnsañob winicob, pero i t'an jini tojo' bʌ mi' yʌc'ob ti colel. 7Jini xjontolilob mach mʌjlic i cha'añob. Mi caj i sʌc jilelob. Xuc'ul mi caj i yajñelob jini tojo' bʌ yic'ot i yalobilob. 8Jini wen bʌ i ña'tʌbal mi caj i c'uxbintel, pero mi caj i ts'a'lentel jini leco bʌ i pensar. 9Anquese ts'a'lebil jini yumʌl am bʌ i winic, ñumen tijicñayʌch bajche' jini mu' bʌ i lon q'uel i bʌ ti ñuc, mach bʌ anic i waj. 10Jini tojo' bʌ mi' cʌntañob i yʌlac' mu' bʌ ti xʌmbal ti pam otot, pero mach yujilic p'untaya jini xjontolil. Jontol jax i pusic'al. 11Mux i ñaj'an ti waj jini mu' bʌ i cha'len e'tel ti lum, pero ma'anic i pusic'al yilal jini mu' bʌ i tsajcañob majlel ti paxyal sajtemo' bʌ. 12Jini sajtem bʌ mi' mulʌben i xujch' jini xjontolil. Jini tojo' bʌ lajalobʌch bajche' te' mu' bʌ i yʌc' i wut cha'an cuxul i wi'. 13Chucul jini sajtem bʌ che' bajche' ti yac cha'an i lot tsa' bʌ i subu, pero jini toj bʌ mi' caj ti loq'uel ti wocol. 14Jini uts bʌ i t'an mi caj i tajben i yutslel i pusic'al i pi'ʌlob. Bajche' jach mi lac melben lac pi'ʌlob mi caj lac cha' melbentel. 15Jini mach bʌ wenic i pensar mi' lon ña'tan tojʌch i bijlel, pero jini am bʌ i ña'tʌbal mi' yʌc' ti' pusic'al i toj'esʌntel. 16Ora mi' pʌs i mich'ajel jini tonto bʌ, pero jini wen bʌ i pusic'al che' jach mi' cuch. 17Jini mu' bʌ i cha'len t'an ti isujm mi' yʌc' ti tsictiyel chuqui toj, pero jini mu' bʌ i lon al i bʌ ti testigo mi' cha'len lotiya. 18An winicob x'ixicob mach bʌ utsic i t'an. Mi' jec'onla bajche' espada. I t'an jini weño' bʌ i pusic'al i wentajʌch ts'ac mu' bʌ i lajmesañonla. 19Jini isujm bʌ t'an mi' caj ti jalijel ti pejtelel ora. I t'an jini xlot jumuc' jach an. 20An lotiya ti' pusic'al jini mu' bʌ i ña'tañob i mel jontolil. An i tijicñʌyel i pusic'al mu' bʌ i ña'tañob i mel chuqui uts'at. 21Jini tojo' bʌ ma'anic mi caj i tajob jini wocol mu' bʌ i taj xmulil. Jini jontolo' bʌ mi caj i tajob cabʌl wocol cha'an i mul. 22Lac Yum mi' ts'a'liben i yej jini yujil bʌ lot. Tijicña mi' q'uel jini mu' bʌ i melob chuqui wen ti isujm. 23Jini wen bʌ i ña'tʌbal che jach lotol i ña'tʌbal ti' pusic'al. Jini tonto bʌ mi' puc majlel i tontojlel. 24Jini bʌxo' bʌ ti e'tel mi caj i tajob i yumʌntel, pero jini ts'ubo' bʌ mi cajel i yumañob. 25Lac ch'ijiyemlel mi' ju'sʌbeñonla lac pusic'al, pero jini wen bʌ t'an mi' yʌq'ueñonla tijicña bʌ lac pusic'al. 26Jini tojo' bʌ mi' pʌsbeñob i pi'ʌlob jini wen bʌ bij, pero jini jontolo' bʌ mi' socob i bʌ come leco i bijlel. 27Jini ts'u' bʌ mu jach i len cʌye' bʌte'el tsa' bʌ i tsʌnsa, pero jini bʌx bʌ mi' p'is ti' wenta i chubʌ'an. 28Mi' tajtʌl laj cuxtʌlel ti toj bʌ bij. Ma'anic majch mi' caj ti jilel ya'i.
Currently Selected:
PROVERBIOS 12: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.