PROVERBIOS 11
11
1Ts'a' mi' q'uel lac Yum jini xewel bʌ balanza, pero tijicña i pusic'al cha'an ts'ʌcʌl bʌ i yalel balanza. 2Jini mu' bʌ i chañ'esan i bʌ mi' cajel ti quisin, pero an wen bʌ i ña'tʌbal jini mu' bʌ i peq'uesan i bʌ. 3Jini tojo' bʌ mi caj i toj'esʌntelob majlel cha'an tojob i pusic'al. Jini xmulilob mi caj i jisʌntelob cha'an jontolob i pusic'al. 4Ma'anic i c'ʌjñibal chubʌ'añʌl ti' q'uiñilel i mich'lel Dios. Pero i yuts'atlel jini toj bʌ mi' yʌc' ti colel jini mu' bʌ caj ti chʌmel. 5I yuts'atlel jini toj bʌ mi caj i pʌsben majlel i bijlel, pero jini xmulilob mi caj i yajlelob cha'an i jontolil. 6I yuts'atlel jini tojo' bʌ mi caj i coltañob, pero i mul jini xmulilob mi caj i yʌsañob. 7Che' mi' chʌmel jini sajtem bʌ mi' laj jilel i pijtaya. Chuqui tac mi' ña'tañob i taj xjontolilob ti' bajñel p'ʌtʌlel ma'anic mi caj i tajob. 8Jini toj bʌ mi caj i yʌjq'uel ti colel ti wocol. Ya' ba' tsa' loq'ui mi' cajel ti ochel xjontolil. 9Cha'an ti' t'an jini xlotiya mi' jisʌntelob i pi'ʌlob ti chumtʌl, pero jini toj bʌ mi' cajel ti colel cha'an i ña'tʌbal. 10Che' uts'at añob jini tojo' bʌ tijicña jini tejclum. Mi' cha'leñob q'uiñijel che' mi' jilelob xjontolilob. 11Cha'an ti' yutslel i t'an jini tojo' bʌ mi' ñuc'an tejclum, pero mux i jilel cha'an ti' yej xjontolil. 12Leco i ña'tʌbal jini mu' bʌ i ts'a'len i pi'ʌlob ti chumtʌl, pero jini wen bʌ i ña'tʌbal mi' tic' i bʌ. 13Jini mu' bʌ i puc majlel jop't'an mi' yʌc' ti tsictiyel mucul tac bʌ. Pero jini xuc'ul bʌ i pusic'al mi' muc cʌytʌl ti' pusic'al chuqui tsi' yubi. 14Mi lac yajlel che' ma'anic wen bʌ lac toj'esʌntel, pero an laj coltʌntel che' cabʌl la caj toj'esayajob. 15Mi caj lac mel lac pusic'al mi tsa' la cʌq'ue ti bet lac taq'uin jini mach bʌ laj cʌñʌyic, come mach chʌn q'uextʌyic lac taq'uin. Pero tijicñayonla mi tsa' lac bajñel cʌnta lac taq'uin. 16Jini x'ixicob yujilo' bʌ p'untaya mi caj i c'uxbintelob. Mi caj i tajob cabʌl chubʌ'añʌl jini p'ʌtʌl bʌ winicob. 17Jini yujil bʌ p'untaya mi' coltan i bʌ, pero mi' tic'lan i bʌ jini jontol bʌ i pusic'al. 18Lot jach i ganar jini xjontolil. Isujmʌch i chobejtʌbal jini wen bʌ i melbal. 19Mux i taj i cuxtʌlel jini xuc'ul bʌ i pusic'al mu' bʌ i chʌn cha'len chuqui uts'at. Mi' cajel ti chʌmel jini mu' bʌ i chʌn cha'len jontolil. 20Lac Yum mi' ts'a'len jini jontolo' bʌ i pusic'al, pero tijicña i pusic'al lac Yum cha'an i bijlel jini tojo' bʌ. 21Mi mach wʌleyic mi' tojob i mul xjontolilob, mux i tojob ti wi'il, pero i yalobilob jini tojo' bʌ mi' cajelob ti colel. Ma'anic mi caj i yʌjq'uelob ti toj mulil. 22Jini i t'ojol jax bʌ x'ixic mach bʌ anic i ña'tʌbal lajalʌch bajche' mʌtc'ʌbʌl ti' ñi' chitam. Lolom jach mi' ch'ʌl i bʌ. 23Jini tojo' bʌ jini jach uts'at tac bʌ yomob i taj, pero jini xjontolilob muc'ʌch i tajob i mich'ajel Dios. 24An mu' bʌ i p'ejwob i chubʌ'an, pero mi' yutsi p'ojlel i cha'an. An on bʌ mi' lot i chubʌ'an ñumen bajche' yom, pero mi' yutsi sajtel. 25Jini mach bʌ chʌquic ti' chubʌ'an mi caj i cha' aq'uentel. Jini mu' bʌ i yʌq'uen ja' yambʌ am bʌ i tiquin ti' mux i lajmel i tiquin ti' ja'el. 26Jini mu' bʌ i bajñel lot i yixim mux i taj i p'ajol ti winicob x'ixicob. Jini mu' bʌ i chon mi caj i taj uts bʌ t'an. 27Jini mu' bʌ i ñop i mel chuqui uts'at wolix i sʌclan wen bʌ t'an. Jini mu' bʌ i ñop i mel jontolil mi caj i yutsi taj jontolil. 28Jini xuc'ul bʌ i pusic'al ti cabʌl i chubʌ'an mi' caj ti jilel. Jini toj bʌ mi caj i ch'ocan lajal bajche' te' mu' bʌ ti ch'ajb. Mi' caj ti loq'uel i yopmal. 29Jini mach bʌ anic mi' cʌntan i pi'ʌlob ti' yotot ma'anic chuqui mi caj i taj ti' jilibal. Jini tonto bʌ mi caj i yuman jini am bʌ i ña'tʌbal. 30Jini tojo' bʌ lajalobʌch bajche' cuxul bʌ te' mu' bʌ i yʌq'ueñonla i wut cha'an laj cuxtʌlel. Cabʌlʌch i pusic'al jini mu' bʌ i pʌyob winicob cha'an mi' sujtelob ti hermanojob. 31Isujm mux i tojob i mul jini tojo' bʌ ila ti pañimil. ¿Mach ba ñumenic mi caj i tojob i mul xjontolilob yic'ot xmulilob?
Currently Selected:
PROVERBIOS 11: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.