NUMEROS 15
15
Mandar cha'an majtañʌl tac
1-2Lac Yum tsi' sube Moisés: Yom ma' subeñob israelob: Che' ochemobix la' walobilob ya' ti jini lum mu' bʌ caj cʌq'ueñob, 3mi yomob i yʌq'ueñon pulbil tac bʌ c majtan, yic'ot jini tsʌnsʌbil tac bʌ c majtan tilem bʌ ti' pusic'al, che' mi' ts'ʌctesañob i t'an, o che' ti' yorajlel tac la' q'uiñijel, la' i yʌq'ueñoñob xojocña bʌ i yujts'il tic tojlel. 4Jini mu' bʌ i ch'ʌmbeñon tilel c majtan, la' i ch'ʌmbeñon tilel yic'ot c majtan melbil bʌ ti harina. Yom uxp'ejl litro jini juch'bil bʌ harina xajc'ubil bʌ yic'ot ojlil i cha'p'ejl litro aceite. 5Yom mi la' wʌc' ojlil i cha'p'ejl litro vino, jiñʌch japbil bʌ majtañʌl, ba' ora ma' wʌq'ueñon juncojt tiñʌme'.
6Mi tat tiñʌme' jini alʌc'ʌl mu' bʌ a tsʌnsan, yom ma' c'ʌn wʌcp'ejl litro juch'bil bʌ harina xajc'ubil bʌ yic'ot cha'p'ejl litro aceite, 7yic'ot cha'p'ejl litro vino cha'an japbil bʌ majtañʌl. Jiñʌch xojocña bʌ c majtan. 8-9Mi i tat wacax jini mu' bʌ la' wʌq'ueñon, yom ma' c'ʌn bolomp'ejl litro juch'bil bʌ harina xajc'ubil bʌ yic'ot uxp'ejl litro aceite. Jiñʌch yom che' a wom a ts'ʌctesan a t'an, yic'ot che' ma' wʌq'ueñonla wocolix cʌlʌ. 10Yom ja'el uxp'ejl litro vino cha'an japbil bʌ majtañʌl. Jiñʌch xojocña bʌ pulbil bʌ c majtan. 11-12Che'ʌch yom mi la' mel che' mi la' wʌq'ueñon jujuncojt c majtan mi tat wacax, mi tat tiñʌme', mi alʌ tat tiñʌme', mi alʌ tat chivo.
13-14Pejtelel jini israelob che'ʌch mi caj i melob bajche' iliyi, cha'an xojocña tic tojlel jini pulbil bʌ c majtan. Che'ʌch yom mi' melob ti pejtelel ora la' walobilob yic'ot jini ñajt bʌ ch'oyolob año' bʌ ti la' tojlel. 15Pejtelel chumulo' bʌ ti jini lum junlajal mi caj i jac'ob c mandar, jini israelob yic'ot jini ñajt bʌ ch'oyolob, yic'ot la' walobilob ti pejtelel ora. Junlajaletla tic tojlel. 16Jump'ejl jach mandar yom mi la' jac' israelet bʌ la yic'ot la' pi'ʌlob ti chumtʌl parte bʌ ch'oyolob, che'en lac Yum.
17-18Lac Yum tsi' cha' sube Moisés: Yom ma' cʌntesan jini israelob ba' ora ochemobix ti jini lum ba' mi caj cʌq'ueñob. 19-21Che' mi' yujtel i tuc'beñob i wut i pʌc'ʌb tac, yom mi' yʌq'ueñoñob c majtan. La' i ch'ʌmob ñaxan bʌ i wut trigo cha'an mi' melbeñoñob junq'uejl colem waj cha'an c majtan. Che'ʌch yom mi' yʌq'ueñoñob ti jujump'ejl jab. Che' yom mi' melob la' walobilob ja'el c'ʌlʌl ti pejtelel ora.
22Che' añob i sajtemal che' ma'anic mi' jac'beñoñob pejtelel ili c mandar tsa' bʌ c subeyob, 23-24ti jim bʌ ora che' mi' ña'tʌntel i mul, la' tilicob pejtelel israelob cha'an mi' yʌq'ueñoñob juncojt tat wacax cha'an pulbil bʌ c majtan. Temel yom mi' yʌq'ueñoñob yic'ot majtañʌl melbil bʌ ti harina, yic'ot vino ja'el jini japbil bʌ c majtan. Yom mi' yʌq'ueñoñob ja'el juncojt tat chivo cha'an i ñusʌntel mulil. Che' yom mi' melob la' p'olbalob ti pejtelel ora. 25Jini motomaj mi caj i tsʌnsan jini majtañʌl cha'an i tojol i mul pejtelel israelob. Che' jini mi caj i ñusʌbentelob i mul, come an i sajtemal anquese ma'anic tsi' ña'tayob. Jini cha'an ti' pejtelelob yom mi' ch'ʌmob tilel pulbil bʌ c majtan yic'ot majtañʌl cha'an mi' ñusʌbentelob i mul. 26Che' jini mi caj c ñusʌbeñob i mul pejtelel israelob, yic'ot jini ñajt bʌ ch'oyolob woliyo' bʌ ti chumtʌl ti la' tojlel, come ti' pejtelelob mi' tajob i mul cha'an ti' caj i mul juntiquil.
27Mi an i sajtemal juntiquil, yom mi' yʌc' juncojt i ña'al chivo am bʌ jump'ejl i jabilel cha'an i tojol i mul. 28Jini motomaj mi caj i yʌq'ueñon c majtan cha'an i tojol mulil. Mi caj c ñusʌbeñob i mul jini winicob. 29Jini israelob yic'ot i pi'ʌlob ti chumtʌl parte bʌ i lumal junlajal jach mi caj i jac'ob ili mandar. 30Pero majqui jach mi' cha'len mulil cha'an jach yom jontolil, mi jini Israel bʌ, mi jini ñajt bʌ ch'oyol, wolix i ts'a'leñon. Wersa yom mi' chojquel loq'uel ti' lumal jini winic. 31Come ma'anic tsi' jac'ʌ c t'an. Tsa' jach i t'uchta c mandar. Jini cha'an wersa yom mi' chojquel loq'uel jini winic. Bajñel an ti' wenta cha'an mi' toj i mul. Che' tsi' yʌlʌ lac Yum.
Mi' jujlel ti xajlel xñusa mandar ti' yorajlel c'aj o
32Che' ya' añob pejtelel israelob ya' ti colem bʌ i tiquiñal pañimil, tsi' tajayob juntiquil winic woli bʌ ti xot' si' che' ti' yorajlel c'aj o. 33Jini tsa' bʌ c'oti i tajob jini winic che' woli ti xot' si' tsi' pʌyʌyob tilel ba'an Moisés yic'ot ba'an Aarón, jiñʌch año' bʌ i ye'tel. 34Tsi' yotsayob ti mʌjquibʌl, come maxto tsiquilic chuqui mi caj i tumbentel. 35Lac Yum tsi' sube Moisés: Wersa mi' tsʌnsʌntel jini winic. La' i pʌyob loq'uel i pi'ʌlob ti' ti' jini tejclum cha'an mi' julob ti xajlel, che'en. 36Che' jini tsi' pʌyʌyob loq'uel ti tejclum cha'an mi' julob. Tsa' chʌmi jini winic che' bajche' lac Yum tsi' sube Moisés.
I ch'ʌjlil i ti' ti'il i bujcob
37-38Lac Yum tsi' pejca Moisés: Subeñob israelob: Yom mi la' joch' i ti' ti'il la' bujc jatetla yic'ot la' walobilob ti pejtelel ora. Che' ja'el yom mi la' wʌc' jujunt'ujm yʌjyʌx puy ya' ti' ti'il. 39Che' mi la' q'uel yom mi la' c'ajtesan ti la' pusic'al pejtelel c mandar, cha'an ts'ʌcʌl mi la' chʌn mel, cha'an mach yomic mi la' mel jini mu' bʌ la' bajñel ña'tan ti la' pusic'al. Mach yomic mi la' tsʌclan jini mu' bʌ i bajñel q'uel la' wut cha'an mi' yʌq'ueñetla la' taj la' ts'i'lel. 40Yom c'ajal la' cha'an ti pejtelel ora cha'an mi la' jac' pejtelel jini c mandar, cha'an ch'ujul mi la' wajñel tic tojlel.
41Joñoñʌch la' Yumon la' Dioson tsa' bʌ c loc'sayetla ti' lumal Egipto cha'an mi la' ch'ujutesañon. Come la' Yumon la' Dioson, che'en lac Yum Dios.
Currently Selected:
NUMEROS 15: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.