NUMEROS 13
13
Lajchʌntiquil stsajiya pañimil
(Dt. 1.19-33)
1-2Lac Yum tsi' sube Moisés: Choco majlel winicob cha'an mi' tsajiñob jini lum i c'aba' Canaán mu' bʌ caj cʌq'ueñob israelob. Choco majlel lajchʌntiquil yumʌlob loq'uemo' bʌ ti jini lajchʌnmojt i yalobilob Israel, che'en.
3-15Jini cha'an tsi' chocoyob loq'uel ya' ti colem bʌ i tiquiñal pañimil i c'aba' Parán che' bajche' tsi' sube lac Yum. Pejtelel ili winicob añob i ye'tel ti' tojlel i pi'ʌlob jiñʌch i c'aba'ob:
Samúa i yalobil Zacur, loq'uem bʌ ti Rubén; Safat i yalobil Hori, loq'uem bʌ ti Simeón; Caleb i yalobil Jefone, loq'uem bʌ ti Judá; Igal i yalobil José, loq'uem bʌ ti Isacar; Oseas i yalobil Nun, loq'uem bʌ ti Efraín; Palti i yalobil Rafú, loq'uem bʌ ti Benjamín; Gadiel i yalobil Sodi, loq'uem bʌ ti Zabulón; Gadi i yalobil Susi, loq'uem bʌ ti Manasés, i yalobil José; Amiel i yalobil Gemali, loq'uem bʌ ti Dan; Setur i yalobil Micael, loq'uem bʌ ti Aser; Nahbi i yalobil Vapsi, loq'uem bʌ ti Neftalí; Guel i yalobil Maqui, loq'uem bʌ ti Gad.
16Jiñʌch i c'aba'ob winicob tsa' bʌ i chocoyob majlel Moisés cha'an mi' tsajiñob jini lum. Moisés tsi' q'uextʌbe i c'aba' Oseas i yalobil Nun. Tsi' yotsʌbe i c'aba' Josué. 17Che' bʌ tsi' chocoyob majlel cha'an mi' q'uelob bajche' yilal jini lum Canaán, Moisés tsi' subeyob: Cucula ti' bijlel Neguev ba' mi la' letsel ti wits. 18Yom mi la' wen q'uel jini lum bajche' yilal, yic'ot bajche' yilalob jini winicob ya' bʌ chumulob, mi ch'ejlob, mi mach ch'ejlobic, mi ts'ita'ob, mi cabʌlob. 19Q'uelela mi uts'at mi' yʌc' i wut jini lum. Q'uelela mi joyolob ti ts'ajc jini colem tejclum tac yic'ot xchumtʌl tac, mi cabʌlob mi mach cabʌlobic. 20Q'uelela jini lum, mi weñʌch yilal, mi mach wenic, mi an tacʌch i te'elal, mi ma'anic. Mach la' cha'len bʌq'uen. Ch'ʌmʌla tilel i wut tac te' cha'an mi laj q'uel bajche' yilal. Che' tsi' yʌlʌ Moisés. I tejchibalix c'ajbal, wolix i c'ʌñ'an i wut ts'usub.
21Jini cha'an tsa' cajiyob ti letsel majlel. Tsa' caji i tsajiñob jini lum c'ʌlʌl ti' tiquiñal pañimil i c'aba' Zin c'ʌlʌl ti Rehob am bʌ ti' bijlel Hamat. 22Che' bʌ tsa' ñumiyob ti Neguev tsa' c'ʌlʌ c'otiyob ti Hebrón, ba' tsi' q'ueleyob i p'olbalob Anac ti mojt ti mojt, Ahimán yic'ot Sesai yic'ot Talmai. Wa'chocobilix Hebrón ti oniyi che' wucp'ejl to jab yom cha'an mi' wa'chocontel Zoán am bʌ ti Egipto. 23Tsa' c'otiyob jini lajchʌntiquilob ti joctʌl i c'aba' Escol, ya' ba' tsi' tuc'uyob jumpajl ts'usub, wen colem bʌ. Wersa yom cha'tiquil winicob cha'an mi' q'uechob majlel ti junts'ijt te'. Tsi' ch'ʌmʌyob sujtel ja'el i wut ch'umac' yic'ot i wut higo. 24Jini cha'an tsi' yotsʌbeyob i c'aba' ili lum Joctʌl Escol cha'an jini ts'usub tsa' bʌ i tajayob.
25Ñumenix cha'c'al q'uin tsa' cha' sujtiyob jini winicob ba'an i pi'ʌlob. 26Tsa' cha' c'otiyob ti Cades am bʌ ya' ti colem bʌ i tiquiñal pañimil i c'aba' Parán. Tsi' subeyob Moisés yic'ot Aarón yic'ot pejtelel israelob bajche' yilal i lumal Canaán. Tsi' pʌsbeyob ja'el i wut jini pʌc'ʌbʌl tsa' bʌ i tajayob. 27Tsi' yʌlʌyob: Tsa' c'otiyon lojon ya' ba' tsa' chocoyon lojon majlel. Melel on mi' yʌc' leche, yic'ot chab. Wʌ' tsac ch'ʌmʌ lojon tilel ts'ita' i wut te' cha'an mi la' q'uel. 28Pero wen ch'ejlob jini winicob ya' bʌ chumulob. Wen colem jini tejclum, joyolob ti ts'ajc. Tsaj q'uele lojon ja'el jini wen chaño' bʌ winicob i yalobilob Anac. 29Ya' chumulob i yalobilob Amalec ti Neguev. Jini heteojob, yic'ot jebuseojob, yic'ot amorreojob, chumulob ti wits. Jini cananeojob chumulob ti' ti' colem ñajb, yic'ot ti' ti' Jordán ja', che'ob.
30Che' jini Caleb tsa' caji i xic' i pi'ʌlob ti' tojlel Moisés: Conla ti ora cha'an mi lac ch'ʌm jini lum, come muc'ʌch i mʌjlel lac cha'an, che'en Caleb. 31Pero jini yaño' bʌ winicob tsajniyo' bʌ yic'ot cha'an mi' q'uel tsi' subeyob: Mach mejliconla ti letsel majlel ame i jisañonla laj contrajob come wen p'ʌtʌlob, che'ob. 32Che' jini tsi' bʌc'tesayob i pi'ʌlob come tsi' yʌlʌyob: Wen yujilob guerra winicob ti jini lum ba' tsajniyon lojon. Wen colemob jini chumulo' bʌ ti Neguev ti' bijlel Canaán ba' tsa' ñumiyon lojon. 33Tsaj q'uele lojon i yalobilob Anac, jini wen chaño' bʌ winicob, cʌmbilo' bʌ c'ʌlʌl ti wajali. Wen pec' tsaj q'uele lojon c bʌ che' bajche' ya alʌ sajc' ti' tojlelob, come wen chañob, che'ob.
Currently Selected:
NUMEROS 13: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.