NUMEROS 12
12
Miriam yic'ot Aarón tsi' wulwul a'leyob Moisés
1Awilan tsa' cajiyob ti wulwul a'leya Miriam yic'ot Aarón ti' contra Moisés cha'an tsi' pʌyʌ i yijñam ch'oyol bʌ ti Cus. 2Tsa' caji i yʌlob: ¿Cojach ba mi' cha'len t'an lac Yum yic'ot Moisés? ¿Mach ba anic mi' c'ʌñonla ja'el? che'ob. 3Lac Yum tsi' yubibeyob i t'an. Uts i pusic'al Moisés ñumen bajche' pejtelel winicob ti pañimil. 4Ti ora jach lac Yum tsi' pʌyʌ Moisés yic'ot Aarón yic'ot Miriam. Tsi' subeyob: Cucula ti la' wuxticlel ya' ba'an Tabernáculo, che'en. Jini cha'an tsa' majliyob. 5Lac Yum tsa' jubi tilel ti Tocal. Tsa' wa'le ti' ti' Tabernáculo. Tsi' pʌyʌ Aarón yic'ot Miriam. Tsi' lʌc'tesayob i bʌ ti' cha'ticlel. 6Lac Yum tsi' subeyob: Ñich'tanla ili c t'an. Mi añʌch la' cha'an x'alt'an mi caj c pejcan ti ñajal. Mi caj c suben c t'an che' an ti' wʌyib. 7Pero mach che'ic mic pejcan c winic Moisés. Tsa cotsʌbe ti' wenta Moisés pejtelel i pi'ʌlob, come cojach xuc'ul c pusic'al yic'ot. 8Mic cha'len t'an yic'ot Moisés che' bajche' mi la' pejcan la' bʌ ti jamʌl. Mach muculic c t'an ti' tojlel. Mi cʌc' c bʌ ti cʌjñel cha'an mi' q'uel bajche' quilal. ¿Chucoch ma'anic tsa' la' cha'le bʌq'uen che' bʌ tsa' la' wulwul a'le c winic Moisés? che'en lac Yum.
9Che' jini tsa' tili i mich'ajel lac Yum cha'an mi' contrajiñob. Tsa' cha' majli lac Yum. 10Tsa' letsi majlel jini Tocal ti' tojlel Tabernáculo. Awilan anix i c'amʌjel Miriam. Sʌc petepet tsa' majli i pʌchʌlel. Tsa' caji i q'uel Aarón mach wenix i pʌchʌlel Miriam. 11Ti wocol t'an tsi' sube Moisés: A wocolic c yum, mach a wʌq'ueñon lojon c toj ili mulil, come tontojon lojon. 12Mach a cʌy Miriam ame lajalic mi' cʌytʌl bajche' chʌmen bʌ alʌl oc'benix bʌ i bʌc'tal mi' yilan pañimil, che'en Aarón. 13Che' jini Moisés tsi' pejca lac Yum Dios ti wocol t'an: C Yum Dios, mic subeñet, a wocolic, cha' lajmesan jini c chich, che'en.
14Lac Yum tsi' sube Moisés: Tsa'ic tujbʌbenti i wut jini x'ixic cha'an i tat, ¿mach ba muq'uic i yʌjq'uel ti quisin wucp'ejl q'uin? Jini cha'an la' chojquic loq'uel ti la' tojlel wucp'ejl q'uin. Che' mi' ts'ʌctiyel, yom mi' cha' ochel ya' ba' chumuletla, che'en lac Yum. 15Jini cha'an wucp'ejl q'uin tsa' chojqui loq'uel Miriam ti' tojlel i pi'ʌlob. Jini winicob x'ixicob tsi' pijtayob wucp'ejl q'uin. Ma'anic tsi' poj techeyob i xʌmbal jinto che' cha' ya'ix an yic'otob. 16Che' jini tsi' cʌyʌyob Hazerot. Tsa' c'otiyob ti colem bʌ i tiquiñal pañimil i c'aba' Parán.
Currently Selected:
NUMEROS 12: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.