NUMEROS 10
10
Jini trompeta melbil bʌ ti plata
1-2Lac Yum tsi' sube Moisés: Mele cha'p'ejl trompeta ti plata jats'bil bʌ ti martillo cha'an ma' c'ʌn a pʌy winicob ba' ora mi la' tempan la' bʌ, cha'an ma' subeñob i chajpañob i bʌ che' i yorajlelix mi' cha' techob xʌmbal. 3Che' mi la' wus jini cha'p'ejl trompeta, mux i ña'tañob jini israelob cha'an woli a pʌyob, cha'an mi' tempañob i bʌ la' wic'ot ya' ti' ti' jini Tabernáculo. 4Pero che' jump'ejl jach mi' wustʌl jini trompeta, cojach yom mi' tilelob ba' añet jini ñuc taco' bʌ i ye'tel loq'uemo' bʌ ti' tojlel pejtel israelob. 5Che' ma' ñijcañob ch'ojyel yic'ot i t'an jini trompeta, muq'uix i techob xʌmbal jini año' bʌ ti' tojel Tabernáculo ba' mi' pasel q'uin. 6Che' ti' cha'yajlel mi' wustʌl jini trompeta, mi' loq'uelob majlel jini israelob año' bʌ ti' tojel Tabernáculo ya' ti sur. Ti jujunyajl che' yom mi' techob xʌmbal, yom mi la' wus jini trompeta. 7Mach lajalic mi' wustʌl jini trompeta. Yom junchajp i t'an che' mi' tempañob i bʌ jini israelob. Yom yambʌ junchajp i t'an cha'an ma' ñijcañob ch'ojyel ti xʌmbal. 8Cojach jini motomajob mi mejlel i wusob jini trompeta tac. Che' bajche' wolic subeñet, che'ʌch yom mi' melob la' walobilob ja'el ti pejtelel ora.
9Che' c'otemetixla ti la' lumal, che' mi la' loq'uel ti guerra ti' tojlel jini woliyo' bʌ ti tic'laya, mux caj cubibeñetla i t'an jini trompeta tac che' mi la' wus ti' yorajlel wocol. Mux caj coltañetla. 10Che' ti' yorajlel la' q'uiñijel tac ja'el, yic'ot che' ti yorajlel ñuc bʌ q'uin la' cha'an, yic'ot che' ti' tejchibal tac tsic, yom mi la' wus jini trompeta tac. Yom tijicña la' pusic'al che' mi la' pulbeñon c majtan tac, yic'ot che' mi la' wʌq'ueñon c majtan tac. Che' jini joñon mi caj c ña'tan jini Trato bʌ c T'an tsa' bʌ cʌq'ueyetla. Joñoñʌch la' Yumon, la' Dioson, che'en lac Yum Dios.
Israelob tsa' loq'uiyob ti Sinaí
11Tsa' letsi jini Tocal am bʌ ti' pam jini Tabernáculo che' ti' cha'p'ejlel bʌ uw cha'an i cha'p'ejlel jab, che' ti junc'al jini tsic. 12Che' jini tsa' cajiyob ti xʌmbal majlel jini israelob ya' ti colem bʌ i tiquiñal pañimil i c'aba' Sinaí. Cha'p'ejl uxp'ejl q'uin tsa' jijliyob ya' ti bij. Tsa' wa'le jini Tocal ya' ti colem bʌ i tiquiñal pañimil i c'aba' Parán. 13Jiñʌch cojax to bʌ tsa' cajiyob ti xʌmbal che' bʌ tsa' aq'uenti mandar tac Moisés ti lac Yum Dios. 14Ñaxan tsi' teche xʌmbal i p'olbalob Judá yic'ot i bandera. An ti' wenta Naasón i yalobil Aminadab cha'an mi' pʌyob majlel. 15Tsi' tsajcayob majlel i p'olbalob Isacar. An ti' wenta Natanael i yalobil Zuar cha'an mi' pʌyob majlel. 16Tsi' tsajcayob majlel i p'olbalob Zabulón. An ti' wenta Eliab i yalobil Helón cha'an mi' pʌyob majlel. 17Che' bʌ tsi' chejeyob jini Tabernáculo, tsi' q'uecheyob majlel i yalobilob Gersón yic'ot i yalobilob Merari.
18Jini i p'olbalob Rubén tsi' tsajcayob majlel yic'ot i bandera. An ti' wenta Elisur i yalobil Sedeur cha'an mi' pʌyob majlel. 19Tsa' loq'uiyob ja'el i p'olbalob Simeón. An ti' wenta Selumiel i yalobil Zurisadai cha'an mi' pʌyob majlel. 20Tsa' loq'uiyob ja'el i p'olbalob Gad. An ti' wenta Eliasaf i yalobil Deuel cha'an mi' pʌyob majlel. 21Tsa' loq'uiyob majlel ja'el i p'olbalob Coat woli bʌ i q'uechob majlel jini Ch'ujul bʌ i bʌl Tabernáculo. Che' bʌ tsa' c'otiyob jini wi'ipato' bʌ, cha' wa'chocobilix jini Tabernáculo ya' ba' mi caj i jijlelob.
22I p'olbalob Efraín tsi' tsajcayob majlel ti' pat yic'ot i bandera. An ti' wenta Elisama i yalobil Amiud cha'an mi' pʌyob majlel. 23I p'olbalob Manasés tsi' tsajcayob majlel ti' wenta Gamaliel i yalobil Pedasur. 24I p'olbalob Benjamín tsi' tsajcayob majlel ti' wenta Abidán i yalobil Gedeoni.
25Ti' pat tsa' loq'uiyob majlel i p'olbalob Dan ti' wenta Ahiezer i yalobil Amisadai. 26Tsa' loq'uiyob ja'el i p'olbalob bʌ Aser ti' wenta Pagiel i yalobil Ocrán. 27Tsa' loq'uiyob ja'el i p'olbalob Neftalí ti' wenta Ahira i yalobil Enán. 28Che'ʌch tsa' loq'uiyob majlel jini israelob ti mojt ti mojt.
29Moisés tsi' pejca Hobab i ja'an, jiñʌch i yalobil Ragüel am bʌ ti Madián. Tsi' sube: Muq'uix c majlel lojon ya' ti lum ba' mi caj i yʌq'ueñon lojon lac Yum. Conla. Mi a wom majlel quic'ot lojon tijicña mi caj a wajñel, come lac Yum tsa'ix i subeyob israelob mi caj i pʌsbeñob i yutslel i pusic'al, che'en. 30Pero Hobab tsi' yʌlʌ: Mach majlicon. Com sujtel ya' ba'an c pi'ʌlob tic lumal, che'en. 31Moisés tsi' cha' sube: Wersa yom ma' majlel quic'ot lojon. Mach a cʌyon lojon, come a cʌñʌyʌch jini colem bʌ i tiquiñal pañimil. Cabʌl mi mejlel a coltañon lojon. 32Mi awomʌch majlel quic'ot lojon, lac tem cha'an jach pejtelel mu' bʌ i yʌq'ueñonla lac Yum. Che' bajche' mi' melbeñon lojon, che'ʌch mi caj c melbeñet lojon ja'el. Che' tsi' yʌlʌ Moisés.
33Tsi' cʌyʌyob jini wits i c'aba' Sinaí, jiñʌch i wits lac Yum. Uxp'ejl q'uin tsi' tsʌcleyob majlel jini Arca tsa' bʌ majli ti ñaxan cha'an mi' yajcʌbeñob lum ba' mi' c'ajob i yo. 34Jini Tocal i cha'an bʌ lac Yum temel tsa' majli yic'otob che' bʌ tsi' cʌyʌyob jini lum ba' tsa' poj jijliyob. 35Che' bʌ tsa' caji ti majlel jini Arca, Moisés tsi' pejca lac Yum: C Yum, tsictesan a p'ʌtʌlel ti' tojlel a contrajob, cha'an mi' puts'elob ti' tojel a wut pejtel mu' bʌ i ts'a'leñetob, che'en. 36Che' bʌ tsa' wa'le jini Arca tsi' yʌlʌ lac Yum: Cha' chumlen ti' tojlel israelob ti pic ti pic che' bajche' jaypijc añonla, che'en.
Currently Selected:
NUMEROS 10: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.