JOSUE 9
9
I lot jini gabaoñob
1-2Jini yumʌlob am bʌ ti junwejl Jordán ja' ba' mi' bʌjlel q'uin tsi' yubiyob chuqui tsa' ujti. Tsi' temeyob i t'an cha'an mi' comol coltañob i bʌ ti contra Josué yic'ot israelob. Tsi' tempayob i bʌ jini año' bʌ ti wits yic'ot ti joctʌl yic'ot ti' tojel jini colem ñajb c'ʌlʌl ti Líbano, yic'otob heteojob yic'ot amorreojob yic'ot cananeojob yic'ot fereseojob yic'ot heveojob yic'ot jebuseojob.
3Jini winicob año' bʌ ti Gabaón tsi' yubiyob ja'el bajche' tsi' mele Josué ti' tojlel Jericó yic'ot ya' ti Hai. 4Tsi' c'ʌñʌyob i ña'tʌbal. Tsa' majli i c'ajtibeñob israelob cha'an mi' pʌyob ochel ti' winicob. Tsi' ch'ʌmʌyob ñoxix bʌ i pislelob. Tsi' ch'ʌmʌyob majlel ti burro tsucul bʌ coxtal yic'ot ñoxix bʌ pʌchi i yajñib vino. 5Tsi' lʌpʌyob ñoxix bʌ zapato. Jini i bʌl i ñʌc' tsa' bʌ i ch'ʌmʌyob majlel wen tiquinix, anix i cuxemal. 6Tsa' c'otiyob ba'an Josué yic'ot jini israelob ya' ti Gilgal. Tsi' subeyob: Tilemon lojon ti ñajt bʌ lum. Aq'ueñon lojon j coltʌntel, che'ob.
7Jini israelob tsi' subeyob jini heveojob: ¿Mach ba wʌ'ic chumuletla ti lʌc'ʌl? ¿Bajche' mi mejlel c laj lojon c t'an la' wic'ot? che'ob. 8Pero tsi' subeyob: Joñon lojon a winicon lojon, che'ob. Josué tsi' c'ajtiyob: ¿Majquiyetla? ¿Baqui ch'oyoletla? che'en.
9Tsi' jac'ʌyob: Ñajt tilemon lojon. Tsa cubi lojon wen ñuc la' Yum Dios. Tsa cubi lojon pejtel chuqui tsi' mele ti Egipto 10yic'ot pejtelel tsa' bʌ i tumbeyob i yum amorreojob ya' ti junwejl jini Jordán ja' ba' mi' pasel q'uin, Sehón i yum Hesbón yic'ot Og i yum Basán am bʌ ti Astarot. 11Jini ñoxobix bʌ yic'ot pejtelel c pi'ʌlob lojon tsi' subeyon lojon: “Ch'ʌmʌla majlel i bʌl la' ñʌc' cha'an mi la' c'ux ti bij. Cucula q'ueleyob. Subeñob i winicon lojon. C'ajtibeñob ti wocol t'an cha'an mi' yʌc'ob i t'an, cha'an mi lac tem coltan lac bʌ”. Che' tsi' yʌlʌyob jini ñoxobix bʌ. 12Tsijib to tsac ch'ʌmʌ lojon tilel i bʌl lojon c ñʌc'. Q'uele wʌle tiquinix, cuxix, che'ob. 13Yic'ot i yajñib jini vino tsijib to tsac ch'ʌmʌ lojon tilel, yic'ot c pislel lojon yic'ot c zapato lojon. Pero q'uele wʌle, ñoxix cha'an ñajt tsa' tiliyon lojon, che'ob. 14Jini israelob tsi' c'unte' ñopbeyob i lot. Ma'anic tsi' ñaxan c'ajtibeyob lac Yum. 15Josué tsi' pejcayob ti uts'at. Tsi' yʌc'ʌ i t'an cha'an ma'anic mi' tsʌnsañob. Jini año' bʌ i ye'tel ti Israel tsi' yʌc'ʌyob i t'an ja'el.
16Che' ñumenix uxp'ejl q'uin tsi' yubiyob ya' jach ch'oyolob ti lʌc'ʌl. 17Tsa' majliyob jini israelob ti' tejclumob jini winicob. Tsa' c'otiyob ti' yuxp'ejlel q'uin ti jini tejclum tac Gabaón, Cafira, Beerot, yic'ot Quiriat Jearim. 18Jini israelob ma'anic tsi' tsʌnsayob, come jini ñuco' bʌ i ye'tel tsi' wa'chocoyob i t'an ti' tojlel lac Yum i Dios Israel. Pero jini israelob tsi' mich'leyob i pi'ʌlob año' bʌ i ye'tel. 19Jini ñuco' bʌ i ye'tel tsi' yʌlʌyob: Tsa'ix cʌc'ʌ lojon c t'an ti' tojlel lac Yum i Dios Israel. Jini cha'an ma'anic chuqui mi mejlel lac tumben, che'ob. 20Tsi' yʌlʌyob: La' ajnicob la quic'ot ame tilic i mich'ajel Dios ti lac tojlel cha'an jini t'an tsa' bʌ lac tem mele ti' c'aba' lac Yum, che'ob. 21Anquese ma'anic mi mejlel lac tsʌnsañob, mi caj i yʌq'uentelob i ye'tel ti xot' si' yic'ot ti luch ja' ti lac tojlel, che'ob. Che' jini tsi' lajayob i t'an jini israelob.
22Josué tsi' pʌyʌyob tilel jini gabaoñob. Tsi' subeyob: ¿Chucoch tsa' lotiyon lojon? ¿Chucoch tsa' la' lon alʌ: “Ñajt tilemon lojon”, che'etla, che' lʌc'ʌl jax chumuletla? 23Jini cha'an chocbiletla. Mi caj la' melbeñon lojon que'tel. Mi caj la' xot'beñon lojon si'. Mi caj la' luchbeñon tilel ja' cha'an i yotot c Dios. Che' tsi' yʌlʌ Josué. 24Jini winicob tsi' jac'ʌyob: Tsac mele lojon che' bajche' iliyi, come tsa cubi lojon la' Yum Dios tsi' yʌc'ʌ mandar ti' tojlel Moisés cha'an mi la' jisan pejtelel tejclum tac. Tsac bʌc'ñayet lojon. Tsa' tiliyon lojon ti a tojlel cha'an ma' p'untañon lojon. 25Wʌ' añon lojon ti a tojlel. Melbeñon lojon che' bajche' a wom, che'ob. 26Jini cha'an Josué tsi' p'untayob. Ma'anic tsi' yʌc'ʌyob ti' c'ʌb jini israelob cha'an mi' tsʌnsañob. 27Tsi' yʌq'ueyob i ye'tel ti xot' si' yic'ot luch ja' ti' tojlel jini israelob yic'ot i pulʌntib i majtan lac Yum baqui jach tsi' yajca lac Yum. Che'ʌch woli' melob c'ʌlʌl wʌle.
Currently Selected:
JOSUE 9: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.