JOSUE 10
10
I jisʌntelob jini amorreojob
1Josué tsi' melbe i yum Hai che' bajche' tsi' melbe i yum Jericó. Adonisedec jini yumʌl ti Jerusalén tsi' yubi bajche' tsi' jisa jini Hai yic'ot Jericó. Tsi' yubi ja'el bajche' tsi' lajayob i t'an jini año' bʌ ti Gabaón yic'ot israelob. 2Tsa' wen caji ti bʌq'uen jini yumʌl, come wen colem jini tejclum Gabaón, ñumen bajche' Hai. Wen ch'ejl jini winicob ti jini tejclum. 3Jini cha'an Adonisedec tsi' choco majlel jini correo ba'an Hoham jini yumʌl bʌ ti Hebrón, yic'ot ba'an Piram yumʌl ti Jarmut, yic'ot ba'an Jafía yumʌl ti Laquis, yic'ot ba'an Debir jini yumʌl ti Eglón. 4Adonisedec tsi' subeyob: Yom mi la' tilel la' coltañon. La' laj contrajin jini año' bʌ ti Gabaón, come tsa'ix i temeyob i t'an yic'ot Josué yic'ot jini israelob, che'en.
5Jini cha'an jini jo'tiquil yumʌlob ti' tojlel amorreojob, i yum Jerusalén, yic'ot i yum Hebrón, yic'ot i yum Jarmut, yic'ot i yum Laquis, yic'ot i yum Eglón tsi' tempayob i bʌ. Tsa' cajiyob ti xʌmbal majlel cha'an mi' contrajiñob jini tejclum i c'aba' Gabaón. 6Pero jini año' bʌ ti Gabaón tsi' chocbeyob ti subentel Josué am bʌ ti Gilgal: A winicon lojon. Awocolic coltañon lojon ti ora. Pejtelel i yumob amorreojob año' bʌ ti wits tac tsi' lajayob i t'an cha'an mi' jisañon lojon, che'ob. 7Jini cha'an tsa' letsi majlel Josué ti Gilgal yic'ot pejtel jini israelob yujilo' bʌ guerra. 8Lac Yum tsi' sube Josué: Mach ma' cha'len bʌq'uen. Mi caj cʌq'ueñet ti a c'ʌb pejtel jini winicob. Ma'anic mi juntiquilic a contra mu' bʌ caj i mʌjlel i cha'an, che'en lac Yum. 9Che' jini Josué tsa' loq'ui majlel ti Gilgal yic'ot i winicob. Tsi' cha'leyob xʌmbal jump'ejl ac'ʌlel. Ti ora jach tsa' c'otiyob ba' añob jini amorreojob. 10Lac Yum tsi' yotsʌbeyob i bʌq'uen jini winicob ti' tojlel israelob. Josué tsa' mʌjli i cha'an ya' ti Gabaón. Tsi' yajñesayob majlel jini amorreojob c'ʌlʌl ti Bethorón. Josué tsi' tsʌnsa jini woliyo' bʌ ti puts'el c'ʌlʌl ti Azeca yic'ot ti Maceda. 11Che' bʌ woli' puts'elob majlel, lac Yum tsi' choco jubel colem tac bʌ tunija' c'ʌlʌl ti Azeca. Ñumen cabʌlob tsa' bʌ chʌmiyob cha'an jini tunija' bajche' jini tsa' bʌ tsʌnsʌntiyob ti espada cha'an israelob.
12Ti jini jach bʌ q'uin che' bʌ lac Yum tsi' yʌc'ʌ jini amorreojob ti' c'ʌb jini israelob, Josué tsi' pejca lac Yum ti' tojlel jini israelob: La' wa'lec jini q'uin wʌ' ti Gabaón. La' wa'lec jini uw ti jini joctʌl i c'aba' Ajalón, che'en. 13Jini cha'an tsa' wa'le jini q'uin yic'ot jini uw c'ʌlʌl jinto tsa' ujti i jisañob i contrajob che' bajche' ts'ijbubil ti' juñilel Jaser. Jini q'uin wen jal tsa' wa'le ti ojlil panchan che' bajche' i ñajtlel jump'ejl q'uin yic'ot jump'ejl ac'ʌlel. 14Ma'anic yambʌ q'uin che' bajche' iliyi c'ʌlʌl wajali c'ʌlʌl wʌle, come lac Yum tsi' jac'be i t'an juntiquil winic. Lac Yum tsi' colta jini israelob ti guerra. 15Josué yic'ot pejtel israelob tsa' cha' sujtiyob ti Gilgal.
16Jini jo'tiquil yumʌlob tsa' puts'iyob ti ch'en ya' ti Maceda. 17Tsa' subenti Josué che' bʌ tsa' tajleyob ya' ti ch'en. 18Josué tsi' yʌlʌ: Ñolq'uinla majlel colem xajlel ti' ti' jini ch'en. Chocola majlel winicob cha'an mi' cʌntañob i ti' jini ch'en ba' añob jini jo'tiquil yumʌlob. 19Mach la' cʌy la' wajñesan laj contrajob. Yom mi la' jisan jini wi'il pat bʌ. Mach yomic mi' cha' sujtelob ti' tejclum tac. Jini lac Yum Dios tsa'ix i yʌc'ʌ ti la' c'ʌb laj contrajob, che'en. 20Che' jini Josué yic'ot jini israelob tsa' ujti i jisan i contrajob. Ma'anic jaytiquil tsa' bʌ mejliyob ti puts'el ti tejclum tac. 21Che' jini, jini soldadojob tsa' cha' sujtiyob ti' ñʌch'tʌlel i pusic'al ba'an Josué ya' ti Maceda. Ma'anic majqui tsa' mejli i letsan i t'an ti' contra jini israelob.
22Josué tsi' yʌlʌ: Jambenla i ti' jini ch'en. Pʌybeñonla loq'uel jini jo'tiquil yumʌlob, che'en. 23Che'ʌch tsi' meleyob. Tsi' loc'sayob ti ch'en jini jo'tiquil yumʌlob, i yumob Jerusalén, yic'ot Hebrón, yic'ot Jarmut, yic'ot Laquis, yic'ot Eglón. 24Che' tsa'ix i pʌybeyob c'otel ba' an Josué, Josué tsi' pʌyʌ tilel pejtelel jini israelob. Tsi' subeyob jini ñuco' bʌ i ye'tel cha'an guerra: Ac'ʌla la' woc ti' bic' jini yumʌlob, che'en. Jini cha'an tsi' lʌc'tesayob i bʌ. Tsi' yʌc'ʌyob i yoc ti' bic'. 25Josué tsi' yʌlʌ: Mach la' cha'len bʌq'uen. Mach yomic mi la' lij la' bʌ. Yom p'ʌtʌletla. Yom ch'ejletla. Come lac Yum che'ʌch mi caj i melbeñob pejtel mu' bʌ la' contrajin, che'en Josué. 26Josué tsi' tsʌnsayob. Tsi' joc'chocoyob jini ch'ujlelʌl ti jo'tejc te'. Ya' tsa' cʌleyob c'ʌlʌl tsa' ic'a. 27Che' wolix i bʌjlel jini q'uin, Josué tsi' yʌc'ʌ ti ch'ʌjmel jubel ti te' jini yumʌlob. Tsi' chocoyob ochel ti jini jach bʌ ch'en ya' ba' tsa' puts'iyob. Tsi' lʌtsʌyob colem xajlel ya' ti' ti'. C'ʌlʌl wʌle ya' to an jini xajlel.
28Ti jini jach bʌ q'uin Josué tsi' ch'ʌmʌ jini tejclum i c'aba' Maceda. Tsi' lu' tsʌnsa jini yumʌl yic'ot pejtel jini chumulo' bʌ ti tejclum. Ma'anic majqui tsa' cʌle. Josué tsi' tsʌnsa jini yumʌl ti Maceda che' bajche' tsi' tsʌnsa jini yumʌl ya' ti Jericó. 29Che' jini Josué yic'ot pejtelel israelob tsi' cʌyʌyob Maceda. Tsa' majli i contrajiñob Libna. 30Lac Yum tsi' yʌc'ʌ ti' c'ʌb jini israelob jini yumʌl yic'ot pejtel año' bʌ ti tejclum. Tsi' tsʌnsayob pejtelel jini ya' bʌ chumulob. Ma'anic majqui tsa' cʌle. Josué tsi' tsʌnsa jini yumʌl che' bajche' tsi' tsʌnsa i yum Jericó. 31Josué yic'ot pejtelel jini israelob tsa' loq'uiyob ti Libna cha'an mi' majlelob ti Laquis. Tsi' contrajiyob ja'el. 32Lac Yum tsi' yʌc'ʌ ti' c'ʌb jini israelob. Tsa' ochiyob ti Laquis che' ti' cha'p'ejlel q'uin. Tsi' tsʌnsayob pejtelel ya' bʌ chumulob che' bajche' tsi' cha'leyob ti Libna.
33Horam jini yumʌl ti Gezer tsa' majli i coltan jini año' bʌ ti Laquis. Josué tsi' tsʌnsa jini yumʌl yic'ot i winicob. Ma'anix majch tsa' cʌle. 34Josué yic'ot jini israelob tsa' loq'uiyob ti Laquis cha'an mi' majlelob ti Eglón. Tsi' joy mʌctayob. 35Tsi' contrajiyob. Ti jini jach bʌ q'uin tsa' mʌjliyob i cha'an. Tsi' tsʌnsayob pejtelel jini ya' bʌ chumulob che' bajche' tsi' meleyob ya' ti Laquis. 36Josué yic'ot jini israelob tsa' loq'uiyob ti Eglón cha'an mi' majlelob ti Hebrón. Tsi' contrajiyob. 37Tsa' mʌjliyob i cha'an. Tsi' tsʌnsayob jini yumʌl yic'ot pejtel chumulo' bʌ ti Hebrón yic'ot ti jini xchumtʌl tac am bʌ ti' joytilel. Che' bajche' ti Eglón, ma'anix majqui tsa' cʌle. Tsi' jisayob pejtelel cuxulo' bʌ che' bajche' lac Yum tsi' subeyob. 38Che' jini Josué yic'otob pejtelel israelob tsa' majliyob ba'an Debir. Tsi' contrajiyob. 39Tsa' mʌjliyob i cha'an. Tsi' tsʌnsayob jini yumʌl yic'ot pejtelel chumulo' bʌ ti tejclum yic'ot ti jini xchumtʌl tac am bʌ ti' joytilel. Ma'anix majqui tsa' cʌle. Tsi' tsʌnsayob jini año' bʌ ti Debir yic'ot i yum che' bajche' tsi' meleyob ti Hebrón, yic'ot ti Libna.
40Che' bajche' iliyi Josué tsi' jisa pejtelel año' bʌ ti wits tac yic'ot ti Neguev, yic'ot ti joctʌl, yic'ot ti bujtʌl. Tsi' tsʌnsa pejtelel jini yumʌlob c'ʌlʌl jinto ma'anix majqui tsa' cʌle. Tsi' jisayob pejtelel jini cuxulo' bʌ, come che'ʌch tsi' yʌc'ʌ mandar lac Yum i Dios Israel. 41Josué tsi' tsʌnsa winicob c'ʌlʌl ti Cades Barnea, c'ʌlʌl ti Gaza. Tsi' jisa pejtelel año' bʌ ti lumal Gosén c'ʌlʌl ti Gabaón. 42Tsa' mʌjli i cha'an Josué ti' tojlel pejtelel jini yumʌlob che' ti junyajl jach. Tsi' ch'ʌmʌ ti' wenta i lumal. Come lac Yum i Dios Israel tsi' colta jini israelob. 43Josué tsa' sujti yic'ot pejtelel israelob ya' ba' tsa' jijleyob ti Gilgal.
Currently Selected:
JOSUE 10: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.