JOSUE 8
8
Tsa' jisʌntiyob jini año' bʌ ti Hai
1Lac Yum Dios tsi' sube Josué: Mach a cha'len bʌq'uen. Mach ma' lij a bʌ. Pʌyʌ majlel pejtelel winicob yujilo' bʌ guerra. Cucula ti guerra ti' contra jini Hai. Joñon mi caj cʌq'ueñet jini yumʌl ti Hai, yic'ot i winicob, yic'ot i tejclum, yic'ot i lum. 2Yom ma' mel che' bajche' tsa' mele ya' ti Jericó. Tsʌnsan jini winicob x'ixicob año' bʌ ti Hai yic'ot i yum. Jini i chubʌ'an che' bajche' caballo yic'ot mula, la' cha'añʌch. Ya' ba' mi' bʌjlel q'uin, yom ma' joy mʌctan jini tejclum. Che' tsi' yʌlʌ lac Yum.
3Josué tsi' chajpa i bʌ yic'ot jini winicob yujilo' bʌ guerra. Tsi' yajca lujuntiquil i cha'c'al mil winicob yujilo' bʌ guerra. Tsi' chocoyob majlel che' ti ac'ʌlel. 4Tsi' subeyob: Mʌctanla jini tejclum ya' ti' tojel ba' mi' bʌjlel q'uin. Mach mi la' ñajt'esan la' bʌ ti jini tejclum. Yom yʌxʌl la' wo. 5Joñon quic'ot yambʌ soldadojob mi caj c majlel lojon ti' contra jini tejclum. Che' woli' loq'uelob tij contra lojon che' bajche' tsi' meleyob ti yambʌ ora, mi caj c majlel lojon ti ajñel ti' tojel i wut. 6Mi caj i tsajcañonla tilel jinto mi' cʌytʌl ti ñajtʌl jini tejclum. Mi caj i lon alob: “Woliyob ti puts'el che' bajche' ti ñaxan. Conla ja'el”, che'ob. 7Che' woliyonix lojon ti puts'el, yom mi la' wochel ti tejclum. Lac Yum Dios mi caj i yʌc' ti la' c'ʌb jini tejclum. 8Che' bʌ tsa'ix ochiyetla, otsʌbenla c'ajc che' bajche' tsi' yʌlʌ lac Yum. Wen ña'tanla che' bajche' wolic subeñetla, che'en Josué.
9Che' jini Josué tsi' choco majlel i winicob ti junwejl jini tejclum ti' tojel i bʌjlibal q'uin. Tsa' cʌleyob ti ojlil bij ti' tojel Hai yic'ot Betel. Josué tsi' ñusa ac'ʌlel yic'ot yambʌ soldadojob. 10Tsa' ch'ojyi ti wen sʌc'ajel. Tsi' pʌyʌ tilel jini soldadojob. Tsa' majliyob ti guerra ti' contra Hai. Ñaxan tsa' majli Josué yic'ot soldadojob israelob añobix bʌ i jabilel. 11Pejtel jini soldadojob tsa' bʌ majliyob yic'ot Josué tsi' lʌc'tesayob i bʌ ti jini tejclum. Tsa' jijliyob ti' tojel norte ba'an jini tejclum. An joctʌl ya' ti ojlil. 12Josué tsi' choco majlel jo'p'ejl mil winicob cha'an mi' mʌctañob Hai ti' bijlel Betel ya' ti' tojel i bʌjlibal q'uin. 13Che' bʌ tsa' ic'a tsa' ajniyob jini jo'p'ejl mil israelob ti junwejl tejclum. Ya' ti norte ti' tojel Hai tsa' ajniyob pejtelel yaño' bʌ israelob yic'ot Josué. Josué tsa' cʌle jump'ejl ac'ʌlel ya' ti' yojlil jini joctʌl.
14Jini yumʌl am bʌ ti Hai tsi' q'uele jini israelob. Tsa' ch'ojyi ti wen sʌc'an yic'ot i winicob. Tsa' loq'ui i contrajin jini israelob ti guerra. Pero ma'anic tsi' ña'tayob ya' woli' chijtañob yambʌ soldadojob ya' ti' tojel i bʌjlibal q'uin. 15Josué yic'ot pejtel israelob tsi' lo'loyob. Tsa' cha' puts'iyob majlel ti' bijlel jini jochol bʌ lum. 16Jini winicob año' bʌ ti Hai tsi' tempayob i bʌ cha'an mi' yajñesañob majlel Josué yic'ot i winicob. Tsi' cʌyʌyob jini tejclum ti ñajtʌl. 17Ma'anix tsa' cʌleyob winicob ti Hai. Jochol tsa' cʌle jini tejclum.
18Che' jini lac Yum tsi' sube Josué: Tuch'u a lanza am bʌ ti a c'ʌb ti' tojel Hai, come joñon mi caj cʌq'ueñet jini tejclum, che'en. Josué tsi' tuch'u jini lanza am bʌ ti' c'ʌb che' bajche' tsi' yʌlʌ lac Yum. 19Che' bʌ tsi' tuch'u jini lanza Josué, ti ora tsa' loq'uiyob tilel jini woli bʌ i chijtañob Hai. Ti ajñel tsa' ochiyob ti jini tejclum. Tsa' mʌjliyob i cha'an. Ti ora jach tsi' yotsʌbeyob i c'ʌc'al jini Hai. 20Jini winicob tsa' bʌ loq'uiyob ti Hai tsi' sutq'uiyob i wut i q'uel i tejclum. Woli i loq'uel cabʌl buts'. Ma'anic tsa' mejliyob ti puts'el, come jini israelob woli bʌ i puts'elob majlel tsa' sujtiyob tilel ti' tojlelob. 21Josué yic'ot jini israelob tsi' q'ueleyob che' bʌ tsa' ochiyob ti tejclum jini tsa' bʌ i cha'leyob chijt. Che' wolix i loq'uel buts', tsa' sujtiyob cha'an mi' contrajiñob i winicob Hai. 22Tsa' cha' loq'uiyob ti tejclum jini jo'p'ejl mil israelob cha'an mi' coltañob i pi'ʌlob. Tsi' joy mʌctayob i winicob Hai. Ma'anic tsa' mejliyob ti puts'el mi juntiquilic. Jini israelob tsi' tsʌnsayob pejtel i contrajob. 23Cuxul tsa' pʌjyi tilel i yum Hai ba'an Josué.
24Che' bʌ tsa'ix ujti i tsʌnsañob pejtelel i winicob Hai tsa' bʌ i tajayob ti jochol bʌ lum, jini israelob tsa' majliyob ba'an Hai. Tsi' tsʌnsayob ti espada jini ya' to bʌ añob ti tejclum. 25I yonlelob jini tsa' bʌ jisʌntiyob ti jini q'uin jiñʌch lajchʌmp'ejl mil winicob yic'ot x'ixicob. Tsa' laj jisʌntiyob jini año' bʌ ti Hai. 26Come jini Josué maxto anic tsi' ju'sa i c'ʌb yic'ot jini lanza c'ʌlʌl jinto tsi' laj tsʌnsayob pejtelel año' bʌ ti Hai. 27Jini jach tsi' ch'ʌmʌyob jini alʌc'ʌl yic'ot yambʌ chubʌ'añʌl am bʌ ti Hai che' bajche' lac Yum tsi' sube Josué. 28Josué tsi' laj pulu Hai. Tsa' sujti ti misujelʌl. Tsiquil c'ʌlʌl wʌle. 29Jini i yum Hai tsa' jich'choconti ti te' jinto tsa' ochi ac'ʌlel. Che' iq'uix pañimil Josué tsi' yʌc'ʌ i t'an cha'an mi' ju'sʌbeñob i bʌc'tal ti jini te'. Tsi' chocoyob jini ch'ujlelʌl ya' ti' ti' jini tejclum. Tsa' p'uchchoconti cabʌl xajlel ti pam ch'ujlelʌl ba' tsiquil c'ʌlʌl wʌle.
Ya' ti wits i c'aba' Ebal
(Dt. 27.1-26)
30Ti jim bʌ ora Josué tsi' melbe i pulʌntib i majtan lac Yum i Dios Israel. Tsi' mele ya' ti wits i c'aba' Ebal. 31Ts'ijbubilix cha'an Moisés i winic lac Yum ti' juñilel mandar. Moisés tsi' subeyob israelob cha'an mi' melob pulʌntib ti xajlel mach bʌ lajbilic ti tsucul taq'uin. Tsi' pulbeyob i majtan lac Yum cha'an ñʌch'ʌlob i pusic'al. 32Ya' ti' tojlel jini israelob Josué tsi' ts'ijbu ti pam jini xajlel jini lujump'ejl mandar che' bajche' ts'ijbubil ti' juñilel Moisés. 33Ya' wa'alob pejtelel israelob, jini xñoxob yic'ot año' bʌ i ye'tel ti jujunwejl jini Arca ti' tojel i wut jini motomajob yic'ot levíjob mu' bʌ i q'uechob majlel jini Arca ba' lotol jini Xuc'ul bʌ i T'an lac Yum. Ya' añob ja'el jini ñajt bʌ ch'oyolob tsa' bʌ tiliyob ti chumtʌl ti' tojlelob. Lamital ya' añob ti yebal wits i c'aba' Gerizim. Yaño' bʌ ya' añob ti yebal wits i c'aba' Ebal. Che'ʌch tsi' meleyob cha'an mi' ts'ʌctesañob i mandar Moisés i winic lac Yum cha'an mi' yʌq'uentelob i yutslel i t'an lac Yum.
34Josué tsi' pejca pejtelel i t'an Moisés am bʌ ti' juñilel mandar, pejtel jini albil bʌ t'an, jini uts bʌ yic'ot jini wocol bʌ. 35Ma'anic mi jump'ejlic t'an subebil bʌ ti mandar cha'an Moisés mach bʌ anic tsi' q'uele Josué. Tsi' lu' q'uele ti' tojlel pejtelel israelob, winicob yic'ot x'ixicob yic'ot alʌlob yic'ot mach bʌ mero i lumalobic ya' bʌ chumulob yic'otob.
Currently Selected:
JOSUE 8: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.