JOSUE 14
14
Tsa' t'oxle Canaán
1Jiñʌch jini lum tsa' bʌ i ch'ʌmʌyob jini israelob ya' ti Canaán. Jini motomaj Eleazar yic'ot Josué i yalobil Nun, yic'ot jini tatʌlo' bʌ tsi' t'oxbeyob jini israelob. 2Lac Yum tsi' sube Moisés ti mandar cha'an mi' cha'len yajcaya ti alas ti' tojlelob jini bolonmojt yic'ot lamital Manasés. Jiñobʌch i p'olbalob Israel. 3Moisés tsi' yʌq'ueyob i lum jini ojlil i yuxp'ejl tribu ti' tojel Jordán ja' ba' mi' pasel q'uin. Pero ma'anic tsi' yʌq'ue i lum jini levíjob. 4An cha'tiquil i yalobilob José, jiñʌch Manasés yic'ot Efraín, i wentajʌch cha'mojt israelob. Jini cha'an ma'anic tsa' aq'uentiyob i lum jini levíjob. Jini jach tsa' aq'uentiyob jini tejclum tac ba' tsa' chumleyob. Tsa' aq'uentiyob ja'el potrero tac cha'an i yʌlac'ob. 5Jini israelob tsa' t'oxbentiyob jini lum che' bajche' lac Yum tsi' yʌq'ue mandar Moisés.
Caleb tsa' aq'uenti Hebrón
6Tsa' c'otiyob i p'olbal Judá ba'an Josué ya' ti Gilgal. Caleb i yalobilʌch Jefone, jini cenezeo. Caleb tsi' sube Josué: C'ajal a cha'an chuqui lac Yum tsi' sube Moisés i winic Dios ya' ti Cades Barnea. Tsi' yʌq'ueyonla albil bʌ t'an ti lac cha'ticlel. 7Anix cha'c'al c jabilel che' bʌ tsi' chocoyon majlel Moisés i winic lac Yum cha'an mij cʌn jini lum. Toj tsac tsictesa. 8C pi'ʌlob tsa' bʌ majliyob quic'ot tsi' yotsʌbeyob i ch'ijiyemlel i pusic'al winicob x'ixicob. Pero joñon xuc'ul tsac tsajca lac Yum Dios ti pejtelel c pusic'al. 9Ti jim bʌ ora tsi' yʌc'ʌ i t'an Moisés: “Jini lum ya' ba'añet a cha'añʌch. I cha'añʌch a walobilob mu' bʌ caj i tilel ja'el, come xuc'ul tsa' ts'ʌctesʌbe chuqui yom lac Yum Dios”, che'en.
10Lac Yum tsa'ix i coltayon che' bajche' tsi' yʌlʌ. Anix jo'p'ejl i yuxc'al (45) jab Moisés tsi' yʌlʌ ili t'an tic tojlel che' woliyob ti xʌmbal jini israelob ti colem bʌ i tiquiñal lum. Wʌle anix jo'p'ejl i jo'c'al (85) c jabilel. 11C'ʌlʌl wʌle p'ʌtʌlon to che' bajche' ti jini q'uin che' bʌ tsi' chocoyon majlel Moisés. Ch'ejlon to. Mu' to mejlel c cha'len guerra che' bajche' ti wajali. 12Aq'ueñon wʌle jini lum am bʌ ti wits che' bajche' tsi' yʌlʌ lac Yum. Ya' añob jini anaceojob che' bajche' tsa' wubi ti jim bʌ ora. Colem i tejclum tac. Wen chajpʌbilob cha'an guerra. Mi cʌl lac Yum mi caj i coltañon. Che' jini mi mejlel c chocob loq'uel che' bajche' lac Yum tsi' subu, che'en.
13Josué tsi' yʌq'ue i yutslel i t'an Caleb. Tsi' yʌq'ue i ch'ʌm jini lum am bʌ ti Hebrón. 14Jini cha'an Hebrón i cha'añʌch Caleb i yalobil Jefone jini cenezeo yic'ot i yalp'eñelob c'ʌlʌl wʌle, come xuc'ul tsi' mele jini tsa' bʌ i yʌlʌ lac Yum i Dios Israel. 15I c'aba' Hebrón ti ñaxan jiñʌch Quiriat Arba. Jini Arba jiñʌch ñuc bʌ winic ti' tojlel anaceojob. Tsa' ñʌjch'i guerra ti jini tejclum tac.
Currently Selected:
JOSUE 14: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.