JOSUE 15
15
I lum Judá
1Jiñʌch jini lum tsa' bʌ aq'uenti i p'olbalob Judá che' bajche' c'amel añob ti' yotot tac. Ya' jaxʌl i cayajon Edom ti jochol bʌ lum i c'aba' Zin c'ʌlʌl ti Neguev am bʌ ti sur, 2ya' ti' ti' jini Ñajb i c'aba' Ats'am, ya' ba' tsa' majli ja' ti Neguev. 3I cayajon tsa' c'axi ti sur ya' ba' mi' letsel ti Acrabim. Tsa' ñumi ba'an Zin. Tsa' c'axi ti' tojel Cades Barnea ti sur. Tsa' ñumi ba'an Hezrón. Tsa' c'axi ti Adar. Tsa' joy ñumi ba'an Carca. 4Tsa' c'axi ba'an Asmón. Tsa' c'oti ba'an jini ja' am bʌ ti Egipto. Ya' jaxʌl ti colem ñajb. Jiñʌch jini cayajon am bʌ ti sur.
5Jini cayajon am bʌ ti' pasibal q'uin jiñʌch najb i c'aba' Ats'am c'ʌlʌl ya' ba' mi' loq'uel jini Jordán ja' ti jini najb. Jini cayajon am bʌ ti norte tsa' c'axi ba'an ñajb ya' ba' mi' loq'uel Jordán ja' 6c'ʌlʌl ti Bethogla. Tsa' c'axi ti Betarabá c'ʌlʌl ti xajlel i cha'an Bohán i yalobil Rubén. 7Tsa' c'axi ti Debir am bʌ ti joctʌl i c'aba' Acor. Tsa' joy ñumi ti norte ba'an Gilgal ti' tojel jini wits i c'aba' Adumín am bʌ ti joctʌl ya' ti sur. Tsa' c'axi jini cayajon ya' ti ja' ba'an Ensemes. Tsa' c'oti ti Rogel. 8Tsa' c'axi jini cayajon ba'an jini joctʌl i c'aba' Ben Hinom ti' tojel jini jebuseojob ti sur, jiñʌch Jerusalén. Tsa' c'axi ti' jol wits am bʌ ti' tojel Hinom ba' mi' bʌjlel q'uin, am bʌ ti joctʌl i c'aba' Refaim ya' ti norte. 9Che' jini tsa' c'axi loq'uel jini cayajon ti' jol wits c'ʌlʌl tsa' c'oti ti ja' i cha'an Neftoa. Tsa' c'axi ba'an jini tejclum tac am bʌ ti wits i c'aba' Efrón. Tsa' c'oti ba'an Baala. Jiñʌch Quiriat Jearim. 10Tsa' ñumi ti Baala c'ʌlʌl tsa' c'oti ti' tojel Seir ba' mi' bʌjlel q'uin. Tsa' c'axi ti' tojel jini wits i c'aba' Jearim ti norte. Jiñʌch Quesalón. Tsa' c'axi ti Betsemes yic'ot ti Timna. 11Tsa' ñumi jini cayajon c'ʌlʌl tsa' c'oti ti' tojel jini Ecrón am bʌ ti norte, yic'ot ti Sicrón. Tsa' c'axi ti wits i c'aba' Baala. Tsa' c'oti ti Jabneel yic'ot ti ñajb. 12Ya' jaxʌl ti' bʌjlibal q'uin ba'an colem ñajb. Jiñʌch pejtelel i lum i p'olbalob Judá che' bajche' c'amel jini otot tac.
Caleb tsa' mʌjli i cha'an
(Jue. 1.10-15)
13Tsa' aq'uenti lum jini Caleb i yalobil Jefone ti' tojlel jini año' bʌ ti Judá che' bajche' lac Yum tsi' sube Josué. Jiñʌch Hebrón ya' ti' lum Quiriat Arba. Jini Arba i tatʌch jini anaceojob. 14Caleb tsi' choco loq'uel jini uxtiquil anaceojob i p'olbalo' bʌ Anac, i c'aba'ob Sesai, Ahimán yic'ot Talmai. 15Caleb tsi' contraji jini año' bʌ ti Debir. I c'aba' wajali jiñʌch Quiriat Sefer. 16Caleb tsi' yʌlʌ: Jini mu' bʌ i contrajin Quiriat Sefer, mu' bʌ i ch'ʌme', joñon mi caj cʌq'uen Acsa jini xch'oc bʌ calobil cha'an i yijñam, che'en. 17Tsi' ch'ʌmʌ Otoniel i yalobil Cenez i yeran Caleb. Caleb tsi' yʌq'ue i pʌy jini xch'oc i c'aba' Acsa. 18Che' bʌ tsi' pʌyʌ Otoniel, Acsa tsi' xic'be cha'an mi' c'ajtiben lum ti' tojlel i tat. Acsa tsa' jubi ti burro cha'an mi' pejcan i tat. Caleb tsi' c'ajtibe: ¿Chuqui a wom? che'en. 19Acsa tsi' jac'ʌ: Awocolic, pʌsbeñon i yutslel a t'an. Tsa'ix a wʌq'ueyon jini tiquin bʌ lum am bʌ ti Neguev. Aq'ueñon cuxul bʌ ja' ja'el, che'en. Jini cha'an Caleb tsi' yʌq'ue jini cuxul bʌ ja' am bʌ ti chan yic'ot jini am bʌ ti entʌl.
Jini lum tac am bʌ ti Judá
20Jiñʌch i lumob tsa' bʌ aq'uentiyob i p'olbal Judá, che' bajche' c'amel jini otot tac. 21-32Jiñʌch i lum Judá ya' ba' jaxʌl ba'an Edom am bʌ ti sur:
Cabseel, Edar, Jagur, Cina, Dimona, Adada, Cedes, Hazor, Itnán, Zif, Telem, Bealot, Hazor Hadata, Queriot, Hezrón (jiñʌch Hazor), Amam, Sema, Molada, Hazargada, Hesmón, Betpelet, Hazarsual, Beerseba, Bizotia, Baala, Iim, Esem, Eltolad, Quesil, Horma, Siclag, Madmana, Sansana, Lebaot, Silhim, Aín yic'ot Rimón, bolomp'ejl i cha'c'al (29) tejclum tac yic'ot jini xchumtʌl tac ti pejtelel.
33-36Jiñʌch tejclum tac am bʌ ti joctʌl:
Estaol, Zora, Asena, Zanoa, Enganim, Tapúa, Enam, Jarmut, Adulam, Soco, Azeca, Saaraim, Aditaim, Gedera yic'ot Gederotaim, chʌnlujump'ejl (14) tejclum yic'ot jini xchumtʌl tac. 37-45Zenán, Hadasa, Migdalgad, Dileán, Mizpa, Jocteel, Laquis, Boscat, Eglón, Cabón, Lahmam, Quitlis, Gederot, Betdagón, Naama yic'ot Maceda, wʌclujump'ejl (16) tejclum yic'ot jini xchumtʌl tac. Libna, Eter, Asán, Jifta, Asena, Nezib, Keila, Aczib yic'ot Maresa, bolomp'ejl tejclum tac yic'ot jini xchumtʌl tac. Ecrón yic'ot jini xchumtʌl tac.
46Pejtelel jini tejclum tac an tac bʌ ti ojlil yic'ot Ecrón yic'ot jini ñajb, pejtelel jini tejclum tac lʌc'ʌl ba'an Asdod yic'ot jini xchumtʌl tac. 47Asdod yic'ot jini xchumtʌl tac, Gaza yic'ot jini xchumtʌl tac c'ʌlʌl ti ja' am bʌ ti Egipto yic'ot i ti' jini colem bʌ ñajb.
48-62Jini an tac bʌ ti wits jiñʌch iliyi:
Samir, Jatir, Soco, Dana, Quiriatsana (jiñʌch Debir), Anab, Estemoa, Anim, Gosén, Holón yic'ot Gilo, junlujump'ejl tejclum yic'ot jini xchumtʌl tac. Arab, Duma, Esán, Janum, Bettapúa, Afeca, Humta, Quiriat Arba (jiñʌch Hebrón) yic'ot Sior, bolomp'ejl tejclum yic'ot jini xchumtʌl tac. Maón, Carmel, Zif, Juta, Jezreel, Jocdeam, Zanoa, Caín, Gabaa yic'ot Timna, lujump'ejl tejclum tac yic'ot jini xchumtʌl tac. Halhul, Betsur, Gedor, Maarat, Betanot yic'ot Eltecón, wʌcp'ejl tejclum tac yic'ot xchumtʌl tac. Quiriat Baal (jiñʌch Quiriat Jearim) yic'ot Rabá, cha'p'ejl tejclum tac yic'ot jini xchumtʌl tac. Jini an tac bʌ ti tiquin bʌ lum: Betarabá, Midín, Secaca, Nibsán, Irmelac Engadi, wʌcp'ejl tejclum tac yic'ot jini xchumtʌl tac.
63Jini winicob año' bʌ ti Judá ma'anic tsa' mejli i chocob loq'uel jini jebuseojob chumulo' bʌ ti Jerusalén. Lajal woliyob ti chumtʌl ti Jerusalén jini jebuseojob yic'otob judíojob c'ʌlʌl wʌle.
Currently Selected:
JOSUE 15: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.