JOEL 2
2
1Wusula trompeta ya' ti Jerusalén cha'an mi' ch'ojyelob. La' ch'ojyicob ya' ti ch'ujul bʌ wits c cha'an. La' i yubiñob tsiltsilñʌyel ti bʌq'uen ti pejtelelob, come lʌc'ʌlix tal i q'uiñilel lac Yum. 2Jiñʌch i yorajlel i yi'ic'lel yic'ot ic'yoch'an bʌ pañimil, cabʌl tocal yic'ot i'ic' bʌ pañimil. Mi caj i tilel cabʌl sajc' mu' bʌ caj i mos jini wits tac che' bajche' ic'yoch'an bʌ pañimil. Wen ñucob, wen p'ʌtʌlob. Maxto anic ba' tsa' tsictiyi che' bajche' jini. Ma'anix mi caj i cha' tilel yambʌ lajal bʌ c'ʌlʌl ti' jilibal pañimil. Jiñʌch i cajibal i q'uiñilel lac Yum.
3Woli' ñumel c'ajc ya' ti' tojel i wutob. Woli ti lejmel c'ajc ya' ti' patob. Ya' ti jujunwejl i t'ojol jax jini lum che' bajche' jini pʌc'ʌbʌl ti Edén, pero mi caj i jisañob. Ma'anic chuqui mi caj i wis cʌytʌl. 4Che' yilalob bajche' ch'och'oc bʌ caballo. Ora mi' cha'leñob ajñel che' bajche' caballo ti guerra. 5Mi' tijp'el tac ñumel ti' pam wits. Ubinla i t'an che' bajche' i t'an carreta tac tujc'ʌbil bʌ majlel, che' bajche' i t'an jini c'ajc che' mi' pulel cholel. Lajalʌch bajche' soldadojob mu' bʌ i chajpañob i bʌ cha'an guerra.
6Mi' toj sajtelob i pusic'al winicob x'ixicob cha'an bʌq'uen. Mi' sʌc'añob i wut cha'an bʌq'uen. 7Ajñel mi' tilel sajc' che' bajche' soldadojob. Mi' c'axelob ti' pam ts'ajc che' bajche' yujilo' bʌ guerra. Toj mi' cha'leñob xʌmbal. Ma'anic mi' jemob i tsolomlel tac. 8Ma'anic mi' cujob i bʌ. Tsolocña mi' tilelob. Mach mejlic ti mʌctʌntel ti e'tijibʌl tac. 9Jomocña mi' yochelob ti tejclum. Mi' cha'leñob ajñel ti' pam ts'ajc. Mi' letselob ochel ti otot. Mi' yochelob ti ventana che' bajche' xujch'. 10Mi' cha'len yujquel jini pañimil cha'an jini mote' sajc'. Jini panchan mi' ñijcan i bʌ ja'el. Mi' yic'an jini q'uin yic'ot uw cha'an bajc'ʌlob. Mach chʌn tsiquilix ec'.
11Lac Yum mi' pʌyob tilel ti c'am bʌ t'an che' bajche' p'ʌtʌlo' bʌ soldadojob i cha'an. Mi' jac'beñob i t'an. Come bʌbʌq'uen jax i Q'uiñilel lac Yum. ¿Majqui mi mejlel i cuch?
I yutslel i pusic'al lac Yum
12Jini cha'an mi' yʌl lac Yum: Sutq'uin la' bʌ ba' añon ti pejtelel la' pusic'al che' anto i yorajlel. Cha'lenla ch'ajb. Cha'lenla uq'uel. Yom ch'ijiyem la' pusic'al, che'en. 13Mach mi la' tsil la' pislel che' ch'ijiyem la' pusic'al, pero yom pec' mi la' mel la' pusic'al. Sutq'uin la' bʌ ba'an lac Yum Dios, come an i yutslel i pusic'al. Yujil i p'untañetla. Mach orajic mi' mich'an. Cabʌl i yutslel i pusic'al. C'ux mi' yubiñet che' mi' ju'sʌbeñet la' pusic'al. 14Tic'ʌl mi che' jini ma'anic mi caj i choquetla. Tic'ʌl mi caj i yʌq'ueñetla i yutslel i pusic'al lac Yum cha'an mi la' cha' aq'uen trigo yic'ot i ya'lel ts'usub.
15Wusula jini trompeta ya' ti Sion. Tempanla winicob x'ixicob. Subeñob cha'an mi' cha'leñob ch'ajb. 16Tempanla tilel ti pejtelelob cha'an mi la' suben Dios la' mul, jini ñoxobix bʌ yic'ot alp'eñelob yic'ot alobob. Pʌyʌla tilel jini ch'iton woli bʌ ti ñujpuñel yic'ot xch'oc.
17Jini motomajob mu' bʌ i melbeñob i ye'tel Dios mi caj i wa'tʌlob ti' ts'ejts'ejtʌl i pulʌntib i majtan Dios ti' tojlel winicob x'ixicob. La' i cha'leñob uq'uel che' mi' melob oración. La' i yʌlob: C Yum lojon, ñusʌbeñob i mul jini winicob x'ixicob. Mach ma' wʌc'ob ti' wenta jini sajtemo' bʌ cha'an mi' tse'tañob, come a cha'añobʌch. Mach yomic mi' yʌjq'uelob ti quisin ti' tojlel jini ñajt bʌ chumulob mu' bʌ i lon alob: “¿Bacan i Dios?” che'ob. Che'ʌch yom mi' pejcañob Dios jini motomajob.
18Lac Yum mi caj i jac'beñob i yoración. Mi caj i ñusʌbeñob i mul i cha'año' bʌ. Lac Yum mi caj i cha'len mich'ajel cha'an tsa' ts'a'lenti i lumal. 19Lac Yum mi caj i suben i cha'año' bʌ: Awilan, wolic chocbeñetla tilel cabʌl ixim yic'ot vino yic'ot aceite. Mi caj i wen jastiyel la' cha'an. Ma'anix mi caj c chʌn aq'uetla ti ts'a'lentel ti' tojlel jini sajtemo' bʌ. 20Mi caj c cha' wets' majlel ti ñajtʌl a contrajob ch'oyolo' bʌ ti norte. Mi caj c chocob majlel ya' ti colem bʌ i tiquiñal lum ba' mi caj i laj chʌmelob. Ojlil mi caj i wejts'el ochel ti ñajb i c'aba' Chʌmen Bʌ, yambʌ ojlil ti colem ñajb Mediterráneo. Mi caj i c'ʌlʌl c'otel i tuwel ti lum. Lac Yum tsa'ix i pʌsʌ jini ñuc bʌ i p'ʌtʌlel.
21Winicob x'ixicob c cha'añet bʌ la, mach mi la' cha'len bʌq'uen. Yomix wen tijicñayetla, come tsa'ix c mele ñuc tac bʌ cha'añetla. 22Jini alʌc'ʌl tac mux caj i cha' taj i bʌl i ñʌc'. Mi caj i cha' yʌx'an jini jam ti potrero tac. Jini te' tac mi caj i cha' ac' i wut.
23Winicob añet bʌ la ti Jerusalén, yom wen tijicña la' pusic'al. Yom wen tijicñayetla come joñon la' Yumon, la' Dioson. Tsaj cʌntesayetla bajche' yom mi la' wajñel ti toj. Tsa'ix cʌq'ueyetla ñaxan bʌ ja'al cha'an mi la' ña'tan wolic ñusʌbeñetla la' mul. Mux i cha' cajel jini ñaxan bʌ ja'al yic'ot wi'ilix bʌ. 24Mi caj i cha' bujt'el i yotlel trigo ba' mi' jajts'el loq'uel i bʌc'. Ya' ti' yʌjts'ib ts'usub mi caj i wen bejq'uel ñumel aceite olivo yic'ot i ya'lel ts'usub. 25Mi caj c cha' aq'ueñetla i cuch jini cholel tsa' bʌ i jisa jini sajc' ti chajp ti chajp che' bʌ tsac choco tilel ti la' contra che' bajche' soldadojob.
26Mux caj la' cha' wen c'ux waj c'ʌlʌl mi la' ñaj'an. Subeñonla c ñuclel come la' Yumon la' Dioson woli bʌ c pʌsbeñetla i yejtal tac c p'ʌtʌlel. Ma'anix mi caj i chʌn jisʌntel i chol c cha'año' bʌ. 27Mi caj la' ña'tan wʌ' añon ti' tojlel winicob x'ixicob ti Israel. Joñon jach la' Yumon la' Dioson. Ma'anix ba' ora mi caj la' chʌn tic'lʌntel.
Dios mi caj i yʌc' jini Espíritu
28Che' bʌ tsa'ix c cha' choco tilel ja'al, mi caj c choc tilel quEspíritu ti' tojlel pejtel winicob x'ixicob. La' walobilob mi caj i cha'leñob subt'an. An chuqui mi caj i q'uelob ti ñajal jini ñoxix bʌ la' cha'an. Jini ch'iton winicob la' cha'an mi caj i q'uelob chuqui mi' pʌsbentelob ti Dios. 29Mi caj c choc tilel quEspíritu ti' tojlel la' winicob yic'ot la' criadajob.
30Mi caj c pʌs bʌbʌq'uen tac bʌ ti panchan yic'ot pañimil: ch'ich' yic'ot c'ajc yic'ot wa'al tac bʌ buts'. 31Jini q'uin mi caj i mʌjquel i wut. Mi caj i chʌc'an i wut jini uw che' talix jini ñuc bʌ q'uin, jini bʌbʌq'uen bʌ i Q'uiñilel lac Yum. 32Majqui jach mi' pejcañon tij c'aba' mi caj i coltʌntel. Lamital año' bʌ ti Jerusalén mi caj i coltʌntelob che' bajche' tsa cʌc'ʌ c t'an, come tsac yajcayob cha'an mij coltañob, che'en lac Yum.
Currently Selected:
JOEL 2: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.