JOEL 1
1
I Q'uiñilel lac Yum
1Jiñʌch i t'an lac Yum tsa' bʌ subenti Joel i yalobil Petuel: 2Ubinla, jatetla anix bʌ la' jabilel. Ñich'tanla ti la' pejtelel, chumulet bʌ la ti' lumal Judea. Ma'anic ba' ora tsa' la' wubi ili t'an c'ʌlʌl che' alʌlet to la. Ma'anic ba' ora tsi' yubiyob la' ñojte'elob. 3Yom mi la' cha' suben la' walobilob. La' i subeñob i yalobilob ja'el. 4Che' mi' ñumel i c'ux la' pac' jini mote' sajc', mi' tilel alʌ sajc' cha'an mi' c'uxben i colobal. Mi caj i tilel jini colem jijch cha'an mi' c'ux jini tsa' bʌ i cʌyʌ jini alʌ sajc'. Ti wi'il mi caj i ñumel alʌ chup ja'el.
5Xyʌc'ʌjelet bʌ la, ch'ojyenla. Cha'lenla uq'uel, come tsa' asiyi jini ts'usubil. Tsa'ix jili pejtelel i ya'lel la' ts'usub. 6Come wen cabʌl jini jontol bʌ sajc' tic lum, mach mejlic ti tsijquel. Jay i yej bajche' i yej bajlum. 7Tsa'ix i laj jisa ts'usubil. Tsa'ix i laj ñujlube i pat jini bʌcch'umte'. Sʌsʌc tsa' cʌle i c'ʌb te'.
8Cha'lenla uq'uel che' bajche' jini c'ajtibil bʌ xch'oc che' mi' chʌmel jini ch'iton winic woli bʌ i c'ajtin. 9Jilemix i wut jam yic'ot i ya'lel ts'usub mu' bʌ i ch'ʌmob ochel ti mal Templo cha'an i majtan lac Yum. Jatetla motomajob, x'e'telet bʌ la i cha'an lac Yum, yom mi la' mel la' pusic'al. 10Ma'anix chuqui an ti pʌc'ʌbʌl. Wen ch'ijiyemob ti pejtelel pañimil, come jilemix jini trigo yic'ot ts'usub yic'ot jini aceite loq'uem bʌ ti olivote'. 11Melelʌch, woli' toj sajtel la' pusic'al mu' bʌ la' cha'len e'tel ti lum. Cha'lenla uq'uel mu' bʌ la' cha'len e'tel ti ts'usubil tac, come tsa'ix jili jini trigo yic'ot cebada. 12Tiquinix i yʌq'uil jini ts'usubil. Tsa'ix chʌmi jini bʌcch'umte'. Tsa'ix tiqui jini granado te'. Tsa'ix tiqui jini manzano te'. Pejtel jini te' tac tsa'ix tiqui. Tsa'ix jili i tijicñʌyel winicob.
13Motomajob, yom mi la' lʌp coxtal cha'an i ch'ijiyemlel la' pusic'al. I winiquet bʌ la Dios, ñusanla ac'ʌlel ti uq'uel ba'an pulʌntib, come ma'anix trigo yic'ot i ya'lel ts'usub cha'an mi la' wʌq'uen i majtan Dios. 14Tempanla winicob x'ixicob. Subeñob cha'an mi' cha'leñob ch'ajb. Pʌyʌla tilel ti pejtelob yic'ot añobix bʌ i jabilel ya' ti' Templo lac Yum Dios. Cha'lenla uq'uel ti' tojlel lac Yum.
15Aya, talix jini q'uin che' mi caj i cha'len meloñel Dios. Talix jini q'uin che' mi caj i cha'len jisaya jini Mach bʌ Anic i P'isol i P'ʌtʌlel. 16Jini i bʌl lac ñʌc' tsa'ix jili ti lac wut. Tsa'ix jili ja'el i tijicñʌyel yic'ot i ñʌch'tilel lac pusic'al ya' ti Templo. 17Jini pac' tsa'ix oc'mi ti lum. Jocholix i yotlel yic'ot i yajñib jini trigo, come tsa' to'o tiqui ya' ti cholel. 18Jini alʌc'ʌl tsa' c'uñ'a cha'an wi'ñal. Mi' caj ti uq'uel ñumel jini tat wacax come ma'anic potrero. Wen yajyajax jini tiñʌme' come ma'anix chuqui mi' taj i c'ux.
19C Yum, mic pejcañet ti c'am bʌ t'an, come jini jajmel tsa'ix i tiquesa pejtel potrero yic'ot pejtel te'. 20Jini bʌte'el ja'el mi' pejcañet ti c'am bʌ t'an come ma'anix ja'. Tsa'ix tiqui tac jini pa'. Jini potrero woli' pulel ti q'uin.
Currently Selected:
JOEL 1: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.