JOB 6
6
Job tsi' tiq'ui i cʌñʌyo' bʌ
1-2Tsa' caji ti t'an Job: La' ajq'uic ti balanza pejtel c wocol yic'ot c ch'ijiyemlel. 3Come wen alatax. Ñumen ti p'isol bajche' pejtel jini ji' am bʌ ti' ti' colem ñajb. Jini cha'an cʌlʌx jax tsac cha'le t'an. 4Come lac Yum tsi' juluyon ti' te'el i jalʌjb yubil. Tsa' wen ochi tic pusic'al i ñi' te' bombil bʌ ti veneno. Dios mi' p'ojlesan wocol tic tojlel. Mi' tempan bʌbʌq'uen bʌ cha'an mi' jisañon. 5Ch'ijiyem mi' cha'len oñel jini tat wacax che' ma'anic i buc'bal. Jini burro mach bʌ anix i yum mi' cha'len uq'uel che' ma'anix jam. 6Che' ja'el winicob mi' cajelob ti a'leya che' sup i bʌl i ñʌc'. Wersa yom i yʌts'mil i sʌquel tumut. Machiqui la com lac xejtan che' mi lac mʌc'. 7Wersa wolij c'ux jini tsa' bʌ c ts'a'le ti ñaxan.
8-9Ti pejtelel c pusic'al com mi' jac'beñon c Yum cha'an jini woli bʌ j c'ajtiben. Com mi' yʌc'on ti chʌmel cha'an mic loq'uel ba' tsʌts chuculon ti wocol. 10Anquese cabʌl c wocol, tijicña c pusic'al cha'an ma'anic tsac ts'a'libe i t'an jini ch'ujul bʌ Dios. 11¿Chucoch anto j cuxtilel che' comix chʌmel? Mach chʌn cujchix c cha'an wocol mi jal to mic chʌmel. 12Mach lajalonic bajche' xajlel mach bʌ mi' yubin wocol. Mach lajalic c bʌc'tal bajche' tsucu taq'uin. 13Come ma'anix c p'ʌtʌlel mi ts'ita'ix. Ma'anic j coltʌntel. Ma'anix chubʌ mic pijtan.
14Jini mach bʌ anic mi' p'untan i cʌñʌ bʌ wolix bʌ ti jujuc chʌmel ma'anic mi' bʌc'ñan lac Yum. 15Quermanujob, lajaletla bajche' pa' mu' bʌ i wajlen jini am bʌ i tiquin ti'. 16Mi' bujt'el pa' che' ti' yorajlel tsʌñal, 17pero ti' yorajlel ticwal mi' tiquin. 18Jini xñumelob mi' cʌyob bij cha'an mi' tajob ja', pero lolom jach mi' sʌclañob. Mi' sajtelob cha'an tiquin ti'. 19Che' talob i japob ja' jini ch'oyolo' bʌ ti Temán yic'ot ti Sabá, ma'anic chuqui mi' tajob. 20-21Che'ʌch añon ti la' tojlel bajche' jini am bʌ i tiquin ti'. Mach c tajayic chuqui tsac pijta. Ma'anic mi la' ñuq'uesʌbeñon c pusic'al. Mi la' sutq'uin la' bʌ cha'an bʌq'uen. Ma'anic mi la' coltañon. 22¿Tsa' ba j c'ajtibeyetla c majtan? ¿Tsa' ba c subeyetla cha'an mi la' wʌq'uen Dios i majtan loq'uem bʌ ti a wʌlac' cha'an mi' lajmesañonla? 23Ma'anic tsaj c'ajtibeyetla j coltʌntel cha'an mij colel ti' cʌb xtic'laya. Ma'anic tsac subeyetla: Mʌñʌyon loq'uel ti' c'ʌb jini motol bʌ xujch'ob. Ma'anic, cho'on. 24Cʌntesañon. Ñʌch'ʌlon wolic ñich'tañetla. ¿Baqui an c sajtemal? Pʌsbeñon. 25I t'an jini toj bʌ wen yujil jec'ol. Pero ¿baqui an c mul? Lolom jach mi la' wʌ'leñon. 26¿Yom ba mi la' socbeñon c t'an cha'an mi la' junyajlel chilbeñon c pijtaya? 27Lajaletla bajche' jini mu' bʌ i tic'lañob meba' alʌlob. Lajaletla bajche' winicob mu' bʌ i ñopob i chon ti jubem bʌ i tojol jini amigo i cha'an. 28Wʌle q'ueleyon. Subeñon mi woliyon ti lot. 29La' wocolic, mele la' pusic'al. Cha'lenla meloñel ti toj. Cha' ña'tanla c t'an. Ma'anic c mul. 30¿Mach ba tojic c t'an? ¿Mach ba cujilic chuqui toj?
Currently Selected:
JOB 6: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.