JOB 38
38
Dios tsi' tsictesa i ñuclel
1Dios tsa' caji i jac'ben Job ti sutujt ic': 2¿Majqui jini woli bʌ ti t'an mach bʌ yujilic chuqui woli' yʌl? Woli jach i muc c ña'tibal. 3Wa'i'. Pʌsʌ a bʌ ti wen ch'ejl che' bajche' winic. An chuqui mi caj j c'ajtibeñet. Jatet mi caj a jac'beñon.
4¿Baqui añet che' bʌ tsa' caji c wa'chocon pañimil? Subeñon mi awujil, mi ña'tibil a cha'an. 5¿Majqui tsi' wʌn ña'ta bajche' yom p'istʌl pañimil? ¿Awujil ba? ¿Majqui tsi' sʌpchoco i plomo ba' jaxʌl i ti'? 6¿Chuqui i c'ʌclib ya' ba' wa'al i yoyel? ¿Majqui tsi' yotsa jini ñuc bʌ xajlel am bʌ ti' xujc otot? 7Tsi' tem cha'leyob c'ay jini ec', che' yomix sʌc'an pañimil, che' bʌ tsi' cha'leyob oñel pejtel i yalobilob Dios cha'an tijicñayob i pusic'al.
8¿Majqui tsi' yotsʌbe i ti' colem ñajb che' bʌ tsa' caji ti tojmel loq'uel ya' ba' cʌntʌbil? 9Che' bʌ tsac pixi ti tocal che' bajche' ti tsuts, tsac bʌc'ʌ ti ic'ch'ipan bʌ pañimil. 10Tsac ñup'u ti tranca tac yilal yic'ot i ñejt'ib. 11Tsac sube ja': “C'ʌlʌl jach ilayi ma' tilel. Mach a ñusan ti p'is. Wʌ' jach jaxʌlet mi' caj ti ajñel a wa'al. Anquese chan ma' mel a bʌ wersa ma' jac' a tic'ol”, cho'on.
12Ti pejtelel a jabilel ma'anic tsa' sʌc'a pañimil ti' caj a t'an mi junyajlic. 13Ma'anic tsa' wʌc'ʌ ti pam ñumel i sʌclel pañimil cha'an mi' puts'esan jontolo' bʌ. 14Che' woli ti pasel q'uin mi' yʌc' ti q'uelol i yebal panchan. Mi' tsictesan wits yic'ot joctʌl. Che' wolix i pʌs i bʌ q'uin mi' lu' tsictesan. 15¿Tsa' ba a bʌc'tesa xjontolilob ya' ba' mi' yajñelob? ¿Tsa' ba a mʌctʌbe i c'ʌb xjontolil che' woli ti jats'?
16¿Tsa' ba ochiyet ti yebal colem ñajb cha'an ma' cʌn ñumel i ch'eñal ba' ch'oyol i ya'lel? 17¿Tsa' ba pʌsbentiyet i yochib chʌmel? ¿Tsa' ba c'otiyet ti' yochib ic'yoch'an bʌ? 18¿Tsa' ba a lu' q'uele i pam pañimil?
19Subeñon mi awujil pejtel jini. ¿Baqui ch'oyol i sʌclel pañimil? Pʌsbeñon i bijlel. Subeñon baqui tilem jini ic'yoch'an bʌ. 20¿Mejl ba a tsajcan majlel c'ʌlʌl ba' ch'oyol? 21Wen awujil ti pejtelel come i yʌscunet pañimil. Cabʌl jax a pusic'al come wen ñoxetix.
22-23¿Tsa' ba a q'uele ba' tsa' p'ojli i ña'al tsʌñal yic'ot tuñija'? I wentajʌch e'tijibʌl cha'an i yorajlel guerra. Jal tsac tempa cha'an mic chocbeñob tilel wocol winicob woliyo' bʌ ti leto. 24¿Baqui ch'oyol i sʌclel pañimil? ¿Bajche' mi' pam ñumel ti pañimil? ¿Baqui ch'oyol jini tiquin bʌ ic' am bʌ i ticwʌlel?
25Subeñon majqui tsi' mele joctʌl ba' cholocña mi' cha'len xʌmbal majlel ja' che' mi' yujtel wen ja'al. ¿Majqui tsi' melbe i bijlel chajc yujil bʌ t'an? 26Mi' choc tilel ja'al ti jochol bʌ lum yic'ot ti tiquin lum ba' ma'anic xchumtʌl, 27cha'an mi' jastiyel ya' ba' ch'ijiyem, cha'an mi' pasel tsiji' bʌ jam.
28¿Am ba i tat ja'al? ¿Majqui i ña' ye'eb? 29¿Majqui tsi' yʌc'ʌ i tuñil ja'? ¿Majqui tsi' teche i ña'al tsʌñal? 30Jini ja' tilem bʌ ti panchan mi' yʌc' i tuñija' lajal bʌ i tsʌtsel bajche' xajlel. I pam jini colem ja' mi' tsʌts'an.
31¿Mejl ba a tic' jini ec' ti' bijlel? ¿Mejl ba a jitben i cʌjchil i ñʌc' Orión? 32¿Mejl ba a suben q'uextʌyel i yorajlel jajmel yic'ot ja'lel? ¿Mejl ba a pʌsben i bijlel jini Osa yic'ot i yal? 33¿A cʌñʌ ba jini mandar tac am bʌ ti' wenta panchan? ¿Awujil ba bajche' cʌyʌl lum yic'ot panchan?
34¿Mejl ba a pʌy tilel ja'al ti tiquin pañimil? ¿Mu' ba i jac'beñet a t'an tocal che' ma' pejcan? 35¿Mejl ba a choc majlel chajc baqui a wom? ¿Mu' ba i subeñet umba'añon? ¿Che' ba mi' jac'? 36¿Majqui tsi' yʌq'ue i ña'tibal pejtel cuxul tac bʌ? ¿Majqui tsi' cʌntesa bajche' yom melol? 37¿Majqui yujil i tsicol tocal? ¿Majqui mi' choc tilel ja'al che' bajche' mi' xitchocontel uc'um? 38¿Mejl ba a wʌc' ti p'ojlel oc'ol?
39¿Mejl ba a wʌq'uen i colojm jini ña' bajlum cha'an mi' lajmesʌben i wi'ñal i yal? 40¿Mejl ba a wʌq'uen i bʌl i ñʌc' che' cotol ti mal ch'en yic'ot che' woli ti chijt ti mate'el? 41¿Majqui mi' we'san jini i'ic' xiye' che' wi'ñayix i yal, che' mi' pam ñumel ti sʌclaya?
Currently Selected:
JOB 38: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.