JOB 33
33
Eliú tsi' tiq'ui Job
1Ubibeñon c t'an, Job. Ñich'tan pejtel chuqui mic subeñet. 2Awilan tsa'ix c chajpa c bʌ. Comix c cha'len t'an. 3Jini woli bʌ c subeñet, mic sub ti pejtelel c pusic'al. 4I yEspíritu Dios tsi' meleyon. Ya' ch'oyol j cuxtilel ti' yiq'uilel i yej jini P'ʌtʌl Bʌ. 5Subeñon mi a wujilʌch jac'ol. Chajpan a t'an. La' c'ajtibeñon. 6Awilan, lajalon bajche' jatet ti' tojlel Dios. Lajal melbilonla ti lum. 7Mach a bʌc'ñañon. Mach a cha'len quisin. Ma'anic wolic xic'beñet.
8Tsa'ix a cha'le t'an. Tsa'ix cubi. Tsac ñich'tʌbeyet a t'an. Tsa' wʌlʌ: 9“Tojon, ma'anic c mul. 10Pero Dios mi' wersa taj leco tac bʌ tic tojlel mu' bʌ i mich'len. Mi' q'uelon che' bajche' i contra. 11Mi' ñet'beñon coc ti tocol bʌ te'. Mi' chʌcʌ q'uel pejtel chuqui mic cha'len”, lon che'et.
12Wolix c jac'beñet. Mach isujmic bajche' wola' wʌl. Wen ñuc Dios. Mach ñuquic winic. 13¿Chucoch ma' lon al ma'anic mi' jac'beñet che' woliyet ti wocol? 14Che' mi' cha'len t'an Dios, jasʌl junyajl mi' yʌl. Mach wersajix i cha'yajlel cha'an mi lac ña'tan isujm. Muq'uic lac ñusʌben i t'an mi' chʌn pejcañonla. 15Che' woliyonla ti ñajal yic'ot che' an chuqui mi laj q'uel ti ac'ʌlel, 16Dios mi' yʌq'ueñonla lac cha' ñich'tan lac tic'ol. Mi' yʌq'ueñonla lac tsic pusic'al ame i tajonla wocol. Mi' cha' toj'esañonla. 17Mi' mʌctʌbeñonla lac bijlel che' mach tojic cha'an mi' ju'sʌbeñonla lac pusic'al 18ame jiliconla ti espada, ame chojquiconla ba' mi lac chʌmel.
19Mi' cʌntesañonla ja'el che' c'amonla. Che' wen c'ux i p'aquel winic che' ñolol ti' wʌyib, 20mi' ts'a'len i bʌl i ñʌc'. Mach chʌn yomix i c'ux waj. 21Mi' tiquin i bʌc'tal. Yajyajix, tsiquilix i bʌquel. 22Cabʌl mi' jal'an ti' ti' i yajñib chʌmeño' bʌ. Colel i chʌmel. Mi' yutsi c'uñ'an pañimil. 23Ti jini jach bʌ ora mi tsa' tili ángel loq'uem bʌ ti' tojlel bajc'ʌl i pi'ʌlob ti panchan cha'an mi' toj'esan majlel ba' uts'atax, 24che'ic jini, uts mi' pʌs i bʌ Dios ti' tojlel jini winic. Mi' yʌl: La'ix colic. Ma'anic mi' caj ti chʌmel. Tsa'ix c tojo cha'an mi' colel. 25Cha'an tsi' cʌyʌ i mul jini winic, jini cha'an mi caj i cha' wen'an. Lajal mi caj i sujtel i bʌc'tal bajche' ch'iton, wen ch'ejl bʌ, che'en Dios. 26Dios mi' jac' ti uts'at che' mi' pejcan jini winic. Che' mi' q'uelben i wut Dios tijicña jini winic. Mi cha' cajel ti cuxtiyel che' bajche' ti yambʌ ora. 27Mi caj i suben i pi'ʌlob bajche' tsa' coltʌnti ti Dios. Tijicña i pusic'al mi' cha'len c'ay. Mi' yʌl: “Tsa'ix c cha'le mulil. Tsac xoyo c bijlel, pero ma'anic tsi' yʌq'ueyon c toj c mul. Tsi' p'untayon Dios. 28Tsi' mʌñʌyon cha'an mi' coltañon. Jini cha'an ma'anic tsa' sajtiyon ba'an chʌmeño' bʌ. Cha' anix wen bʌ c pusic'al”, che'en jini winic.
29Pejtelel iliyi mi' mel Dios ti' tojlel winicob. Mach junyajlic jach. I cha'yajlel yic'ot i yuxyajlel mi' mel 30cha'an mi' sutq'uiñob i bʌ winicob ame majlicob ba'an chʌmeño' bʌ. Che' jini mi' pʌsbeñob bajche' yom mi' melob. Mi' yʌq'ueñob i cuxtʌlel. 31P'isi ti wenta, Job. Ñich'tʌbeñon. Yom ñʌch'ʌlet che' mic chʌn pejcañet. 32Mi tsa' ña'ta bajche' mi caj a coltan a bʌ, subeñon, come tijicñayon mi tsa' mejli c pʌset ti toj. 33Mi mach a womix a cha'len t'an, ubiñon. Yom chʌn ñʌch'ʌlet cha'an mij cʌntesañet bajche' yom mi' mel jini am bʌ i pusic'al, che'en Eliú.
Currently Selected:
JOB 33: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.