JOB 3
3
Job tsi' ña'ta uts'at machic tsi' q'uele pañimil
1Tsa' caji ti t'an Job. Tsi' p'aja i yorajlel che' bʌ tsi' q'uele pañimil. 2-3Tsi' yʌlʌ Job: La' chojquic j q'uiñilel che' bʌ tsaj q'uele pañimil yic'ot jini ac'ʌlel che' bʌ tsa' caji' cʌntañon c ña'. 4La' ochic jini q'uin ti ic'ch'ipan bʌ cha'an ma'anix mi' chʌn ña'tan Dios. Mach i tsictesan i sʌclel pañimil. 5La' yajpic ti ic'ch'ipan bʌ ti' yʌxñʌlel chʌmel. La' tilic tocal i mʌc. La' puts'ic ti bʌq'uen. La' junyajlel sajtic. 6Jixcu jini ac'ʌlel, la' yajpic. Mach ochic ti tsic yic'ot yan tac bʌ q'uin ti jab yic'ot ti uw. 7La' cʌlec ti' bajñel. Mach yomic mi' chʌn ña'tintel ti tijicña bʌ t'an. 8La' i p'ajob jini winicob yujilo' bʌ p'ajoñel mu' bʌ i yutsesʌbeñob i pusic'al jini jontolo' bʌ chʌy ti colem ñajb. 9La' yajpic i c'ʌc'al ec' ti' bʌjlibal q'uin. La' i lon pijtan i sʌclel pañimil. 10Come uts'at tsa'ic i ñusayon c ña' che' cʌntʌbilon i cha'an, pero tsi' yʌc'ʌyon ti pañimil cha'an mi cubin wocol.
11¿Chucoch ma'anic tsa' sʌc jiliyon ti' ñʌc' c ña'? ¿Chucoch ma'anic tsa' chʌmiyon che' bʌ tsaj q'uele pañimil? 12¿Chucoch toca tsi' lotoyon j co'? ¿Chucoch tsi' lon tsu'sayon c ña'? 13Tsa'ic i cʌyʌyoñob cha'an mic chʌmel ñʌch'ʌlonix. Tsa'ic chʌmiyon wʌyʌlonix 14yic'ot jini reyob yic'ot jini xcʌntesajob wen chumulo' bʌ ti oñiyi, 15yic'ot i yalobilob reyob tsa' bʌ i but'uyob i yotot ti chubʌ'añʌl letsem bʌ i tojol. 16¿Chuchoch ma'anic tsac choco c bʌ ti' tojlel c ña' che' maxto i yorajlelic? Che'ic jini, lajalon bajche' alʌlob mach bʌ anic mi' q'uelob i sʌclel pañimil. 17Jini chʌmeño' bʌ ma'anix mi' chʌn tic'lʌntelob cha'an jontolo' bʌ. Jini lujbeñobix bʌ mi' c'ajob i yo. 18Jini ñup'ulo' bʌ ja'el mi' c'ajob i yo che' mi' chʌmelob. Ma'anix mi' chʌn ubibeñob i t'an i yumob. 19Temel añob ch'o'ch'oco' bʌ yic'ot ñuco' bʌ. Jini x'e'tel colbilix ti' p'ʌtʌlel i yum.
20¿Chucoch ma' chʌn aq'uen i cuxtilel jini ch'ijiyem bʌ i pusic'al? ¿Chucoch ma' chʌn aq'uen i cuxtilel che' ma'anix i wenlel ti pañimil? 21Yom chʌmel pero ma'anic mi' mejlel. Lajalʌch bajche' jini mu' bʌ i lon top' lum cha'an mi' taj jini letsem tac bʌ i tojol. 22Tijicña i pusic'al mi tsa' mejli ti chʌmel. Wen tijicñayix jini mucul bʌ ti lum. 23¿Chucoch mi la cʌq'uentel laj cuxtilel che' mʌcʌl lac bijlel? Lon cuxulonla, joy ñet'elonla yubil i cha'an Dios. 24Che' comix c'ux c waj, mach mejlicon cha'an jesuñayon. Che' comix c cha'len t'an, muc'on jach ti ajcʌn. 25Jini wocol tsa' bʌ c bʌc'ña tsi' tajayon. Wolix c p'ulben wocol yic'ot bʌq'uen. 26Che' yʌxʌlix co, che' wolic wen cʌntan c bʌ, tsi' tajayon wocol. Tsa' ujti ti t'an Job.
Currently Selected:
JOB 3: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.