ISAIAS 64
64
1Uts'atax muq'uic a jam jini panchan cha'an ma' jubel tilel. Che' jini mux i ñijcan i bʌ jini wits ti bʌq'uen che' ma' t'uchtan. 2Lajal a ñuclel che' bajche' c'ajc mu' bʌ i pul jini colem te'el tac, mu' bʌ i yʌc' ti lojc jini colem ñajb jinto mi' lu' tiquesan. Tsiltsilña ti bʌq'uen jini colem tejclum tac ti a tojlel. Ma' wʌc' ti cʌjñel a c'aba' ti' tojlel a contrajob. 3Tsa' pʌsbeyob bʌbʌq'uen bʌ a melbal mach bʌ anic tsac pijta lojon. Che' bʌ tsa' jubiyet tilel, tsi' ñijca i bʌ colem wits ti a tojlel. 4C'ʌlʌl wʌle ma'anic ba' wis ubibil i cha'an winicob yambʌ dios bajche' jatet. Ma'anic yambʌ cʌmbil bʌ c cha'an lojon mu' bʌ i mel ñuc tac bʌ i ye'tel cha'an mi' coltan jini mu' bʌ i ñop ti' xuc'tilel i pusic'al.
5Jatet ma' ch'ʌm ti a wenta jini mu' bʌ i tijicñesan i bʌ ti' melol chuqui toj, mu' bʌ i c'ajtesañet baqui jach mi' majlel. Pero mach tojonic lojon. Cabʌl lojon c mul. Cabʌl tsa' jal'ayon lojon ti mulil. Jini cha'an mich'et. ¿Mejl ba c taj lojon j coltʌntel? 6Tic pejtelel lojon bibi'on lojon ti a wut cha'an lojon c mul. Ma'anic ma' q'uel ti uts'at wen bʌ c melbal lojon. Che' yilalob ti a wut bajche' tuwix bʌ pisil. Lajal mi' jilel laj c'ʌjñibal che' bajche' mi' tiquin i yopol te'. Cha'an c mul lojon mic pʌjyel lojon majlel. 7Ma'anix majch mi' chʌn ña'tan a c'aba'. Ma'anix majch mi' c'ajtibeñet i p'untʌntel. Jini cha'an tsa' mʌyʌ a wut tic tojlel lojon. Tsa' cʌyʌyon lojon ti' p'ʌtʌlel c mul lojon.
8Pero c Yumet lojon, c Tatet lojon. Añon lojon ti a c'ʌb che' bajche' oc'ol ti' c'ʌb xmel p'ejt. Tic pejtelel lojon a melbalon lojon. 9C Yum, mach a chʌn mich'an. Mach yomic cʌlʌx jax a mich'ajel. Mach ma' chʌn c'ajtesan c mul lojon. Q'ueleyon lojon, awilan a cha'añon lojon. 10Tsa'ix sujti ti tiquiñal bʌ pañimil jini ch'ujul bʌ a tejclum tac ti Israel. Jisʌbilix Jerusalén. 11Laj pulemix ti c'ajc jini ch'ujul bʌ Templo, jini i t'ojol jax bʌ baqui tsi' ch'ujutesayetob c ñojte'el lojon. Laj jisʌbilix pejtelel jini c'uxbibil bʌ c cha'an lojon. 12Q'uelelix a cha'an pejtelel ili wocol, c Yum. ¿Mach ba anic chuqui mi caj a tumben? ¿Ñʌch'ʌl ba mi caj a cʌytʌl jinto ma' wen peq'uesañon?
Currently Selected:
ISAIAS 64: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.