ISAIAS 38
38
I c'amʌjel yic'ot i lajmesʌntel Ezequías
(2 R. 20.1-11; 2 Cr. 32.24-26)
1Che' woli to i cha'len yumʌl Ezequías, tsa' caji' wen c'am'an. Jini x'alt'an Isaías (i yalobil Amoz), i winic Dios, tsa' tili i q'uel jini rey Ezequías. Tsi' yʌlʌ: Ubiben i t'an lac Yum Dios: “Yomix ma' wʌn suben a pi'ʌlob bajche' yom mi' yajñel, come mux caj a chʌmel. Mach lajmic a chʌmel”, che'en. 2-3Che' jini Ezequías tsi' sutq'ui i wut ti ñʌc' pajc'. Tsa' caji i pejcan lac Yum ti oración: C Yum, mij c'ajtibeñet ti wocol t'an cha'an ma' coltañon. Ña'tan bajche' tsac cha'le xʌmbal ti a tojlel come ti xuc'ul yic'ot ti isujm tsac mele chuqui toj. Ma'anic tsac mele chuqui jontol ti a wut, che'en. Che' jini tsa' wen caji ti uq'uel Ezequías. Tsi' wen mele i pusic'al.
4Tsa' tili i t'an lac Yum Dios. Tsi' pejca jini x'alt'an Isaías. 5Tsi' sube: Cucu suben Ezequías: “Che'ʌch woli' yʌl lac Yum, i Dios David, jini a ñojte'el: Tsa'ix cubi a woración. Tsa'ix j q'uele ja'el i ya'lel a wut. Mi caj c cha' aq'ueñet yambʌ jo'lujump'ejl (15) jab a jabilel. 6Joñon mi caj j coltañet loq'uel ti' c'ʌb jini rey bʌ ti Asiria. Mi caj j coltan ja'el ili tejclum”, che'en. (21Jini cha'an Isaías tsi' yʌc'ʌ ti melol jumpejts juch'bil bʌ higo. Tsi' yʌc'ʌ ba' pasem i tsoy. Che' jini tsa' lajmi jini rey. 22Tsi' yʌlʌ Ezequías: ¿Bajche' mi caj c ña'tan mi muq'uix caj c cha' majlel ya' ti' Templo lac Yum? che'en.) 7Isaías tsi' jac'ʌ: Lac Yum mi caj i pʌsbeñet jini ñuc bʌ i ye'tel cha'an ma' wen ña'tan isujm mi caj i ts'ʌctesan jini tsa' bʌ i subeyet. 8Yom ma' wen q'uel jini axñal ya' ba' jaxʌl ti' tec'oñib Acaz. Mi caj cʌc' ti sujtel jini q'uin ti' bijlel. Mux caj a p'is lujunquejp ya' ti p'isoñib, che'en. Che'ʌch tsa' ujti. Jini i yaxñʌlel q'uin tsa' puts'i lujunquejp ti p'isoñib. Jal to tsa' bʌjli jini q'uin.
9Jiñʌch salmo tsa' bʌ i ts'ijba Ezequías yumʌl bʌ ti Judá, che' bʌ tsa' cha' lajmi ti c'amʌjel: 10Tsa cʌlʌ: Maxto ñoxonic wolic chʌmel. Xinq'uiñil to yubil. Wersa mic majlel ti' yajñib xchʌmelob che' ch'itoñon to. 11Tsa cʌlʌ: Ma'anix mi caj c chʌn q'uel lac Yum wʌ' ti pañimil ba' cuxulonla. Ma'anix mi caj c chʌn q'uel jini chumulo' bʌ ti pañimil. 12Woli' jochtiyel c bʌc'tal. Woli' q'uextiyel che' bajche' i lejchempat jini xcʌnta tiñʌme'ob. Wolix i jilel j cuxtʌlel che' bajche' pisil woli bʌ ti jajlel mu' bʌ i bʌc' sejt'el ya' ti jalo' pisil che' quepel to. C'ʌlʌl ti sʌc'an c'ʌlʌl ti ic'an ma' wʌc'on ti jilel. 13C'ʌlʌl mi' sʌc'an we'ecñayon ti oñel wolij c'ajtibeñet j coltʌntel. Ma' wʌc' ti xujlel pejtel c bʌquel che' bajche' bajlum. C'ʌlʌl ti sʌc'an c'ʌlʌl ti ic'an ma' wʌc'on ti jilel.
14Lajal muc'on ti ajcʌn che' bajche' x'ajlum. Mic cha'len uq'uel che' bajche' x'ujcuts. Woli ti mujts'el c wut cha'an lujb che' mic chʌn q'uel jini panchan. C Yum, wen wocol añon. Ch'ʌmʌyonix ti a wenta. 15Pero ¿chuqui to yom alol? Jiñʌch Dios tsa' bʌ i chocbeyon tilel ili wocol. Ma'anix mi' yochel c wʌyel cha'an ch'ijiyem c pusic'al. 16C Yum, ma' jultesʌbeñob i pusic'al winicob cha'an mi' tajob i cuxtʌlel. Cha'an ti' caj c wocol la' p'ʌtac c pusic'al. Lajmesañon, c Yum, cha'an mic cha' cuxtiyel.
17C Yum, che' c'amon wen ch'ijiyemon, pero tsa' wʌq'ueyon wocol cha'an mic taj i ñʌch'tʌlel c pusic'al. Ti' yutslel a pusic'al cha' techeyon ame chʌmicon. Tsa' laj ñusʌbeyon c mul. 18Ma'anic mi mejlel i ch'ujutesañet jini chʌmeño' bʌ. Ma'anic mi mejlel i ñuquesañob a c'aba'. Mach tijicñayob i pusic'al cha'an a wutslel. Jini mu' bʌ i jubel majlel i tojob i mul ma'anix i pijtaya. Mach muq'uic i yubiñob i xuc'tilel a pusic'al. 19Pero jini cuxulo' bʌ mi mejlel i ch'ujutesañet che' bajche' wolic mel ti ili ora. Jini tatʌlob mi' subeñob i yalobilob cabʌl i xuc'tilel a pusic'al. 20Wʌ'an lac Yum, awilan woli' coltañon. La' lac ñijcan arpa. La' lac cha'len c'ay. Jujump'ejl q'uin che' cuxulon to la la' laj c'ʌyiben i ñuclel lac Yum ila ti' Templo, che'en Ezequías.
Currently Selected:
ISAIAS 38: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.