GENESIS 2
2
1Tsa' ujti i mel jini panchan yic'ot pañimil yic'ot pejtelel i bʌl. 2Dios tsa' ujti i mel i ye'tel. Tsi' c'aja i yo ti' wucp'ejlel q'uin che' ujtemix pejtel i ye'tel tsa' bʌ i mele. 3Dios tsi' yʌlʌ uts'at i wucp'ejlel q'uin. Tsi' q'uele ti ch'ujul. Come ti' wucp'ejlel q'uin tsi' c'aja i yo cha'an pejtel i ye'tel tsa' bʌ i mele.
Jini winic an ti pʌc'ʌbʌl i c'aba' Edén
4Lac Yum Dios tsi' mele panchan yic'ot pañimil. Che'ʌch tsa' mejli. 5Che' maxto pasemic jini mu' bʌ i colel ti pʌc'ʌbʌl, lac Yum Dios maxto anic tsi' choco tilel ja'al ti pañimil. Maxto anic majch tsi' cha'le e'tel ti lum. 6Tsa' loq'ui tilel ja' ti lum. Tsa' ach'a pejtel jini lum. 7Lac Yum Dios tsi' mele winic ti ts'ubejn. Tsi' wujtʌbe i ni'. Tsi' yʌq'ue i jap ic' cha'an cuxul mi' yajñel. Tsa' aq'uenti winic cuxul bʌ i ch'ujlel. 8Lac Yum Dios tsi' pʌc'ʌ pʌc'ʌbʌl ti Edén ya' ti' pasibal q'uin. Ya'i tsi' yʌc'ʌ ti chumtʌl jini winic tsa' bʌ i mele. 9Lac Yum Dios tsi' yʌc'ʌ ti colel ti lum pejtelel i t'ojol bʌ te' yic'ot uts'at bʌ cha'an i bʌl ñʌc'ʌl. Tsi' yʌc'ʌ ti colel ja'el ya' ti' yojlil jini pʌc'ʌbʌl jini te' mu' bʌ i yʌc' laj cuxtʌlel yic'ot jini te' mu' bʌ i yʌc' ti cʌjñel chuqui uts'at yic'ot chuqui jontol.
10Jump'ejl colem ja' tsa' loq'ui majlel ti Edén cha'an mi' yʌch'esan jini pʌc'ʌbʌl. Ya' ba' tsa' loq'ui ti pʌc'ʌbʌl tsi' t'oxo i bʌ ti chʌnxʌjc' colem ja'. 11-12I c'aba' jini ñaxan bʌ ja' jiñʌch Pisón. Jiñʌch jini ja' am bʌ ti' joytilel pejtelel i lumal Havila ya' ba' mi' tajtʌl cabʌl oro. An ja'el cha'chajp xajlel jiñʌch bedelio yic'ot ónice. 13I cha'p'ejlel ja' jiñʌch Gihón. Jiñʌch am bʌ ti' joytilel pejtelel i lumal Cus. 14I yuxp'ejlel ja' jiñʌch Hidekel. Jiñʌch mu' bʌ i majlel ti' tojel Asiria ba' mi' pasel q'uin. I chʌmp'ejlel ja' jiñʌch Eufrates.
15Lac Yum Dios tsi' pʌyʌ jini winic. Tsi' yʌq'ue ti' wenta jini pʌc'ʌbʌl i c'aba' Edén cha'an mi' yʌc'ñan, cha'an mi' cʌntan. 16Lac Yum Dios tsi' yʌq'ue mandar jini winic. Tsi' yʌlʌ: Mi mejlel a c'ux i wut pejtelel te' am bʌ ti pʌc'ʌbʌl. 17Cojach jini te' mu' bʌ i yʌq'ueñet a cʌn chuqui uts'at yic'ot chuqui jontol mach a c'ux, come ti jini q'uin che' ma' c'uxben i wut wersa mi caj a chʌmel, che'en.
18Lac Yum Dios tsi' yʌlʌ: Mach uts'atic mi' yajñel ti' bajñelil jini winic. Mi caj c melben i yaj coltaya cha'an mi' yajñel yic'ot, che'en. 19-20Lac Yum Dios tsi' c'ʌñʌ lum cha'an mi' mel pejtel bʌte'el yic'ot alʌc'ʌl yic'ot mut ti chajp ti chajp. Tsi' laj pʌyʌ tilel ba'an jini winic cha'an mi' yotsʌben i c'aba', pero ma'anic tsa' tajle i pi'ʌl jini winic cha'an mi' yajñel yic'ot. 21Lac Yum Dios tsi' yotsʌbe tam bʌ i wʌyel jini winic. Tsa' wʌyi. Dios tsi' loc'sʌbe junts'ijt i ch'il'at. Tsi' cha' ñup'be i bʌc'tal ba' tsa' loq'ui. 22Lac Yum Dios tsi' loc'sʌbe junts'ijt i ch'il'at winic cha'an mi' mel x'ixic. Dios tsi' pʌyʌ tilel jini x'ixic ba'an jini winic.
23Jini winic tsi' yʌlʌ: Jiñʌch c bʌquel loq'uem bʌ tic bʌquel yic'ot c bʌc'tal loq'uem bʌ tic bʌc'tal. I c'aba' x'ixic come loq'uem ti winic, che'en. 24Jini cha'an winicob mi' cʌyob i tat i ña'. Mi' chʌn ajñelob yic'ot i yijñam. Jini cha'tiquil mi' yochelob ti juntiquil jach. 25Pits'ilob ti cha'ticlel, jini winic yic'ot i yijñam. Ma'anic tsi' cha'leyob quisin.
Currently Selected:
GENESIS 2: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.