GENESIS 14
14
Abram tsi' colta Lot
1-2Che' ti' yorajlel Amrafel jini rey ti Sinar, yic'ot Arioc rey ti Elasar, yic'ot Quedorlaomer rey ti Elam, yic'ot Tidal rey ti Goim, ili reyob tsi' cha'leyob guerra ti' contra Bera, jini rey ti Sodoma, yic'ot Birsa rey ti Gomorra, yic'ot Sinab rey ti Adma, yic'ot Semeber rey ti Zeboim, yic'ot jini rey ti Bela, jiñʌch Zoar. 3Ti pejtelelob tsi' tempayob i bʌ ti joctʌl i c'aba' Sidim. Wʌle ya'ix an ñajb am bʌ i yʌts'mil. 4Mach chʌn yomobix i yumañob Quedorlaomer. Lajchʌmp'ejl (12) jab tsi' yumayob. Ti yuxlujump'ejlel (13) jab tsi' cʌyʌ i yumañob. 5Ti' chʌnlujump'ejlel (14) jab Quedorlaomer yic'ot jini uxtiquil reyob tsi' tempayob i bʌ ti guerra. Tsa' mʌjli i cha'añob ti' contra jini refajob ti Astarot Karnaim yic'ot jini zuzajob ti Ham yic'ot jini emijob ti Save Quiriataim, 6yic'ot jini horeojob ti wits i c'aba' Seir. Tsi' chocoyob majlel c'ʌlʌl ti Parán, ya' ti' ti' colem bʌ i tiquiñal pañimil. 7Tsa' sujtiyob. Tsa' c'otiyob ti Enmispat, jiñʌch Cades. Tsi' jisayob majlel i lumal amalecob yic'ot amorreojob chumulo' bʌ ti Hazezón Tamar. 8-9Tsa' loq'ui i rey Sodoma yic'ot i rey Gomorra yic'ot i rey Adma yic'ot i rey Zeboim yic'ot i rey Bela, jiñʌch Zoar. Ya' ti joctʌl i c'aba' Sidim tsa' caji' techob guerra ti' contra Quedorlaomer, i rey Elam yic'ot ti' contra Tidal, i rey Goim, yic'ot ti' contra Amrafel, i rey Sinar, yic'ot ti' contra Arioc, i rey Elasar. An chʌntiquil reyob ti' contra jo'tiquil reyob. 10But'ul jini joctʌl i c'aba' Sidim ti' yajñib tac asfalto. Che' bʌ tsa' puts'iyob i rey Sodoma yic'ot i rey Gomorra, tsa' ochiyob lamital i winicob ti' yajñib tac asfalto tsa' bʌ i ts'u'uyob ochel. Yaño' bʌ tsa' puts'iyob majlel ti wits. 11Jini xcontrajob tsa' ochiyob ti Sodoma yic'ot ti Gomorra. Tsi' laj chilbeyob i chubʌ'an yic'ot pejtelel i bʌl i ñʌc'. Tsi' ch'ʌmʌyob majlel. 12Tsi' pʌyʌyob majlel Lot ja'el, jini chumul bʌ ti Sodoma. Jiñʌch i yalobil i yeran Abram. Tsi' laj chilbeyob i chubʌ'an. Tsa' majliyob.
13Juntiquil tsa' bʌ puts'i tsa' tili i suben Abram chuqui tsa' ujti. Hebreojʌch Abram. Ya'ʌch chumul ba' cabʌl c'olol te' i cha'an Mamre. Amorreojʌch Mamre. I yijts'iñʌch Escol yic'ot Aner. Ti yuxticlel tsi' coltayob Abram. 14Che' bʌ tsi' yubi Abram chucbilix majlel i yalobil i yʌscun, tsi' pʌyʌ majlel i winicob chajpʌbilo' bʌ i cha'an, tsa' bʌ i yilayob pañimil ti' yotot. Jo'lujunc'al yic'ot waxʌclujuntiquilob (318). Tsi' yajñesayob majlel i contrajob c'ʌlʌl ti Dan. 15Ya' tsi' t'oxo i winicob. Tsi' tajayob ti guerra che' ti ac'ʌlʌl. Tsa' mʌjli i cha'an. Tsi' yajñesayob majlel ti Hoba, ti' ts'ejtʌl Damasco. 16Abram tsi' cha' chilbeyob pejtel i xujch'. Tsi' cha' pʌyʌ tilel ja'el Lot i yalobil i yeran, yic'ot i chubʌ'an, yic'ot x'ixicob yic'ot yaño' bʌ winicob.
Melquisedec tsi' yʌq'ue i yutslel i t'an Abram
17Tsa' sujti Abram che' bʌ tsi' t'uchta Quedorlaomer yic'ot jini reyob tsa' bʌ i pi'leyob ti guerra. Tsa' tili i rey Sodoma cha'an mi' taj Abram ti joctʌl i c'aba' Save, i Joctʌl Rey. 18Melquisedec, jini rey ti Salem, tsi' yʌq'ue waj yic'ot vino. I motomajʌch jini C'ax Ñuc bʌ Dios. 19Melquisedec tsi' yʌq'ue i yutslel i t'an Abram. Tsi' yʌlʌ: La' aq'uentic Abram i yutslel i t'an jini C'ax Ñuc bʌ Dios, tsa' bʌ i mele panchan yic'ot pañimil. 20La' subentic i ñuclel Dios jini C'ax Ñuc Bʌ tsa' bʌ i yʌq'ueyet a t'uchtan a contrajob, che'en Melquisedec. Abram tsi' yʌq'ue Melquisedec i diezmojlel pejtelel i chubʌ'an. 21Jini i rey Sodoma tsi' sube Abram: Aq'ueñon jini winicob x'ixicob, pero jini chubʌ'añʌl ch'ʌmʌ jatet, che'en. 22Abram tsi' sube: Tsac letsa j c'ʌb che' bʌ tsa cʌc'ʌ c t'an ti' tojlel c Yum, jini Cojach bʌ Dios Am bʌ i Ñuclel, jini tsa' bʌ i mele panchan yic'ot pañimil. 23Ma'anic chuqui mi caj c ch'ʌm ti a c'ʌb mi junt'ujmic puy, mi i ch'ajñal xʌñʌb, mi yan tac bʌ a cha'an ame a wʌl: “Tsa cʌq'ue i chubʌ'an Abram; jini cha'an wen chumul”, ame che'iquet, che'en. 24Jini jach mic ch'ʌm lojon chuqui tsi' c'uxuyob ch'itoñob yic'ot winicob tsajniyo' bʌ quic'ot. La' i ch'ʌmob Aner yic'ot Escol yic'ot Mamre chuqui tac yom ma' t'oxbeñob. Che' tsi' yʌlʌ Abram.
Currently Selected:
GENESIS 14: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.