EZEQUIEL 30
30
Lʌc'ʌlix mi caj i jisʌntel Egipto
1-2Tsa' tili i t'an lac Yum ba' añon: I yalobil winic, subeñob ili t'an: “Lac Yum Dios woli' yʌl: Cha'lenla uq'uel, come obol la' bʌ ti jini q'uin. 3Come mach jalix mi caj i tilel i q'uiñilel lac Yum. C'ax ch'ijiyem jax jini q'uin che' mi caj i yubiñob wocol winicob ti pejtelel pañimil. 4Mi caj i tilel espada ti' tojlel Egipto. Mi' cajelob ti wocol ya' ti Etiopía che' mi' tsʌnsʌntelob jini egiptojob che' mi' chilbentelob pejtelel i chubʌ'an. Mi caj i jisʌntel pejtel i p'ʌtʌlel. 5Jini Etiopía yic'ot Fut, yic'ot Lud, yic'ot año' bʌ ti Arabia yic'ot ti Libia, yic'ot pejtelel tejclum tac tsa' bʌ i cha'leyob trato, mi caj i laj jisʌntelob ti guerra.
6Come lac Yum woli' yʌl: Muq'uix i jilelob ti guerra jini woli bʌ i coltañob Egipto. Ti pejtelelob mi caj i peq'uesʌntelob c'ʌlʌl ti Migdol yic'ot ti Sevene, che'en lac Yum Dios. 7Egipto mi caj i sujtel ti' tiquiñal lum, joyol bʌ ti jochol bʌ lum ba' laj jejmen tac tejclum. 8Che' jini mi caj i ña'tañob Yumʌlon ba' ora tsa'ix c jisa Egipto. Pejtel mu' bʌ i coltañob mi caj i jisʌntelob ja'el. 9Ti jim bʌ ora mi caj c choc majlel suboñelob ya' ti Etiopía cha'an mi' toj sajtelob i pusic'al ti bʌq'uen. Cabʌl mi caj i cha'leñob bʌq'uen che' mi' jisʌntel Egipto. Mi caj i lu' ts'ʌctiyel ili wocol.
10Lac Yum Dios woli' yʌl: Mi caj j c'ʌn Nabucodonosor rey ti Babilonia cha'an mic jisan pejtelel i chubʌ'an egiptojob. 11Tal yic'ot i soldadojob cha'an mi' bʌc'tesan pañimil yic'ot jisaya. Mi caj i contrajiñob Egipto ti guerra. Mi caj i tsʌnsañob cabʌl winicob. 12Mi caj c tsʌc'mesan jini ñoja' i c'aba' Nilo cha'an mi cʌc' jini lum ti' wenta xjontolilob. Mi caj j c'ʌn jini ñajt bʌ ch'oyolob cha'an mic jisan. Joñon tsa cʌc'ʌ c t'an, Yumʌlon, che'en lac Yum.
13Lac Yum Dios woli' yʌl: Mi caj c jisʌbeñob i dios tac ti' lumal Egipto yic'ot ti Menfis. Ma'anix mi caj i cʌytʌl am bʌ i ye'tel ti Egipto mi juntiquilic. Ti pejtelel Egipto mi caj cotsʌbeñob i bʌq'uen. 14Mi caj c jisan Patros yic'ot Zoán. Mi caj cʌq'ueñob i toj i mul jini año' bʌ ti Tebas. 15-16Mi caj c mich'len Sin, jini p'ʌtʌl bʌ tejclum ti Egipto. Mi caj c jisan jini año' bʌ ti Tebas. Mi caj cʌc' wocol ya' ti Egipto. Jini año' bʌ ti Sin mi' cajelob ti wocol yic'ot bʌq'uen. Che' ja'el ti Tebas yic'ot Menfis. Mi caj i laj jilelob. 17Jini ch'iton winicob ti Avén yic'ot ti Pibeset mi caj i jisʌntelob ti espada. Jini x'ixicob mi caj i cʌjchelob majlel. 18Ya' ti Tafnes mi caj i yic'an pañimil. Mi caj i mʌjquel ti tocal che' mic jisʌben i p'ʌtʌlel egiptojob che' mic ju'sʌbeñob i pusic'al. Mi caj i cʌjchelob majlel jini xch'oc bʌ i yalobilob. 19Che' jini mi caj c jisan jini egiptojob che' mi cʌq'ueñob i toj i mul. Mi caj i ña'tañob Yumʌlon”, che'en.
20Tsa' tili i t'an lac Yum ba' añon che' ti marzo che' anix junlujump'ejl jab tsa' cʌjchi majlel jini rey Joaquín: 21I yalobil winic, tsa'ix j c'ʌsbe i c'ʌb jini Faraón i rey egiptojob. Awilan ti ili ora ma'anic majch woli' ts'ʌcʌben cha'an mi' lajmel, cha'an mi' cha' p'ʌt'an, cha'an mi' cha' chuc i yespada. 22Lac Yum Dios woli' yʌl: Wʌle añon ti' contra Faraón i rey Egipto. Mi caj j c'ʌsben i c'ʌb, jini p'ʌtʌl bʌ yic'ot jini c'ʌscujem bʌ cha'an mi' col i yespada. 23Mi caj c pam puc ti yan tac bʌ lum jini winicob ti Egipto. 24Mi caj c p'ʌtesʌben i c'ʌb jini rey ti Babilonia. Mi caj cʌq'uen quespada. Pero mi caj j c'ʌsben i c'ʌb jini rey Faraón. Che' jini mi' cajel ti ajcʌn che' bajche' xchʌmel. 25Mi caj j coltan jini rey ti Babilonia, pero mi caj i jilel i p'ʌtʌlel jini rey Faraón. Jini año' bʌ ti Egipto mi caj i ña'tañob Yumʌlon che' mi cʌc' quespada ti' c'ʌb jini rey Nabucodonosor cha'an mi' c'ʌn ti' contra Egipto. 26Mi caj c pam puc jini egiptojob ti pejtelel pañimil. Che' jini mi caj i ña'tañob Yumʌlon, che'en.
Currently Selected:
EZEQUIEL 30: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.