EZEQUIEL 31
31
I jilibal Faraón yic'ot i pi'ʌlob
1Che' ti mayo che' añix junlujump'ejl jab tsa' cʌjchi majlel Joaquín, awilan tsa' tili i t'an lac Yum ba' añon: 2-3I yalobil winic, suben Faraón i rey egiptojob yic'ot i tejclum tac: “Lajalet wʌle bajche' Asiria ti yambʌ ora. Wen p'ʌtʌl jini tejclum, lajal bajche' colem ch'ujte' ti Líbano. Wen i t'ojol jax i c'ʌb, wen yʌx pejtelel i yopol. Wen chan jini te', tsa' c'oti i ñi' ti tocal. 4Jini ja'al tsi' yʌc'ʌ ti wen colel. Tsa' tam'a majlel i wi' ti lum ba' tsi' taja ja'. Uts'atax tsa' coli. Tsi' melbe alʌ pa' yan tac bʌ te' am bʌ ti' joytʌlel. 5Ñumen chan che' bajche' yan tac bʌ te'. Cabʌl tsa' p'ojli i c'ʌb yic'ot i yopol cha'an cabʌl tsi' taja ja' i wi'. 6Ya' ti' c'ʌb tac tsi' mele i c'u' jini te'lemut. Ya' ti yebal tsa' tojp'i tac bʌte'el. Tsa' ajñi colem tejclum tac ti' yʌxñʌlel. 7Jini cha'an wen i t'ojol jax tsa' coli pejtelel i c'ʌb, come i wi' tsa' tam ochi ti lum ba' tsi' taja ja'. 8Ñumen chan che' bajche' jini ch'ujte' tsa' bʌ i pʌc'ʌ Dios. Ma'anic yambʌ te' lajal bʌ i yopol yic'ot i c'ʌb. Mi junchajpic jini te' am bʌ ti' pʌc'ʌb Dios tsa' mejli i taj i t'ojlʌwel. 9Cha'an ti' caj i t'ojlʌwel tsʌytsʌyña i pusic'al pejtel jini te' tac ya' ti Edén pʌc'bil bʌ i cha'an Dios.
10Jini cha'an lac Yum Dios woli' yʌl: Cha'an ti' caj tsi' chañ'esa i bʌ Egipto, ñumen chan tsi' q'uele i bʌ bajche' yan tac bʌ tejclum tac. 11Jini cha'an mi caj cʌq'uen i toj i mul ti' c'ʌb jini p'ʌtʌl bʌ colem tejclum Babilonia, come chocbilix c cha'an. 12Jini bʌc'ñʌbilo' bʌ soldadojob tilemo' bʌ ti Babilonia yic'ot i p'ʌtʌlel mi caj i sec'ob jubel. Mi caj i jisañob. Pejtelel i c'ʌb mi caj i yajlel jubel ti pam wits yic'ot ti joctʌl, yic'ot ti pa' tac. Mi caj i lu' c'ʌscujel. Pejtel winicob tsa' bʌ ajñiyob ti' yʌxñʌlel mi caj i cʌyob. 13Ya' ba' yajlem mi caj i tempʌyel xwejlel mut. Mi caj i yajñel jini bʌte'el ti' yebal i c'ʌb. 14Mach mi' lon chañ'esan i bʌ yambʌ colem tejclum anquese cabʌl i p'ʌtʌlel, anquese an i chanlel bajche' tocal. Come ti pejtelelob p'isbil jach i yorajlel, mi caj i chʌmelob. Mi caj i yajñelob ti' yajñib chʌmeño' bʌ yic'ot pejtelel winicob mu' bʌ i chañ'esañob i bʌ.
15Lac Yum Dios woli' yʌl: Ti jim bʌ q'uin che' bʌ tsa' jubi majlel ti mucoñibʌl, tsa cotsʌbe i ch'ijiyemlel pañimil. Jini colem ja' tsi' yuc'ta. Tsac tic'be i ya'al. Tsa cotsa Líbano ti ic'yoch'an bʌ pañimil. Jini colem te' tac tsi' lijiyob i bʌ yilal. 16Che' wen c'am tsa' yajli ti lum, tsa cotsʌbe i bʌq'uen jini colem tejclum tac, come tsac choco ochel ti' yajñib chʌmeño' bʌ. Pejtelel jini ñuco' bʌ año' bʌ ti' yajñib chʌmeño' bʌ woli' ñuq'uesʌbentelob i pusic'al cha'an tsa' c'oti egiptojob. 17Ya' añob ja'el jini tsa' bʌ i coltayob ti guerra. Tsa' laj c'otiyob ti' yajñib chʌmeño' bʌ pejtel tsa' bʌ ajniyob ti' yʌxñʌlel. 18Egipto, cabʌl a ñuclel ti' tojlel yambʌ colem tejclum tac pero mi caj a c'otel ti' yajñib chʌmeño' bʌ yic'ot pejtelel jini yaño' bʌ. Mi caj a wajñel ti' tojlel jini ts'a'lebilo' bʌ ma' q'uel. Mi caj a jisʌntel ti espada. Che'i mi caj i jilel Faraón yic'ot pejtelel i winicob”, che'en lac Yum Dios.
Currently Selected:
EZEQUIEL 31: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.