EXODO 31
31
I pʌyol Bezaleel yic'ot Aholiab
(Éx. 35.30—36.1)
1-2Lac Yum tsi' pejca Moisés: Awilan tsa'ix c yajca ti' c'aba' Bezaleel i yalobil Uri, i yalobil bʌ Hur, i p'olbal bʌ Judá. 3Joñon tsac bujt'esa ti Ch'ujul bʌ c Ch'ujlel. Tsa cʌq'ue i ña'tʌbal yic'ot i ch'ejlel, yic'ot pejtelel chuqui tac mi' ña'tan yic'ot chuqui tac mi' mel, 4cha'an mi' ña'tan bajche' yom melol tac jini oro yic'ot plata yic'ot bronce. 5Tsa'ix cʌq'ue i ña'tʌbal ja'el cha'an mi' mel xajlel tac yic'ot i ts'ijbal tac, yic'ot ti' juc'ol tac te' cha'an mi' mel pejtelel jujunchajp e'tel tac. 6Ña'tan ja'el joñon tsac pʌyʌ Aholiab i yalobil Ahisamac, loq'uem bʌ ti' p'olbal Dan. Tsac pʌyʌ cha'an mi' coltan jini Bezaleel. Pejtelel jini am bʌ i ña'tʌbal tsa'ix cʌq'ueyob i ch'ejlel cha'an pejtelel i p'ip'lel i pusic'al, cha'an mi' melob pejtelel chuqui tsa' bʌ c subeyet. 7Jini yom bʌ melol jiñʌch Tabernáculo, yic'ot jini Arca yic'ot i majc jini Arca ba' mi' ñusʌntel mulil, yic'ot pejtelel chuqui mi' c'ʌjñel ya' ti Tabernáculo, 8yic'ot jini mesa, yic'ot pejtelel chuqui tac mi' c'ʌjñel, yic'ot i ts'ʌjbib c'ajc melbil bʌ ti oro, yic'ot pejtelel jini mu' bʌ i c'ʌjñel, yic'ot i pulʌntib pom. 9Tsa'ix cʌq'ueyob i ña'tʌbal cha'an mi' melob ja'el jini pulʌntib cha'an pulbil bʌ c majtan, yic'ot pejtelel mu' bʌ i c'ʌjñel, yic'ot i yajñib ja' yic'ot i buchlib, 10yic'ot jini jalbil bʌ ch'ujul bʌ i pislel Aarón jini motomaj, yic'ot i pislel ja'el i yalobilob mu' bʌ i c'ʌñob i melob i ye'tel ti motomaj. 11Pejtelel jini tsa' bʌ c subeyet, cha'an jini aceite, cha'an bojñibʌl yic'ot jini xojocña bʌ pom, cha'an mi' c'ʌjñel ya' ti Ch'ujul bʌ Ajñibʌl, jiñob mi caj i laj melob. Che' tsi' yʌlʌ lac Yum.
An i sujmlel i yorajlel c'aj o
12-13Lac Yum tsi' cha' pejca Moisés: Subeñob jini israelob: “Yom mi la' jac' ti isujm i q'uiñilel tac c'aj o. Come jiñʌch yom bʌ mi la' ña'tan jatetla yic'ot pejtelel la' p'olbalob. Yom mi la' ña'tan joñon la' Yumoñʌch, la' Dioson, mu' bʌ c ch'ujutesan jini q'uin cha'an c'aj o. 14Jini cha'an yom mi la' lot i yorajlel c'aj o, come ch'ujulʌch ti la' tojlel. Majqui jach mi' c'ʌn ili q'uin cha'an i ye'tel, yom mi' tsʌnsʌntel. 15Wʌcp'ejl jach q'uin yom mi la' cha'len e'tel che' ti semana. I wucp'ejlel q'uin jiñʌch i yorajlel c'aj o, come ch'ujutesʌbil c cha'an. Yom mi' chʌmel majqui jach mi' cha'len e'tel ti jini q'uin. 16Jini cha'an wersa yom mi' lotob jini israelob i q'uinilel c'aj o mu' bʌ cʌq'ueñetla ti pejtelel ora. 17Jiñʌch junchajp t'an mu' bʌ caj i yajñel tic tojlel yic'ot ti' tojlel israelob c'ʌlʌl ti pejtelel ora. Come ti wʌcp'ejl jach q'uin tsac mele jini panchan yic'ot pañimil. Ti' wʌcp'ejlel q'uin tsa' laj ujti c mel. Che' ti' wucp'ejlel q'uin tsaj c'aja co. Joñon la' Yumon la' Dioson”. Che' tsi' yʌlʌ lac Yum Dios.
18Che' bʌ lac Yum tsa' ujti i pejcan Moisés ya' ti wits i c'aba' Sinaí, tsi' yʌq'ue Moisés cha'q'uejl xajlel ba' ts'ijbubil i t'an ti' c'ʌb Dios.
Currently Selected:
EXODO 31: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.