EXODO 27
27
Jini pulʌntib melbil bʌ ti bronce
(Éx. 38.1-7)
1Yom mi la' c'ʌn acaciate' cha'an mi la' mel jini pulʌntib. Lajal yom i tamlel ti chʌnxujc'ubʌyel, ojlil i yuxp'ejl metro i tamlel ti jujunwejl. I chanlel jiñʌch ojlil i cha'p'ejl metro. 2Yom mi la' melben i xulup ti' chʌmp'ejlel i xujc jini pulʌntib. Laj tep'bil yom ti bronce. Wen tsuyul yom ya' ti xujc tac. 3Yom mi la' mel ja'el poc' tac, yic'ot pala tac, yic'ot wechel tac bʌ e'tijibʌl cha'an mi la' c'ʌn la' jop loq'uel jini tan. Yom taza tac ja'el yic'ot pejtelel yan tac bʌ mu' bʌ i c'ʌjñel. Laj melbil yom ti bronce. 4Che' ja'el yom mi la' mel chincholtic bʌ ti bronce. Ya' ti' ti' jini chincholtic bʌ yom mi la' wʌc' chʌmp'ejl xotol tac bʌ tsucu taq'uin melbil bʌ ti bronce. 5Yom mi la' wʌc' ya' ti yebal ba' mʌcbil jini pulʌntib. Yom wen an ti' yojlil jini pulʌntib jini chincholtic bʌ. 6Che' ja'el yom mi la' c'ʌn jini acaciate' cha'an mi la' mel bara tac cha'an jini pulʌntib. Yom tep'bil ti bronce. 7Yom mi' yochel jini bara ba' xotol jini tsucu taq'uin tac. Yom laj bʌ ñumen i ni' ti jujunwejl jini pulʌntib. 8Tocol yom i mal jini pulʌntib. Ti tabla yom mi la' mel che' lajal bajche' tsac pʌsbeyet ya' ti wits.
Jini patio cha'an Tabernáculo
(Éx. 38.9-20)
9-10Yom mi la' melben i patiojlel jini Tabernáculo. Ya' ti sur yom mi la' joc'chocon jini wen jalbil bʌ lino. I tamlel jiñʌch lujump'ejl i yuxc'al (50) metro. Yom junc'al i postejlel yic'ot junc'al i c'ʌclib ti bronce. Melbil yom ti plata i joc'lib tac, yic'ot jini xotol tac bʌ. 11Che' ja'el ti norte yom mi la' joc'chocon jini pisil. I tamlel jiñʌch lujump'ejl i yuxc'al metro. Yom junc'al i postejlel yic'ot junc'al i c'ʌclib. Melbil yom ti plata i joc'lib tac yic'ot jini xotol tac bʌ.
12Jini i tamlel jini patio ti' tojel i bʌjlibal q'uin yom jo'p'ejl i cha'c'al (25) metro. Yom lujunts'ijt i postejlel yic'ot lujump'ejl i c'ʌclib tac. 13I tamlel jini patio ba' mi' pasel q'uin jiñʌch jo'p'ejl i cha'c'al metro. 14-15Jini cortina ti' tojel ba' mi la cochel yom ojlil i waxʌcp'ejl metro. Yom uxts'ijt i te'el yic'ot i c'ʌclib tac, che' ja'el ti yambʌ junwejl ba' mi la cochel.
16I mʌjquil jini patio jiñʌch cortina am bʌ lujump'ejl metro i tamlel, wen joch'bil bʌ ti yʌjyʌx bʌ, ti chʌccojan bʌ, yic'ot ti chʌchʌc bʌ, wen jalbil ti lino. Yom chʌnts'ijt i te'el yic'ot i buchlib tac. 17Yom cʌchbil tac ti plata pejtelel i te'el ti' joytʌlel jini patio. Yom melbil ti plata ja'el i joc'lib yic'ot i c'ʌclib tac melbil ti bronce. 18I tamlel jini patio yom lujump'ejl i yuxc'al metro. I xujc yom jo'p'ejl i cha'c'al metro. I chanlel jini cortina tac jiñʌch ojlil i yuxp'ejl metro. Jini cortina tac wen jalbil yom ti pino bʌ lino. Melbil yom ti bronce i c'ʌclib tac. 19Yom laj melbil ti bronce pejtelel mu' bʌ i c'ʌjñel ti melol jini Tabernáculo, yic'ot i joc'lib tac.
I q'uelol lámpara
(Lv. 24.1-4)
20Yom ma' subeñob jini israelob cha'an mi' ch'ʌmbeñetob tilel i ya'lel olivote' che' cujbilix cha'an i c'ʌc'al Tabernáculo, cha'an mi' lejmel ti pejtelel ora jini c'ajc. 21Yom mi la' wʌc' jini c'ajc ti Ch'ujul bʌ Ajñibʌl. Yom ma' wa'chocon Aarón yic'ot i p'olbalob cha'an mi' chʌcʌ q'uelob jini c'ajc ti ic'ajel yic'ot ti sʌc'ajel. Jiñʌch jump'ejl mandar yom bʌ ti' tojlel israelob ti pejtelel ora.
Currently Selected:
EXODO 27: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.