AMOS 3
3
I t'an bajlum
1Winicob x'ixicob ti Israel, ubinla ili t'an tsa' bʌ i yʌlʌ lac Yum ti la' contra yic'ot ti' contra pejtel la' pi'ʌlob año' bʌ ti Israel: Tsac pʌyʌyetla loq'uel ti' lumal Egipto. 2Jatet jach j cʌñʌyetla ti' tojlel pejtel tejclum tac ti pañimil. Jini cha'an mi caj c ju'sʌbeñetla la' pusic'al cha'an pejtelel la' jontolil.
3¿Temel ba mi' majlelob cha'tiquil che' cha'p'ejlob i pusic'al? 4¿Mu' ba i cha'len t'an bajlum ti mate'el che' ma'anic i we'el? ¿Mu' ba i cha'len t'an alʌ bajlum ti ch'en che' ma'anic chuqui tsi' taja? 5Ya' ba' ma'anic yac, ¿mu' ba caj i chujquel te'lemut? ¿Mu' ba i yajlel jini yac che' ma'anic chuqui mi' ñijcan? 6Che' mi' wustʌl trompeta ti tejclum, ¿mach ba anic mi' cajelob ti bʌq'uen jini tejclumob? Che' mi' tilel wocol ti tejclum, ¿mach ba tilemic ti lac Yum? che'en. 7Isujm, ma'anic chuqui mi' cha'len lac Yum Dios mi ma'anic tsi' ñaxan subeyob x'altañob i cha'an, cha'an mi' cha' subob. 8Jini bajlum mi' cha'len oñel. ¿Mach ba yomic mi lac bʌc'ñan? Lac Yum Dios tsa'ix i cha'le t'an. ¿Mach ba yomic mic cha' sub?
I jisʌntel Samaria
9Tsi' subeyon: Yom ma' pejcan jini yumʌlob ti Asdod yic'ot ti Egipto año' bʌ ti ts'ajquibil bʌ i yotot. Subeñob: “Tempan la' bʌ ya' ti' pam wits ti Samaria. Q'uelela pejtelel i jontolil jini año' bʌ ti Samaria. Q'uelela bajche' mi' tic'lañob i pi'ʌlob. 10Mach yujilobix i melol chuqui toj. Chuqui tac mi' tajob ti xujch' yic'ot ti leto mi' lotob ti ts'ajquibil bʌ i yotot”. Che' yom ma' subeñob, che'en lac Yum. 11Jini cha'an lac Yum Dios woli' yʌl: Tal la' contra cha'an mi' joy ñup'etla. Mux i jem jini wa'chocobil bʌ la' cha'an. Mux i xujch'ibeñet la' chubʌ'an, che'en.
12Lac Yum tsa' cha' caji' yʌl: Jini israelob chumulo' bʌ ti Samaria wocol mi caj i loq'uelob ya'i. Che' bajche' xcʌnta tiñʌme' mi' loc'sʌben ti' yej bajlum cha'ts'ijt i bʌquel tiñʌme' yic'ot i ñi'il jach i chiquin, che' ja'el mi caj i coltʌntelob israelob. Jini jach i xujt'il i chubʌ'an mi caj i cʌybentelob.
13Ubinla, subenla i yalobilob Jacob: “Lac Yum, i Dios Panchan yic'ot Pañimil woli' yʌl: 14Ti ili q'uin che' mic ju'sʌbeñob i pusic'al jini israelob cha'an tsi' ñusʌbeyon c t'an, mi caj c jem jini pulʌntib tac am bʌ ti Betel. I xulub pulʌntib mi caj i tsejpel jubel. 15Mi caj c jembeñob i yotot ricojob ba' chumulob ti' yorajlel tsʌñal, yic'ot i yotot tac ba' chumulob ti' yorajlel ticwal. Jini otot melbil bʌ ti marfil mi' cajel ti jilel yic'ot yan tac bʌ colem otot jinto mi laj jilel”. Che'ʌch woli' yʌl lac Yum.
Currently Selected:
AMOS 3: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.