AMOS 4

1Ubinla ili t'an, x'ixicob chumulo' bʌ ti' chañelal Samaria. Jujp'emetla bajche' ña' wacax am bʌ ti Basán, come woli la' chilben i chubʌ'an jini p'ump'uño' bʌ. Mi la' tic'lan jini pobrejob. Mi la' suben la' ñoxi'al: “Ch'ʌmbeñon tilel lembal cha'an mic jap”, che'etla. 2Jini lac Yum Dios tsi' yʌc'ʌ i t'an. Come ch'ujul lac Yum jini cha'an ma'anic mi caj i to'ol ñusan la' mul. La' wilan, tal i yorajlel mi caj i loc'sañetla yic'ot lucojib yilal. 3Mi caj la' tujc'ʌntel loq'uel ya' ba' tocol ts'ajc. Mi caj la' chojquel ochel ti mʌjquibʌl. Che'ʌch woli' yʌl lac Yum.

Anquese mi' ju'sʌbentelob jini israelob ma'anic mi' jac'ob

4Cucuxla ti Betel yic'ot ti Gilgal. Woli la' ñusʌben i t'an Dios. Woli la' p'ol la' jontolil. Ch'ʌmbenla majlel i majtan Dios ti jujump'ejl q'uin yic'ot la' diezmo ti u'uxp'ejl q'uin. 5Woli la' pulben Dios caxlan waj am bʌ i levadurajlel i wenta i majtan Dios cha'an mi la' suben wocolix i yʌlʌ. Woli la' sub ti tejclum chuqui tsa' la' wʌc'ʌ ti ofrenda, come che'ʌch yom la' pusic'al, winicob x'ixicob ti Israel. Che'ʌch woli' yʌl lac Yum Dios.

6Joñon tsac chocbeyetla tilel wi'ñal ti pejtelel la' tejclum. Ti pejtelel la' lumal ma'anic tsa' la' taja waj. Pero ma'anic tsa' la' sutq'ui la' bʌ ba' añon. 7Joñon tsac tiq'ui ja'al cha'an ma'anic mi' yajlel ba' añetla che' ti' yorajlel, che' anto yom uxp'ejl uw c'ajbal. Ti jump'ejl tejclum tsac choco tilel ja'al. Ti yambʌ tejclum ma'anic tsac choco tilel ja'al. Xint'umul tac tsa' yajli ja'al ti lum. Ya' ba' ma'anic tsa' yajli woli' tiquin pʌc'ʌbʌl. 8Tsa' loq'uiyetla ti cha'p'ejl uxp'ejl tejclum cha'an mi la' sʌclan majlel ja' ti yambʌ tejclum cha'an mi la' jap. Pero ma'anic tsa' lajmi la' tiquin ti', come mach jasʌlic jini ja'. Pero ma'anic tsa' la' sutq'ui la' bʌ ba' añon. Che'ʌch woli' yʌl lac Yum.

9Tsa cʌc'ʌ ti asiyel i yopol pimel ti uch. Tsa' pujch'i la' lum. Tsac jisa la' pʌc'ʌb yic'ot la' ts'usubil. Jini sajc' tsi' c'uxu xbʌcch'umte' yic'ot olivote', pero ma'anic tsa' la' sutq'ui la' bʌ ba' añon. Che'ʌch woli' yʌl lac Yum. 10Tsac choco tilel c'amʌjel ti la' tojlel che' bajche' mi' yubiñob ti Egipto. Tsac tsʌnsa ch'iton winicob ti espada. Tsac chilbeyetla la' c'ʌchlib. Tsa cʌc'ʌ ti tuw'an la' chumlib. Anquese leco tsa' la' wubi ma'anic tsa' la' sutq'ui la' bʌ ba' añon. Che'ʌch woli' yʌl lac Yum. 11Lamital la' pi'ʌlob tsac jisayob che' bajche' tsac jisa Sodoma yic'ot Gomorra. Tsac loc'sayetla ti c'ajc che' lajaletla bajche' te' woli bʌ ti lejmel, pero ma'anic tsa' la' sutq'ui la' bʌ ba' añon. Che'ʌch woli' yʌl lac Yum.

12Jini cha'an mi caj c meletla, winicob x'ixicob ti Israel. Jini cha'an chajpan la' bʌ cha'an mi la' mel la' bʌ ti Dios, come pʌybiletla, che'en. 13Come jiñʌch Dios tsa' bʌ i mele wits yic'ot ic'. Mi' yʌc' ti tsictiyel chuqui woli' ña'tañob winicob ti' pusic'al. Mi' sutq'uin i sʌclel pañimil ti ic'chipan bʌ. Mi' cha'len xʌmbal ti' chañilel pañimil. I c'aba' lac Yum, i Dios Panchan yic'ot Pañimil.

Currently Selected:

AMOS 4: ctuBI

Highlight

Copy