2 SAMUEL 4
4
Tsa' tsʌnsʌnti Isboset
1Che' bʌ tsi' yubi Isboset (i yalobil Saúl) chʌmenix Abner, tsa' caji ti bʌq'uen. Pejtelel jini israelob tsi' cha'leyob bʌq'uen. 2An i cha'an Isboset cha'tiquil i yumob soldadojob. Juntiquil jiñʌch Baana. Yambʌ jiñʌch Recab i yalobilobʌch Rimón chumul bʌ ti Beerot. Ochem Beerot ti' wenta Benjamín. 3Jini ch'oyolo' bʌ ti Beerot tsa' ñumiyob majlel ti Gitaim. C'ʌlʌl wʌle ya' añob che' bajche' xjula'ob, come mach mero i lumalic.
4An ja'el juntiquil i yalobil Jonatán mach bʌ wenic i yoc. An jax to jo'p'ejl i jabilel che' bʌ tsi' yubiyob ti Jezreel chʌmeñobix Saúl yic'ot Jonatán. Ti jim bʌ ora jini xmec' alʌl tsi' meq'ue majlel ti puts'el. Che' bʌ woli ti ajñel majlel, tsi' yʌsa jini alʌl. Tsa' asiyi i yoc. I c'aba' jini alʌl jiñʌch Mefiboset.
5Recab yic'ot Baana (i yalobilob Rimón ch'oyol bʌ ti Beerot) tsa' ochiyob ya' ti' yotot Isboset ya' ba' ñolol ti' wʌyib woli' c'aj i yo che' ti xinq'uiñil. 6-7Tsa' ochiyob ti mal cha'an mi' q'uechob loq'uel trigo tsi' poj meleyob. Pero ti cha'ticlel tsi' lowoyob Isboset ti' ñʌc'. Tsi' set' t'ojbeyob i bic'. Tsi' wox ch'ʌmbeyob majlel i jol. Tsa' puts'iyob majlel. Tsi' tsajcayob majlel jini Arabá c'ʌlʌl tsa' c'otiyob ti Hebrón. 8Tsi' yʌq'ueyob David i jol Isboset. Tsi' subeyob: Wʌ'ix an i jol Isboset (i yalobil Saúl) tsa' bʌ i contrajiyet, yom bʌ i tsʌnsañet. Lac Yum tsa'ix i q'uextʌbe i mul Saúl yic'ot i p'olbal ti a tojlel, che'ob. 9Pero David tsi' jac'be Recab yic'ot Baana (i yalobilo' bʌ Rimón chumul bʌ ti Beerot): Lac Yum tsi' coltayon ti pejtelel wocol. ¿Mach ba anic mi la' bʌcñan jini cuxul bʌ Dios? 10Che' bʌ tsa' tili winic i subeñon chʌmenix Saúl, tsi' lon ña'ta mi caj cʌq'uen i majtan che' bʌ tsa' tili i subeñon. Pero tsac chucu, tsa cʌc'ʌ ti tsʌnsʌntel ti Siclag cha'an i q'uexol i t'an tsa' bʌ i subeyon. 11Ñumen mi caj cʌq'ueñob i toj i mul xjontolilob mu' bʌ i tsʌnsañob toj bʌ winic ti' yotot che' an ti' wʌyib, che'en. ¿Mach ba yomic mi cʌc' ti la' wenta cha'an mi la' tojben i ch'ich'el? ¿Mach ba yomic mic junyajlel jisañetla ila ti pañimil? che'en. 12Che' jini David tsi' yʌc'ʌ i t'an. Jini x'e'telob i cha'an tsi' tsʌnsayob. Tsi' set' t'ojbeyob loq'uel i c'ʌb yic'ot i yoc. Ya' tsi' jich' ac'ʌyob ti' tojel jini ts'ajquibil bʌ ja' ya' ti Hebrón. Tsi' ch'ʌmbeyob i jol Isboset. Tsa' majli i mucob ya' ba' tsa' mujqui i bʌc'tal Abner.
Currently Selected:
2 SAMUEL 4: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.