2 CRONICAS 36
36
I yumʌntel yic'ot i wocol Joacaz
(2 R. 23.31-35)
1Pejtelel jini winicob ti Judá tsi' wa'chocoyob ti rey Joacaz i yalobil Josías ti' q'uexol i tat. 2An uxp'ejl i cha'c'al (23) i jabilel Joacaz che' bʌ tsa' ochi ti rey. Uxp'ejl uw tsi' cha'le yumʌl ya' ti Jerusalén. 3Jini rey ti Egipto tsi' loc'sa ti' ye'tel ya' ti Jerusalén. Tsi' wersa c'ajtibeyob tojoñel jini año' bʌ ti Judá, uxp'ejl millón peso plata yic'ot oro ti jujump'ejl jab. 4Jini rey Necao ti Egipto tsi' wa'choco ti rey Eliaquim (i yijts'in Joacaz) cha'an mi' cha'len yumʌl ti Judá yic'ot ti Jerusalén. Tsi' q'uextʌbe i c'aba' Eliaquim. Tsi' yotsʌbe i c'aba' Joacim. Jini Necao tsi' cʌchʌ majlel Joacaz ti Egipto.
I yumʌntel Joacim
(2 R. 23.36—24.7)
5An jo'p'ejl i cha'c'al (25) i jabilel Joacim che' bʌ tsa' caji ti yumʌntel. Junlujump'ejl jab tsi' cha'le yumʌl ti Jerusalén. Tsi' mele chuqui jontol ti' wut lac Yum Dios. 6Nabucodonosor jini rey ti Babilonia tsa' tili i contrajin Jerusalén. Tsi' cʌchʌ majlel Joacim ti cadena c'ʌlʌl ti Babilonia. 7Nabucodonosor tsi' ch'ʌmʌ majlel lamital jini uch'ijibʌl melbil bʌ ti oro am bʌ ti' yotot lac Yum. Tsa' c'oti i yotsan ti' templo ya' ti Babilonia. 8Ts'ijbubil ti' juñilel i reyob Israel yic'ot Judá pejtel i melbal Joacim yic'ot i jontolil. Tsa' caji ti yumʌntel Joaquín ti' q'uexol i tat.
9An jax to waxʌclujump'ejl (18) i jabilel Joaquín che' bʌ tsa' ochi ti rey. Uxp'ejl uw yic'ot lujump'ejl q'uin tsi' cha'le yumʌl ya' ti Jerusalén. Tsi' mele chuqui jontol ti' wut lac Yum. 10Che' wolix i joloñel jini jabil, jini rey Nabucodonosor tsi' choco tilel i winicob cha'an mi' cʌchob majlel Joaquín ya' ti Babilonia. Tsi' ch'ʌmʌyob majlel ja'el jini e'tijibʌl letsem tac bʌ i tojol am bʌ ti Templo. Nabucodonosor tsi' wa'choco ti rey Sedequías i yumijel Joaquín ya' ti Judá yic'ot ti Jerusalén.
I yumʌntel Sedequías
(2 R. 24.18-20; Jer. 52.1-3)
11An jump'ejl i cha'c'al (21) i jabilel Sedequías che' bʌ tsa' caji ti yumʌntel. Junlujump'ejl jab tsi' cha'le yumʌntel ya' ti Jerusalén. 12Jontol chuqui tsi' mele ti' wut lac Yum Dios. Ma'anic tsi' peq'uesa i bʌ ti' tojlel jini x'alt'an Jeremías tsa' bʌ i tsictesʌbe pejtelel i t'an lac Yum. 13Sedequías tsi' ñusʌbe i t'an Nabucodonosor, anquese tsi' yʌq'ue i t'an ti' c'aba' Dios. Tsi' yʌlʌ muc'ʌch i jac' pero tsi' tsʌts'esa i pusic'al. Ma'anic tsi' ñopo lac Yum i Dios Israel. 14Pejtelel jini yumʌlob yic'ot jini motomajob tsi' cʌyʌyob lac Yum. Tsi' ñopbeyob i melbal yan tac bʌ tejclumob. Che' jini tsi' bib'esʌbeyob i Templo lac Yum ba' tsi' yʌc'ʌ i bʌ ti cʌjñel ya' ti Jerusalén.
15Lac Yum i Dios i ñojte'elob tsi' chʌn chocbeyob tilel x'alt'añob, come tsi' p'untayob yic'ot i Templo. 16Pero tsi' chʌn wajleyob jini subt'añob i cha'an lac Yum. Tsi' ñusʌbeyob i t'an. Tsi' ts'a'leyob x'alt'añob jinto lac Yum tsi' wen mich'leyob. Ma'anix tsi' chʌn coltayob.
Tsa' cʌjchi majlel Judá
(2 R. 25.8-21; Jer. 39.8-10; 52.12-30)
17Lac Yum tsi' pʌyʌ tilel i rey Babilonia cha'an mi' contrajiñob. Tsi' tsʌnsayob yic'ot espada jini ch'iton winicob tsa' bʌ puts'iyob ti Templo. Jini soldadojob ma'anic tsi' p'untayob jini israelob mi ch'itoñob mi xch'ocob mi xñoxob. Tsi' laj tsʌnsayob. 18Tsi' ch'ʌmʌyob majlel ti Babilonia pejtel i bʌl Templo jini ñuc tac bʌ yic'ot ch'o'ch'oc tac bʌ chubʌ'añʌl am bʌ ti' yotot Dios, yic'ot i chubʌ'an jini rey, yic'ot jini ñuco' bʌ i ye'tel. 19Jini soldadojob tsi' pulbeyob i Templo Dios. Tsi' laj jemeyob jini ts'ajc am bʌ ti' joytʌlel Jerusalén. Tsi' laj puluyob pejtelel jini colem otot. Tsi' jisayob pejelel jini uts'at bʌ i bʌl Templo. 20Pejtelel jini tsa' bʌ cʌleyob tsa' cʌjchiyob majlel ti Babilonia. Tsa' ochiyob ti x'e'tel i cha'an jini rey yic'ot i yalobilob jinto tsa' tili i rey Persia cha'an mi' chilben i yumʌntel jini rey ti Babilonia. 21Che' jini tsa' ts'ʌctiyi i t'an lac Yum tsa' bʌ i sube jini x'alt'an Jeremías cha'an wersa mi' c'aj i yo i lumal Israel. Lujump'ejl i chʌnc'al jab jochol tsa' cʌle jini lum, come jini israelob tsi' ñusʌbeyob i t'an Dios. Ma'anic tsi' yʌq'ueyob i c'aj i yo i lumob.
I mandar jini Ciro
(Esd. 1.1-4)
22Tsa' wersa ts'ʌctiyi i t'an lac Yum tsa' bʌ subenti Jeremías. Che' ti ñaxan bʌ jab i ye'tel jini Ciro, rey bʌ ti Persia, lac Yum tsi' ñijcʌbe i pusic'al Ciro rey bʌ ti Persia. Tsi' yʌc'ʌ ti pam pujquel i t'an yic'ot i ts'ijbujel ti pejtelel lum ba' tsi' cha'le yumʌl. 23Jini Ciro rey bʌ ti Persia woli' yʌl: Lac Yum Dios am bʌ ti panchan tsa'ix i yʌc'ʌ tic wenta cha'an mic cha'len yumʌl ti pejtelel pañimil. Tsi' subeyon cha'an mic wa'chocoben i Templo ya' ti Jerusalén am bʌ ti Judá. Cucula ti la' lumal pejteletla i cha'añet bʌ la Dios. La' majlic lac Yum la' wic'ot cha'an uts'at mi la' c'otel. Che' tsi' yʌlʌ Ciro.
Currently Selected:
2 CRONICAS 36: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.