2 CRONICAS 35
35
Josías tsi' mele jini Pascua
(2 R. 23.21-23)
1Josías tsi' mele jini Pascua ti' tojlel lac Yum ya' ti Jerusalén. Tsi' tsʌnsayob jini tiñʌme' cha'an Pascua che' ti ñaxan bʌ tsic ti abril. 2Tsi' yʌq'ue i ye'tel jini motomajob ti chajp ti chajp. Tsi' wa'chocoyob ti' ye'tel ya' ti Templo. 3Tsi' subeyob jini levíjob i cha'año' bʌ lac Yum woli bʌ i cʌntesañob israelob: Otsanla jini ch'ujul bʌ Arca ti' Templo lac Yum wa'chocobil bʌ cha'an Salomón i yalobil David rey bʌ ti Israel. Mach yomix mi la' chʌn q'uech tilel. Melbenla i ye'tel lac Yum Dios ti' tojlel israelob. 4-5Chajpan la' bʌ ti mojt ti mojt yic'ot la' pi'ʌlob che' bajche' tsi' yʌq'ueyetla mandar David rey bʌ ti Israel yic'ot Salomón i yalobil. Chʌn ajñenla ya' ti Ch'ujul bʌ Ajñibʌl ti' wenta la' pi'ʌlob mu' bʌ i ch'ʌmob tilel majtañʌl tac. 6Tsʌnsanla jini tiñʌme' cha'an Pascua. Sʌq'uesan la' bʌ. Coltanla jini mu' bʌ i tilelob cha'an mi' jac'beñob i t'an lac Yum che' bajche' tsi' yʌc'ʌ mandar Moisés, che'en Josías.
7Jini rey Josías tsi' yʌc'ʌ alʌ tat tiñʌme' yic'ot alʌ chivo lujump'ejl i cha'c'al mil alʌc'ʌl ti pejtelel, yic'ot uxp'ejl mil alʌ tat wacax cha'an mi' c'uxob winicob x'ixicob ti Pascua. Tsi' laj aq'ue Dios. 8Jini año' bʌ i ye'tel tsi' yʌq'ueyob i majtan tac motomajob yic'ot levíjob tilem bʌ ti' pusic'alob. Hilcías yic'ot Zacarías yic'ot Jehiel, jini wa'chocobilo' bʌ cha'an mi' cha'leñob i ye'tel ti Templo, tsi' yʌc'ʌyob ojlil i wucbajc' (2,600) tiñʌme' yic'ot chivo, yic'ot jo'lujunc'al tat wacax cha'an mi' c'uxob ti Pascua. 9Conanías yic'ot Semaías yic'ot Natanael i yerañob, yic'ot i yumob levíjob, jiñobʌch Hasabías yic'ot Jeiel, yic'ot Josabad, tsi' yʌc'ʌyob jo'p'ejl mil tiñʌme' yic'ot jo'c'al i cha'bajc (500) tat wacax cha'an mi' c'uxob levíjob cha'an Pascua.
10Che' chajpʌbilix pejtelel jini majtañʌl, jini motomajob tsa' caji i melob i ye'tel ti jujuntiquil, che' ja'el jini levíjob ti mojt ti mojt tsi' meleyob che' bajche' tsi' yʌlʌ jini rey. 11Jini levíjob tsa' caji i tsʌnsañob jini tiñʌme'. Jini motomajob tsa' caji i tsijcañob ti pulʌntib jini ch'ich' tsa' bʌ i ch'ʌmʌyob ti' c'ʌb levíjob. Jini levíjob tsa' caji i ts'ulob jini chʌmenix bʌ alʌc'ʌl. 12Jini levíjob tsi' yʌq'ueyob winicob jini ts'ulbil bʌ alʌc'ʌl ti jujunmojt israelob cha'an mi' yʌq'ueñob lac Yum che' bajche' ts'ijbubil ti' juñilel Moisés. Lajal ja'el tsi' meleyob yic'ot jini tat wacax. 13Tsi' pojpoyob jini tiñʌme' cha'an Pascua che' bajche' ts'ijbubil ti mandar. Tsa' caji i ch'ʌxob ti p'ejt yambʌ ch'ujul bʌ majtañʌl tac. Che' tic'anix tsa' caji i pucbeñob jini winicob cha'an mi' c'uxob ti ora. 14Ti wi'il jini levíjob tsi' bajñel chajpayob i bʌlob i ñʌc' cha'an mi' c'uxob yic'ot jini motomajob. Come jini motomajob i yalobilob Aarón tsi' chʌn pulbeyob i majtan lac Yum yic'ot i lewil alʌc'ʌl c'ʌlʌl ti ac'ʌlel. 15Jini xc'ayob (i yalobilob Asaf) tsi' chʌn meleyob i ye'tel che' bajche' tsi' yʌc'ʌyob mandar David yic'ot Asaf yic'ot Hemán yic'ot Jedutún, jini x'alt'an ti' wenta jini rey. Jini xc'ayob año' bʌ ti' ti' otot tsi' chʌn meleyob i ye'tel ja'el. Ma'anic tsi' cʌyʌyob, come jini levíjob i pi'ʌlob tsi' ch'ʌmbeyob tilel chuqui mi' c'uxob.
16Che'ʌch tsa' ujti i mel jini Pascua. Tsi' pulbeyob lac Yum pejtelel jini tsʌnsʌbil tac bʌ i majtan ya' ti pulʌntib che' bajche' tsi' subu jini rey Josías. 17Pejtelel jini israelob tsa' bʌ c'otiyob ti Jerusalén tsi' comol cha'leyob q'uiñijel che' ti Pascua. Wucp'ejl q'uin tsi' c'uxuyob jini waj mach bʌ anic i levadurajlel. 18Ma'anic tsa' ujti yambʌ ñuc bʌ Pascua che' bajche' jini c'ʌlʌl che' bʌ tsi' ñusa i ye'tel jini x'alt'an Samuel. Ma'anic yambʌ rey ti Israel tsa' bʌ i mele ñuc bʌ q'uiñijel cha'an Pascua che' bajche' tsi' mele jini rey Josías, yic'ot pejtelel jini motomajob yic'ot levíjob, yic'ot pejtelel año' bʌ ti Judá yic'ot ti Israel, yic'ot jini chumulo' bʌ ti Jerusalén. 19Tsa' ujti jini Pascua che' waxʌclujump'ejlix jab i yumʌntel Josías.
Tsa' chʌmi Josías
(2 R. 23.28-30)
20Che' ujtemix Pascua, che' cha' wen melbilix i Templo lac Yum, tsi' teche guerra jini rey ti Egipto i c'aba' Necao yic'ot i soldadojob ti' contra jini asiriajob ya' ti Carquemis am bʌ ti' ti' jini colem ja' Eufrates. Josías tsa' majli i cha'len guerra ti' contra Necao. 21Necao tsi' choco tilel suboñelob ba'an Josías. Tsi' sube: Mach comic c cha'len guerra ti' contra Judá, cojach ti' contra jini rey ti Asiria. Dios tsi' subeyon cha'an mic se'ñun c bʌ. Jini cha'an mach a contrajiñon, come Dios woli' coltañon. Cucu ti a lumal ame i jisañet lac Yum. Che' tsi' yʌlʌ jini rey Necao. 22Pero ma'anic tsa' sujti Josías. Tsa' utsi caji i chajpan i bʌ cha'an guerra, come ma'anic tsi' jac'be i t'an jini Necao, anquese tilem ti Dios chuqui tsi' yʌlʌ Necao. Tsa' wersa majli ti guerra Josías ya' ti joctʌl i c'aba' Meguido. 23Pero jini xjulbʌlob tsi' toj juluyob jini rey Josías. Che' jini Josías tsi' sube i yaj e'telob: Loc'sañon ilayi come wen lojwemonix, che'en. 24Ti ora jini x'e'telob tsi' loc'sayob ti' carreta. Tsi' yotsayob ti yambʌ i carreta cha'an mi' sujtelob ti Jerusalén ba' tsa' chʌmi. Tsi' mucuyob ya' ba' muculob jini reyob. Pejtelel jini chumulo' bʌ ti Judá yic'ot Jerusalén tsi' yuc'tayob. 25Jeremías tsi' ts'ijba c'ay cha'an mi' yuc'tañob Josías. Jini yujilo' bʌ c'ay tsi' yuc'tayob che' bajche' i tilel mi' melob ti Israel c'ʌlʌl wʌle. Ts'ijbubil ti jun bajche' mi' yuc'tañob jini chʌmeño' bʌ. 26-27Ts'ijbubil ti' juñilel i reyob Israel yic'ot Judá pejtelel i melbal Josías c'ʌlʌl ti' tejchibal i yumʌntel. Tsi' c'uxbi lac Yum. Tsi' jac'be i mandar lac Yum che' bajche' ts'ijbubil.
Currently Selected:
2 CRONICAS 35: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.