1 SAMUEL 6
6
Jini filisteojob tsi' cha' sutq'uiyob jini Arca
1Wucp'ejl uw ya'an jini Arca i cha'an bʌ lac Yum ti' tojlel jini filisteojob. 2Tsi' pʌyʌyob tilel motomajob yic'ot xwujtob. Tsi' c'ajtibeyob: ¿Chuqui mi mejlel lac tumben jini Arca i cha'an i Yum israelob? Subeñon lojon bajche' yom mic mel lojon cha'an mic cha' ac' lojon ya' ba'an ti ñaxan, che'ob. 3Tsi' yʌlʌyob: Yom mi la' cha' choc majlel jini Arca i cha'an bʌ i Dios israelob. Pero mach yomic jochol mi la' choc majlel. Yom mi la' wʌq'uen i majtan Dios cha'an mi' ñusʌbeñetla la' mul. Che' jini mi la' cajel ti lajmel. Muq'uix cajel la' ña'tan chucoch woli' tic'lañetla, che'ob.
4Tsi' c'ajtibeyob: ¿Chuqui yom mi cʌq'uen lojon jini Dios cha'an mi' ñusʌbeñon lojon c mul? che'ob. Tsi' jac'beyob: Yom mi la' wʌq'uen jo'p'ejl chʌcajl melbil bʌ ti oro, yic'ot jo'cojt colem tsuc melbil bʌ ti oro come jo'tiquilob i yumob filisteojob. Junlajal tsa' la' wubi jini c'amʌjel. 5Yom mi la' mel i yejtal tac la' chʌcajl, yic'ot i yejtal jini tsuc tac mu' bʌ i tic'lan la' lum. Che' jini mi caj la' wʌc' ti ñuc i Dios israelob. Che' jini mi caj i cʌy i tic'lan la' diosob yic'ot la' lum. 6¿Chucoch cabʌl jax mi la' tsʌts'esan la' pusic'al che' bajche' tsi' tsʌts'esayob i pusic'al jini año' bʌ ti Egipto yic'ot Faraón? ¿Mach ba anic tsa' cajiyob ti bʌq'uen che' bʌ tsi' q'ueleyob ñuc bʌ i p'ʌtʌlel jini Dios? Tsi' wersa coloyob jini israelob. 7Jini cha'an yom mi la' mel tsiji' bʌ carreta. Yajcanla cha'cojt ña' wacax tsijib tojp'em jax to bʌ i yal, maxto bʌ c'ʌmbilic ti e'tel. Yom mi la' cʌch jini wacax ya' ti carreta, che' cʌchʌl i yal jini wacax ya' ti' yotlel. 8Yom mi la' ch'ʌm jini Arca i cha'an bʌ lac Yum. Yom mi la' c'ʌcchocon ya' ti' pam jini carreta yic'ot pejtelel jini majtañʌl melbil bʌ ti oro cha'an mi' ñusʌbentel lac mul. Otsanla ti jump'ejl cajón te' che' mi la' wʌc' ti carreta yic'ot jini Arca. Che'ʌch yom mi la' wʌc' ti majlel. 9Yom mi la' wen q'uel baqui mi' majlel. Mi ya' mi' letsel majlel ti' bijlel Betsemes, muq'uix caj la' ña'tan jiñʌch Dios tsa' bʌ i tic'layonla. Pero mi mach tojic mi' majlel, muq'uix la' ña'tan mach Diosic tsa' bʌ i tic'layonla. Yilol jach tsa' ujti, che'ob.
10Che'ʌch tsi' meleyob jini filisteojob che' bajche' iliyi. Tsi' pʌyʌyob tilel cha'cojt ña' wacax alʌl to bʌ i yal. Tsi' cʌchʌyob ya' ti carreta. Tsi' ñup'uyob ti otot i yal. 11Che' jini tsi' c'ʌcchocoyob jini Arca i cha'an bʌ lac Yum ya' ti' pam jini carreta, yic'ot jini cajón te' ya' ba' ñup'ul i yejtal bʌ tsuc, melbil bʌ ti oro yic'ot i yejtal tac chʌcajl. 12Che' jini tsa' caji i cha'leñob xʌmbal jini wacax ti' tojel i bijlel Betsemes. Toj jach tsi' xʌñʌyob majlel jini bij. Che' bʌ woliyob ti xʌmbal, woliyob ti oñel majlel. Ma'anic tsa' wis ochiyob ti yambʌ bij, mi ti' ñojic mi ti' ts'ejic. Jini filisteojob ñuco' bʌ i ye'tel tsi' tsʌcleyob majlel jini carreta c'ʌlʌl ya' ba' jaxʌl i cayajonlel i lumal Betsemes.
13Ti jim bʌ q'uin jini año' bʌ ti Betsemes woli' tuc'ob trigo ya' ti joctʌl. Che' bʌ tsi' letsayob i wut, tsi' q'ueleyob jini Arca woli bʌ i jexban tilel jini wacax. Wen tijicñayob i pusic'al tsa' caji i yubiñob che' bʌ tsi' q'ueleyob jini Arca. 14Jini carreta toj jach tsa' c'ʌlʌ c'oti ti' lum Josué chumul bʌ ti Betsemes. Ya' tsa' cotle ti' t'ejl jump'ejl colem xajlel. Ya' tsi' bic'ti jatʌyob i te'el jini carreta. Jini israelob tsi' tsʌnsayob jini cha'cojt ña' wacax. Tsi' pulbeyob i majtan lac Yum. 15Che' jini, jini levíjob tsi' ju'sayob jini Arca i cha'an bʌ lac Yum, yic'ot jini cajón te' am bʌ ti junwejl ba' lotol jini majtañʌl melbil bʌ ti oro. Tsi' c'ʌcchocoyob ya' ti' pam colem xajlel. Jini winicob ti Betsemes tsi' yʌq'ueyob pulbil tac bʌ i majtan lac Yum yic'ot yan tac bʌ i majtan. 16Jini jo'tiquil filisteojob ñuco' bʌ i ye'tel che' bʌ tsi' wen q'ueleyob chuqui tsa' ujti, tsa' sujtiyob c'ʌlʌl ti Ecrón ti jini jach bʌ q'uin.
17Jini filisteojob chumulo' bʌ ti Asdod, ti Gaza, ti Ascalón, ti Gat, yic'ot ti Ecrón tsi' yʌc'ʌyob jujump'ejl i yejtal chʌcajl melbil bʌ ti oro cha'an mi' ñusʌbentelob i mul, jump'ejl cha'an jujump'ejl tejclum. 18Lajal ja'el tsi' yʌc'ʌyob i yejtal tac tsuc melbil bʌ ti oro ti jujump'ejl tejclum am bʌ ti' wenta jini jo'tiquil yumʌlob, jini ts'ajquibil bʌ tejclum tac joy mʌcbil bʌ ti xajlel yic'ot xchumtʌl tac am bʌ ti' joytʌlel mach bʌ joy mʌcbilic. Ya'to an jini colem xajlel ba' tsi' c'ʌcchocoyob jini Arca i cha'an bʌ lac Yum ya' ti Betsemes ti' lum Josué.
19Lac Yum tsi' tsʌnsa lamital jini winicob año' bʌ ti Betsemes cha'an tsi' q'uelbeyob i mal jini Arca i cha'an bʌ lac Yum. Tsi' tsʌnsa lujuntiquil i chʌnc'al (70) winicob. Jini cha'an tsi' wen cha'leyob uq'uel jini ya' bʌ chumulob cha'an on tsa' jiliyob i pi'ʌlob. 20Tsa' caji i yʌlob jini año' bʌ ti Betsemes: ¿Majqui mi mejlel i yajñel ti' tojlel lac Yum jini ch'ujul bʌ Dios? ¿Baqui mi mejlel lac choc majlel jini Arca? che'ob. 21Che' jini tsi' chocoyob majlel winicob ti Quiriat Jearim. Tsi' yʌlʌyob: I yumob filisteojob tsi' cʌyʌyob jini Arca i cha'an bʌ lac Yum wʌ' tic lum lojon. La'la ch'ʌmʌla majlel ba'an la' pi'ʌlob, che'ob.
Currently Selected:
1 SAMUEL 6: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.