1 SAMUEL 5
5
Jini Arca an ti' lumal filisteojob
1Che' bʌ tsa' mʌjli i cha'añob jini filisteojob, tsi' ch'ʌmʌyob jini Arca i cha'an bʌ lac Yum. Tsi' loc'sayob ti Ebenezer. Tsi' ch'ʌmʌyob majlel ti Asdod. 2Tsi' yotsayob jini Arca i cha'an bʌ Dios ti' templo Dagón, i dios filisteojob. Tsi' cotchocoyob ya' ti' t'ejl. 3Che' ti yijc'ʌlal che' ti wen sʌc'ajel, tsa' tiliyob jini año' bʌ ti Asdod ti' templo Dagón. Tsi' tajayob i dios ñuc yajlemix ti' tojel jini Arca i cha'an bʌ lac Yum. Tsi' cha' wa'chocoyob jini Dagón ya' ba'an ti ñaxan. 4Pero che' ti yijc'ʌlal che' bʌ tsa' ch'ojyiyob, tsi' q'ueleyob cha' ñuc yajlemix Dagón ti' tojel jini Arca i cha'an bʌ lac Yum. I jol yic'ot i bic' yic'ot i c'ʌb, laj c'ʌscuyemix. To'o i cuctal jax tsa' cʌle. 5Jini cha'an jini motomajob i cha'an Dagón yic'ot pejtelel jini mu' bʌ i yochelob ti' mal jini templo c'ʌlʌl wʌle, ma'anic mi' t'uchtañob jini lum ti' tojel i buchlib Dagón ya' ti' yotlel am bʌ ti Asdod.
6Lac Yum tsi' yʌq'ueyob wocol jini año' bʌ ti Asdod yic'ot ti' joytʌlel. Tsi' tic'layob ti wocol bʌ chʌmel. Tsi' yʌq'ueyob chʌcajl. 7Che' bʌ tsa' caji i ña'tañob chuqui woli' yujtel, jini año' bʌ ti Asdod tsi' yʌlʌyob: Mach yomic mi' cʌytʌl la quic'ot jini Arca i cha'an bʌ i Dios israelob, come wolix i wen tic'lañonla. Wolix i tic'lan lac dios Dagón ja'el, che'ob.
8Che' jini tsi' pʌyʌyob tilel jini año' bʌ i ye'tel ti' tojlel filisteojob. Tsi' yʌlʌyob: Q'uelela bajche' añonla cha'an jini Arca i cha'an bʌ i Dios israelob. ¿Chuqui yom mi lac mel? che'ob. Pejtelel jini winicob tsi' yʌlʌyob: La lac choc majlel ti Gat jini Arca i cha'an bʌ i Dios israelob, che'ob. Che' jini tsi' c'axtesayob ti Gat jini Arca i cha'an bʌ i Dios israelob. 9Jini cha'an lac Yum tsa' caji i yʌq'ueñob wocol jini año' bʌ ti Gat. Tsa' caji i yubiñob wocol jini winicob yic'ot alobob yic'ot ñoxtacobix bʌ. Tsa' laj p'ojliyob i chʌcajl. 10Jini cha'an tsi' chocoyob majlel ti Ecrón jini Arca i cha'an bʌ Dios. Pero pejtelel jini chumulo' bʌ ti Ecrón tsa' cajiyob ti c'am bʌ t'an che' bʌ tsi' q'ueleyob wolix ti ch'ʌjmel tilel. Tsi' yʌlʌyob: Yomobix i tsʌnsañonla yic'ot pejtelel lac pi'ʌlob wʌ' ti lac tejclum, che'ob.
11Tsi' chocoyob ti pʌyol pejtelel jini año' bʌ i ye'tel ti' tojlel filisteojob. Tsi' subeyob: Yom mi la' choc majlel jini Arca i cha'an bʌ i Dios israelob. Cha' ac'ʌla ya' ti' yajñib che' bajche' ti ñaxan cha'an ma'anic mi' tsʌnsañonla yic'ot pejtelel lac pi'ʌlob ila ti tejclum, che'ob. Come cabʌl tsa' chʌmiyob ti jujump'ejl tejclum ba' tsa' ñumi, come Dios tsi' yʌq'ueyob wocol. 12Jini mach bʌ anic tsa' chʌmiyob tsa' p'ojliyob i chʌcajl. Tsa' c'ʌlʌ letsiyob i yuq'uel ti panchan.
Currently Selected:
1 SAMUEL 5: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.