1 SAMUEL 4
4
Jini filisteojob tsi' ch'ʌmʌyob jini Arca
1Tsi' yubibeyob i t'an Samuel pejtelel israelob. Tsa' cajiyob ti guerra ti' contra filisteojob. Tsa' loq'uiyob majlel cha'an mi' jijlelob ya' ti Ebenezer. Jini filisteojob ya' jijlemob ti Afec. 2Jini filisteojob tsa' c'oti i tajob israelob ti guerra. Tsa' wen mʌjli i cha'añob. Tsa' jisantiyob chʌmp'ejl mil israelob. 3Che' bʌ tsa' cha' sujtiyob jini israelob ya' ba' jijlemob i pi'ʌlob, jini ñoxobix bʌ tsi' yʌlʌyob: ¿Chucoch tsi' yʌc'ʌyonla ti jilel lac Yum ti' tojlel filisteojob? Conla ti Silo cha'an mi lac ch'ʌm tilel jini Arca ya' ba' lotol jini xuc'ul bʌ i t'an lac Yum. Che' jini lac Yum mi caj i tilel ti lac tojlel cha'an mi' coltañonla, cha'an mi lac loq'uel ti' p'ʌtʌlel laj contrajob, lon che'ob.
4Jini cha'an tsi' chocoyob majlel winicob cha'an mi' ch'ʌmob tilel jini Arca ba' lotol jini xuc'ul bʌ i t'an lac Yum. Jiñʌch i Yum Panchan yic'ot Pañimil buchul bʌ ti' chañelal querubiñob. Jini cha'tiquil i yalobilob Elí, Ofni yic'ot Finees, tsa' tiliyob yic'ot jini Arca i cha'an bʌ lac Yum.
5Che' bʌ tsa' c'oti jini Arca i cha'an bʌ lac Yum ya' ba' tempʌbilob pejtelel jini israelob, tsi' cha'leyob c'am bʌ t'an ti' tijicñʌyelob i pusic'al. Ñajt tsiquilob i t'an. 6Jini filisteojob tsi' yubiyob jini c'am bʌ t'an. Tsi' yʌlʌyob: ¿Chuqui i sujmlel jini ju'ucña bʌ t'an ti' tojlel hebreojob ya' ba' tempʌbilob? che'ob. Tsa' subentiyob: Ya' anob yic'ot jini Arca i cha'an bʌ i Yum, che'ob.
7Che' jini tsa' cajiyob ti bʌq'uen jini filisteojob. Tsa' caji' yʌlob: Tsa'ix c'oti i diosob ya' ba' tempʌbilob. ¿Bajchexca mi caj la cujtel? Come ma'anic ba' ujtem ti yambʌ ora che' bajche' iliyi. 8Obol lac bʌ. ¿Majqui mi caj i coltañonla cha'an mi lac loq'uel ti' tojlel p'ʌtʌl bʌ i diosob? Come jiñʌch i diosob tsa' bʌ i yʌq'ueyob c'amʌjel jini año' bʌ ti Egipto. Tsi' junyajlel jisayob ya' ti colem bʌ i tiquiñal pañimil. 9Jini cha'an cha'lenla wersa. Pʌsʌ la' p'ʌtʌlel cha'an winiquetla, ame cajic lac yuman jini hebreojob che' bajche' tsi' yumayonla ti ñaxan. Yom ch'ejl mi la' mel la' bʌ ti guerra, che'ob.
10Che' jini tsa' cha' cajiyob ti guerra jini filisteojob. Tsa' cha' mʌjliyob i cha'an. Pejtelel jini israelob tsi' chucuyob i puts'el. Cabʌl tsa' chʌmiyob. Tsa' jiliyob lujuntiquil i cha'c'al mil (30,000) israelob. 11Jini filisteojob tsi' ch'ʌmʌyob majlel jini Arca i cha'an bʌ lac Yum. Tsa' tsʌnsʌntiyob jini cha'tiquil i yalobilob Elí, jiñʌch Ofni yic'ot Finees.
Tsa' chʌmi Elí
12Juntiquil winic ch'oyol bʌ ti Benjamín tsa' majli ti ajñel cha'an mi' subeñob i pi'ʌlob. Tsa' c'ʌlʌ c'oti ti Silo. Laj tsijlem i pislel. An ts'ubejn ti' jol cha'an i ch'ijiyemlel i pusic'al ti jim bʌ q'uin. 13Che' bʌ tsa' c'oti, tsi' taja Elí ya' buchul ti' t'ejl bij. Woli' chʌcʌ q'uel jini bij, come woli ti bʌq'uen cha'an tsi' ch'ʌmʌyob majlel jini Arca i cha'an bʌ lac Yum. Che' ochemix ti tejclum jini winic, tsa' caji i sub ñumel chuqui tsa' ujti ti guerra. Tsa' cajiyob ti c'am bʌ t'an pejtelel jini xchumtʌlob. 14Elí tsi' yubibeyob i t'an. Tsi' yʌlʌ: ¿Chucoch woliyob ti c'am bʌ t'an? che'en. Ti ora tsa' tili jini winic i suben chuqui tsa' ujti. 15Anix waxʌclujump'ejl i jo'c'al (98) i jabilel Elí. Ma'anix woli' wen c'otel i wut. 16Jini winic tsa' caji i suben chuqui tsa' ujti: Joñon tsa' puts'iyon loq'uel ya' ba' woliyob ti guerra, che'en. Elí tsi' yʌlʌ: ¿Chuqui tsa' ujti, c'uxbibil bʌ calobil? che'en.
17Jini suboñel tsi' jac'ʌ: Tsa'ix puts'iyob pejtelel jini israelob ti' tojlel filisteojob. Cabʌl tsa' chʌmiyob. Tsa'ix chʌmiyob ja'el a walobilob Ofni yic'ot Finees. Jini filisteojob tsa'ix i ch'ʌmʌyob majlel jini Arca i cha'an bʌ lac Yum, che'en. 18Che' bʌ tsi' taja ti t'an jini Arca i cha'an bʌ lac Yum, tsi' ch'a'choco i bʌ Elí. Tsa' yajli ti' buchlib ya' ti' t'ejl jini puerta. Tsa' toj p'ijti i bic' come wen an i yalel. Tsa' chʌmi. Wen ñoxix. Cha'c'al jab tsi' cha'le i ye'tel ti juez ti' tojlel israelob.
19Ti jim bʌ ora cʌntʌbil to i yalobil i yʌ'lib Elí, i yijñam bʌ Finees. Lʌc'ʌlix i yorajlel mi' yilan pañimil i yalobil. Tsi' yubi ch'ʌmʌlix ti' wenta filisteojob jini Arca i cha'an bʌ lac Yum, chʌmenix i ñoxi'al. Tsi' wa'c'uchu i bʌ ti ora. Tsa' caji i yilan pañimil i yalobil, come ti jini jach bʌ ora tsa' caji ti tejchel i wocol. 20Che' bʌ yomix chʌmel jini x'ixic, i pi'ʌlob ya' bʌ añob yic'ot ya' ti' yotot tsi' subeyob: Mach a cha'len bʌq'uen, come tsa'ix i yila pañimil ch'iton bʌ a walobil, che'ob. Jini x'ixic ma'anic tsi' jac'ʌ, ma'anix tsi' p'isi ti wenta. 21Tsa' jach i yotsʌbe i c'aba' jini alʌl: Icabod, yom bʌ i yʌl: “Ma'anix i ñuclel Israel”. Che'ʌch tsi' yʌlʌ, come tsa'ix chilbentiyob jini Arca i cha'an bʌ lac Yum. Meba'ix jini alʌl come chʌmenix i tat yic'ot i tatuch. 22Jini cha'an tsi' yʌlʌ jini x'ixic che' wolix i chʌmel: Ma'anix i ñuclel Israel, come tsa'ix i ch'ʌmʌyob majlel jini Arca i cha'an bʌ Dios, che'en.
Currently Selected:
1 SAMUEL 4: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.