1 SAMUEL 31
31
Tsa' chʌmi Saúl yic'ot i yalobilob
(1 Cr. 10.1-12)
1Jini filisteojob tsi' cha'leyob guerra ti' contra israelob. Tsa' mʌjli i cha'añob. Tsa' puts'iyob jini israelob. Tsa' cʌleyob jini chʌmeño' bʌ ti wits i c'aba' Gilboa. 2Jini filisteojob tsi' yajñesayob majlel Saúl yic'ot i yalobilob. Tsi' tsʌnsayob uxtiquil i yalobilob Saúl: Jonatán, Abinadab yic'ot jini Malquisúa. 3Wen tsʌts tsa' ujti jini guerra ti' tojlel Saúl. Cha'tiquil uxtiquil yujilo' bʌ i c'ʌñol jalʌjb tsi' lowoyob Saúl. 4Saúl tsi' sube i winic woli bʌ i chucben majlel i ye'tijib cha'an guerra: Bots'o a wespada cha'an ma' junyajlel tsʌnsañon ame tilic i wajleñon jini sajtemo' bʌ cha'an mi' p'ump'un tic'lañoñob, che'en. Pero ma'anic tsi' jac'be come woli ti bʌq'uen. Jini cha'an Saúl tsi' ch'ʌmʌ jini espada. Tsi' wʌlʌc jeq'ue i bʌ. 5I winic Saúl tsi' tsʌnsa i bʌ yic'ot i yespada ja'el che' bʌ tsi' q'uele chʌmenix i yum. Lajal tsa' chʌmi yic'ot Saúl. 6Ti jini jach bʌ q'uin tsa' chʌmi Saúl yic'ot uxtiquil i yalobilob yic'ot jini tsa' bʌ i cuchbe majlel i ye'tijib yic'ot i pi'ʌlob ti guerra. 7Pejtelel jini israelob año' bʌ ti joctʌl yic'ot ti junwejl Jordán ja' tsi' yubiyob bajche' tsa' puts'iyob israelob yic'ot bajche' tsa' chʌmi Saúl temel yic'ot i yalobilob. Tsi' cʌyʌyob i tejclum tac. Tsa' puts'iyob ja'el. Tsa' cajiyob ti ochel jini filisteojob ti xchumtʌl tac. Tsi' chucuyob.
8Che' ti yijc'ʌlal tsa' tili i xujch'iñob majlel jini xchʌmelob. Tsi' tajbeyob i bʌc'tal Saúl yic'ot uxtiquil i yalobilob, ya' ñololob ti wits i c'aba' Gilboa ba' tsa' yajliyob. 9Tsi' set' t'ojbeyob i bic' Saúl. Tsi' chocoyob majlel suboñelob ti pejtelel i lumal filisteojob cha'an mi' tsictesʌbeñob i pi'ʌlob baqui jach tempʌbilob ti' yotot tac i dioste'ob. 10Tsi' yotsayob i ye'tijib ya' ti' mal i templo tac Astarot. Tsi' joc'chocobeyob i bʌc'tal Saúl ya' ti ñʌc' ts'ajc' ti Betsan. 11Jini año' bʌ ti Jabes ti Galaad tsi' yubiyob chuqui tsi' tumbeyob Saúl. 12Jini cha'an pejtelel jini ch'ejlo' bʌ winicob tsi' tempayob i bʌ. Tsa' caji' cha'leñob xʌmbal ti ic'ajel c'ʌlʌl tsa' ñumi ac'ʌlel. Tsi' ch'ʌmbeyob jubel i bʌc'tal Saúl yic'ot i bʌc'tal i yalobilob ya' ba' joc'ol ti' ñʌc' ts'ajc ti Betsan. Tsi' ch'ʌmʌyob sujtel c'ʌlʌl ti Jabes ba' tsi' puluyob. 13Pero tsi' mucbeyob i bʌquel ti yebal juntejc c'olol te' ya' ti Jabes. Tsi' cha'leyob ch'ajb wucp'ejl q'uin.
Currently Selected:
1 SAMUEL 31: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.