1 SAMUEL 30
30
David tsi' jisa amalecob
1Tsa' c'otiyob David yic'ot i winicob ti Siclag che' ti yuxp'ejlel q'uin. Che' ya'to añob ti bij, tsa' tiliyob jini amalecob ti Neguev yic'ot ti Siclag. Tsi' laj jisayob Siclag. Tsi' puluyob ti c'ajc. 2Tsi' pʌyʌyob majlel jini x'ixicob yic'ot pejtelel jini ya' bʌ añob, jini ch'o'ch'oco' bʌ yic'ot jini ñuco' bʌ. Pero ma'anic majqui tsa' tsʌnsʌnti. Tsa' jach i pʌyʌyob majlel che' majlemobix winicob. 3Che' bʌ tsa' c'oti David yic'ot i winicob, pulbilix jini tejclum. Pʌybilobix majlel i yijñamob yic'ot ch'iton bʌ i yalobilob yic'ot xch'oc tac bʌ i yalobilob. 4C'am tsi' cha'leyob uq'uel David yic'ot i winicob. Tsi' cha'leyob uq'uel jinto che' ma'añobix i p'ʌtʌlel. 5Tsa' pʌjyi majlel ja'el i yijñamob David ti' cha'ticlelob, Ahinoam jini jezreel, yic'ot Abigail tsa' bʌ cʌle ti meba' che' bʌ tsa' chʌmi Nabal chumul bʌ ti Carmel. 6David tsi' wen mele i pusic'al, come jini winicob yomobix i julob ti xajlel cha'an wen ch'ijiyemob i pusic'al cha'an i yalobilob. Pero David tsi' p'ʌt'esa i bʌ ti lac Yum Dios.
7David tsi' sube jini motomaj Abiatar i yalobil Ahimelec: Awocolic ch'ʌmʌ tilel jini efod, che'en. Abiatar tsi' ch'ʌmbe tilel i bujc motomaj. 8David tsi' pejca lac Yum. Tsi' c'ajtibe: ¿Yom ba mic tsajcan majlel ili xujch'ob? ¿Mu' ba caj c tajob? che'en. Lac Yum tsi' jac'be: Cucu tsajcañob majlel. Mu' cu caj a tajob. Che' jini mi caj a coltan jini tsa' bʌ pʌjyiyob majlel, che'en. 9Jini cha'an David tsa' majli yic'ot lujunc'al i cha'bajc' (600) winicob i pi'ʌlo' bʌ. Tsa' c'otiyob ba'an i ch'eñal ja' i c'aba' Besor. 10Ya' tsa' jijli David yic'ot jumbajc' winicob, come tsa' cʌleyob jini lujunc'al i pi'ʌlob ti' pat. Lujbeñobix. Ma'anix tsa' mejliyob ti c'axel ya' ti' ch'eñal ja' ti Besor.
11Tsi' tajayob ti jamil juntiquil winic ch'oyol bʌ ti Egipto. Tsi' pʌyʌyob tilel ba'an David. Tsi' yʌq'ueyob waj. Tsi' yʌq'ueyob i jap ja'. 12Tsi' yʌq'ueyob pechbil bʌ i wut higuera te' yic'ot cha'pajl tiquesʌbil bʌ ts'usub. Che' bʌ tsa' ujti i c'ux tsa' cha' ch'ejl'a, come uxp'ejlix q'uin yic'ot uxp'ejl ac'ʌlel ma'anic c'uxbil i cha'an waj, mi japbilic i cha'an ja'. 13David tsi' c'ajtibe: ¿Majquiyet? ¿Majqui a yum? ¿Baqui ch'oyolet? che'en. Tsi' jac'ʌ jini ch'iton winic ch'oyol bʌ ti Egipto: I mozojon juntiquil amalec. Anix uxp'ejl q'uin tsi' cʌyʌyon c yum come tsa' c'amayon. 14Tsac cha'le lojon xujch' ti Neguev ti' lumal jini cereteojob yic'ot ti Judá, yic'ot ti' lumal Caleb. Tsac tsuc'u lojon ti c'ajc Siclag, che'en. 15Tsi' c'ajtibe David: ¿Mejl ba a pʌyon majlel ba'an a pi'ʌlob tsa' bʌ i cha'leyob xujch'? che'en. Tsi' jac'be: Aq'ueñon a t'an ti Dios cha'an ma'anic ma' tsʌnsañon yic'ot ma'anic ma' wʌc'on ti' c'ʌb c yum. Che' jini muc'ʌch mejlel c pʌyet majlel ba' motocñayob ili winicob, che'en.
16Tsi' pʌyʌ majlel. Che' bʌ tsa' c'otiyob, awilan pam pujquemob ya' ti lum. Woliyob ti we'el ti uch'el yic'ot ti q'uiñijel cha'an i tijicñʌyelob i pusic'al cha'an i xujch'ob, come wen cabʌl chuqui tsi' chilbeyob filisteojob yic'ot jini chumulo' bʌ ti Judá. 17Che' bʌ tsa' c'oti che' ti ic'ajel, tsa' caji i tsʌnsañob c'ʌlʌl jinto tsa' cha' ic'a che' ti yijc'ʌlal. Wen cabʌl tsi' jisayob. Cojach tsa' puts'iyob jumbajc' winicob c'ʌchʌlo' bʌ ti camello tac. 18David tsi' cha' ch'ʌmʌ pejtelel jini tsa' bʌ i cʌn ch'ʌmʌyob amalecob. Tsi' cha' pʌyʌ jini cha'tiquil i yijñam. 19Ma'anic chuqui tsa' sajti, mi jinic ch'o'ch'oc tac bʌ, mi jinic colem tac bʌ. Tsi' cha' pʌyʌ tilel pejtel i yalobilob, ch'itoñob yic'ot xch'ocob. Ti pejtelel i chubʌ'an tsi' cha' ch'ʌmʌ. 20Tsi' cha' pʌyʌ pejtelel jini tiñʌme' tac yic'ot wacax tac. Jini i winicob tsi' cha' nijcayob sujtel. Tsi' yʌlʌyob: I cha'añʌch David cha'an ñuc bʌ i ye'tel, che'ob.
21Tsa' sujti David ba' tempʌbilob jini lujunc'al winicob tsa' bʌ cʌleyob ya' ti junwejl i ch'eñal ja' i c'aba' Besor che' ma'anix tsa' chʌn mejli i tsajcañob majlel cha'an c'unix pañimil. Jini winicob tsa' majli i tajob tilel David yic'ot i pi'ʌlob cha'an mi' yʌq'ueñob cortesía ti' tijicñʌyelob i pusic'al. David tsi' pejcayob ti uts bʌ t'an. 22Añob jontolo' bʌ tsa' bʌ majliyob yic'ot David. Tsi' subeyob i bʌ: Ma'anic tsa' majliyob la quic'ot. Jini cha'an ma'anic mi caj la cʌq'ueñob chubʌ'añʌl tsa' bʌ lac ch'ʌmʌ tilel. Jini jach i yijñamob yic'ot i yalobilob la' i pʌyob majlel. La' sujticob che' jocholob i c'ʌb, che'ob. 23Pero David tsi' subeyob: C pi'ʌlob, mach che'ic yom mi la' mel, come tilem ti lac Yum jini chubʌ'añʌl. Tsi' coltayonla ti' tojlel laj contrajob. Tsi' yʌc'ʌyob ti laj c'ʌb. 24Mach yomic mi lac mel che' bajche' woli la' ña'tan come mach tojic. Yom lajal mi' t'oxbentelob winicob mu' bʌ i cʌytʌlob yic'ot chubʌ'añʌl che' bajche' jini soldadojob mu' bʌ i cha'leñob guerra. 25Lajal mi caj i yʌq'uentelob ti pejtelelob, che'en David. Jini cha'an jiñʌch ley ti' tojlel israelob c'ʌlʌl ti ili ora.
26Che' bʌ tsa' c'oti David ya' ti Siclag, tsi' chocbeyob majlel i majtan jini xñoxob año' bʌ ti Judá. Tsi' yʌlʌ: Wʌ'an ts'ita' la' majtan woli bʌ c chocbeñetla tilel loq'uem bʌ ti chubʌ'añʌl tsa' bʌ c chilbeyob i contrajob lac Yum, che'en. 27-31Che' ja'el tsi' chocbeyob majlel i majtan tac jini año' bʌ ti Betel, Ramot am bʌ ti Neguev, Jatir, Aroer, Sifmot, Estemoa, Racal, Jerameel, Horma, Corasán, Atac, Hebrón, yic'ot ti pejtelel tejclum tac ba' tsa' c'oti tac ti jijlel yic'ot i winicob.
Currently Selected:
1 SAMUEL 30: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.