1 SAMUEL 28
28
1Ti jim bʌ ora jini filisteojob tsi' tempayob i winicob cha'an mi' cha'leñob guerra ti' contra israelob. Aquis tsi' sube David: Yom ma' majlel quic'ot ti guerra yic'ot a winicob, che'en. 2David tsi' jac'be Aquis: Uts'at. Mi caj a q'uel bajche' mi caj j coltañet lojon. A winicon, che'en. Aquis tsi' sube David: Mi caj c wa'chocoñet ti xcʌntaya c cha'an, cha'an ma' cʌntañon ti pejtelel ora, che'en.
Saúl yic'ot jini xwujt bʌ x'ixic ti Endor
3Chʌmenix Samuel. Tsi' yuc'tayob jini israelob. Tsi' mucuyob ya' ba'an i yotot ti Ramá. Chocbilix loq'uel ti jini lum pejtelel xch'ʌcoñelob yic'ot xwujtob cha'an ti' mandar Saúl. 4Tsi' tempayob i bʌ jini filisteojob. Tsa' c'otiyob ti jijlel ya' ti Sunem. Saúl tsi' tempa jini israelob. Tsa' c'otiyob ti jijlel ya' ti Gilboa. 5Che' bʌ tsi' q'uele Saúl ba' jijlemob jini filisteojob, tsa' caji ti wen bʌq'uen. 6Saúl tsi' pejca lac Yum, pero lac Yum ma'anic tsi' jac'be, mi ti' ñajalic, mi ti x'alt'añobic, mi ti Urimic (xajlel mu' bʌ i pejcan motomaj cha'an mi' ña'tan chuqui yom Dios). 7Jini cha'an Saúl tsi' sube jini x'e'telob i cha'an: Sʌclʌbeñonla juntiquil xwujt cha'an mic majlel j c'ajtiben chuqui yom mic mel, che'en. I winicob tsi' subeyob: An juntiquil x'ixic ti Endor, jiñʌch xwujt, che'ob.
8Tsi' q'uexta i pislel Saúl cha'an ma'anic mi' yʌc' i bʌ ti cʌjñel. Tsa' majli yic'ot cha'tiquil i winicob ba'an jini x'ixic che' ac'ʌlelix. Tsi' sube: Com ma' coltañon. ¿Mejl ba a pʌy tilel i ch'ujlel ch'ujlelʌl cha'an mi' subeñon chuqui mi caj i yujtel tic tojlel? Mic subeñet majqui com j q'uel, che'en. 9Jini x'ixic tsi' sube: Awujil chuqui tsi' mele Saúl. Tsi' laj choco loq'uel xwujtob yic'ot jini mu' bʌ i pejcañob ch'ujlelʌl. ¿Chucoch che' jini, ma' tilel cha'an ma' chucon ti yac cha'an mic chʌmel? che'en. 10Saúl tsi' yʌq'ue i t'an: Isujm mic subeñet, che' bajche' cuxul lac Yum. Ma'anic a mul mi tsa' mele, che'en. 11Jini x'ixic tsi' c'ajtibe: ¿Majqui a wom mic pʌybeñet tilel? che'en. Saúl tsi' jac'be: Com ma' pʌybeñon tilel Samuel, che'en. 12Jini x'ixic che' bʌ tsi' q'uele Samuel, tsi' cha'le oñel. Tsi' yʌlʌ: 13Jatet Saúl, ¿chucoch tsa' lotiyon? che'en. Jini rey tsi' sube: Mach a cha'len bʌq'uen. ¿Chuqui woli a q'uel? che'en. Jini x'ixic tsi' yʌlʌ: Tsaj q'uele winic lajal bʌ i wut che' bajche' dios. Woli ti loq'uel ti lum, che'en. 14Saúl tsi' c'ajti: ¿Bajche' yilal? che'en. Jini x'ixic tsi' jac'ʌ: Ñoxix bʌ winic yilal mosol ti pʌl bʌ i bujc, che'en. Saúl tsi' ña'ta jiñʌch Samuel. Tsi' ju'sa i wut ti lum. Tsi' pʌcchoco i bʌ.
15Samuel tsi' pejca Saúl: ¿Chucoch wola' tic'lañon? ¿Chucoch tsa' pʌyʌyon tilel? che'en. Saúl tsi' jac'ʌ: Wen wocol añon, come jini filisteojob woli' cha'leñob guerra tij contra. Dios tsa'ix i tʌts'ʌ i bʌ tic tojlel. Ma'anix mi' chʌn jac'beñon, mi ti' t'anic x'alt'an, mi tic ñajalic. Jini cha'an tsac pʌyʌyet tilel cha'an ma' subeñon chuqui yom mic mel, che'en Saúl. 16Samuel tsi' yʌlʌ: ¿Chucoch ma' c'ajtibeñon che' tsa'ix i tʌts'ʌ i bʌ lac Yum ti a tojlel? Tsa'ix sujti ti a contra. 17Lac Yum tsa'ix i chilbeyet a yumʌntel che' bajche' tsi' wʌn subeyet. Tsa'ix i yʌq'ue yambʌ winic, jiñʌch David. Tsa'ix ujti che' bajche' tsi' yʌlʌ lac Yum, che' bajche' tsac subeyet. 18Ma'anic tsa' jac'be i t'an lac Yum. Ma'anic tsa' jisa jini amalecob che' bʌ tsi' mich'leyob lac Yum. 19Jini cha'an lac Yum mi caj i yʌc' israelob ti' c'ʌb filisteojob. Ijc'ʌl mi caj a tsʌnsʌntel yic'ot a walobilob. Mi caj la' tilel wʌ' ba'añon. Lac Yum mi caj i yʌc' ti' c'ʌb filisteojob pejtelel jini soldadojob ti Israel, che'en.
20Che' jini Saúl tsa' yajli ti lum, come tsi' wen cha'le bʌq'uen cha'an i t'an Samuel. Ma'anix i p'ʌtʌlel come jump'ejl q'uin yic'ot jump'ejl ac'ʌlel ma'anic tsi' c'uxu waj. 21Jini x'ixic tsa' majli ba'an Saúl. Tsi' q'uele cabʌlix i wocol. Tsi' sube: Tsa'ix c jac'beyet a t'an anquese bʌbʌq'uen mic chʌmel. Tsa'ix c mele che' bajche' tsa' subeyon. 22Awocolic mele che' bajche' mic subeñet. Mi caj cʌq'ueñet ts'ita' waj cha'an ma' p'ʌt'an, cha'an che' jini mi mejlel a cha' xʌn majlel jini bij, che'en. 23Pero ma'anic tsi' jac'ʌ i c'ux. Jini i winicob yic'ot jini x'ixic tsa' caji i xic'beñob jinto tsi' jac'beyob. Tsa' ch'ojyi. Tsa' buchle ti' wʌyibʌl. 24Ti ora jini x'ixic tsi' tsʌnsa juncojt alʌ wacax jujp'em bʌ am bʌ ti' yotot. Tsi' ch'ʌmʌ harina. Tsi' xʌc'ʌ. Tsi' tiq'uesa caxlan waj mach bʌ anic i levadurajlel. 25Tsi' ch'ʌmʌ tilel ya' ba'an Saúl yic'ot i winicob. Tsi' c'uxuyob. Che' bʌ ujtemix ti we'el tsa' cha' majliyob che' ti ac'ʌlel.
Currently Selected:
1 SAMUEL 28: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.