1 SAMUEL 27
27
David ti' tojlel filisteojob
1David tsa' caji' yʌl ti' pusic'al: Mach jalix mi caj c chʌmel, come ti jujump'ejl q'uin bʌbʌq'uen mi' tsʌnsañon Saúl. Yom mic puts'el majlel ba'an filisteojob cha'an ma'anix mi' chʌn ña'tañon Saúl. Anquese mi' chʌn sʌclañon ti pejtelel i lumal Israel, mach i tajayonic. Che' tsi' ña'ta David. 2Jini cha'an David yic'ot jini lujunc'al i cha'bajc' (600) i winicob tsa' c'axiyob majlel ba'an Aquis (i yalobil Maoc) jini yumʌl ti Gat. 3Tsa' chumle David yic'ot i winicob ba'an Aquis ya' ti Gat. Ya' añob yic'ot i pi'ʌlob yic'ot i yalobilob. Ya'an David yic'ot cha'tiquil i yijñam, Ahinoam jini jezreel yic'ot Abigail tsa' bʌ cʌle ti meba' che' bʌ tsa' chʌmi Nabal ch'oyol bʌ ti Carmel. 4Tsa' subenti Saúl majlemix David ti Gat. Jini cha'an Saúl ma'anix tsa' chʌn caji i sʌclan.
5David tsi' sube Aquis: Mi uts'at ma' q'uelon, la' aq'uenticon cajñib ti jump'ejl alʌ tejclum cha'an mic chumtʌl ya'i. ¿Chuqui to i ye'tel mic chʌn chumtʌl ti jini ñuc bʌ tejclum? che'en. 6Jini cha'an ti jim bʌ q'uin Aquis tsi' yʌq'ue jini tejclum Siclag. Jini cha'an Siclag i cha'anix i reyob Judá c'ʌlʌl wʌle. 7Jump'ejl jab yic'ot chʌmp'ejl uw ya' chumul David ti' lumal filisteojob.
8An i tajol tsa' loq'ui David yic'ot i winicob cha'an mi' contrajiñob jini gesurob, yic'ot jini gezrob, yic'ot jini amalecob, jini chumulo' bʌ ti xchumtʌl tac, c'ʌlʌl ti Shur yic'ot ti' bijlel Egipto ba' chumulob c'ʌlʌl ti oñiyi. 9David tsi' jisa pejtelel jini xchumtʌl. Tsi' laj tsʌnsa winicob x'ixicob. Tsi' ch'ʌmʌ majlel tiñʌme', wacax, burro tac, camello yic'ot i pislelob winicob x'ixicob. Che' jini tsa' cha' sujti majlel ba'an Aquis. 10Che' bʌ tsi' c'ajtibe Aquis: ¿Baqui tsa' cha'le guerra sajmʌl? David tsi' jac'be: Ya' ti Neguev ti Judá, yic'ot ya' ti Neguev Jerameel, yic'ot ya' ti Neguev ba'an ceneojob, che'en. 11David tsi' laj tsʌnsayob. Ma'anic tsi' cʌyʌ mi juntiquilic winic x'ixic cha'an mi' pʌy majlel ti Gat. Tsi' yʌlʌ: Ame anic majch mi' sub chuqui tsac mele, che'en. Che'ʌch tsi' mele David ti pejtelel ora che' ya' chumul ti' lumal filisteojob. 12Jini Aquis tsi' ñopo pejtelel chuqui tsi' sube David. Tsi' ña'ta Aquis: Jini cha'an woli ti ts'a'lentel David ti' tojlel israelob. Jini cha'an wersa mi caj i yajñel la quic'ot. Mi caj i coltañon. Che' tsi' lon ña'ta Aquis.
Currently Selected:
1 SAMUEL 27: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.